Yasaqya 30 - NABUWWA KEE MALIKWA

MASRI LIH ABEN FOYYA BICA

¹ YALLI iyyeemih, «Yabti-cina le xayloy, sinim tekkeh! Anu faxam cintaanaah, isinnih faxxen mala malsittan. Yi idni maleh bica sinam lih haysittaanaah, dambit dambi osissan.

² Anu faxam yoo essere'kal, Masri fan gexxan. Catoh Masri amoytal kibaal haysitteeniih kaa aleelitten.

³ Takkay immay isin aleeloh liton Masri baaxo, qaybi siinih xalele. Masrit faxxen reebi qaybi siinih xalele.

⁴ Xintoh-abbobti Xooqanal loonuh, farmoh afat ruuben mari Caanis deqsitta magaala gufeenim aaxigeh immay,

⁵ Yuudâ-mari cato faxak maacisu waa saaku, Masri marih cato soono kinnim ablelon. Too waqdi, ‹A maray tuxxiq sinnil cato macah esserre?› 'yaanamal kaxxam nadaamitelon» iyye.

⁶ YALLI bacarih tan baaxoy gabbi-qaxat raqtahiyyal tan alluwwah giddinaamak farmo ruubeeh iyyeemih: Ta makaabonuy farmoh afat gexxehiyya gexen saaku, gibdaabina le baaxoy lubooka kee afat summi le abeesas kee haadda baadeysitte elle tanihiyyak adda gacca 'yeenih gexen. Merraytuh qarik garab danoonal luk gexen. Garab kaadu gaalal luk gexen. Too merraytul heenim, limo mango duyyek ten. Too duyye akah beenim, catoh edde qaagan marih mattacok ten. Takkay immay oson catoh edde qaagen mari, hebeltô-cato keenih abu duuda marak mananna.

⁷ Too duyye akah beenim, Masri mara'mmay, Masri marak geyoonu waan catotta malon. Tohuk gexxaamah Masri marak ‹Summi sinni abeesa› 'yaanam exceh an» iyye.

AMRI CINE MARA

⁸ «Aham hawwentime wayta'gidih, kulli way sumaq keenil takke'gidih, ta farmo ummatak foocal luucul uktub; warkatal kaadu uktub» 'yaanam Yalli yok iyye.

⁹ Macaay inteenik, oson kulli way Yalli faxe waam aban. Aamanti-sinni-xayloy YALLI keenik iyyam oggole waytahiyya kinnon.

¹⁰ Takku waytam sirrih table awliyak, «A sirrih mabuluk raaqa» iyyan. Yallih farmo bahta nabuwwak kaadu, «Hununuh taniimik bagul hayya mahanay, ceetaalissa haay, nanu naabbem elle fanxa innal neh warisa» iyyan.

¹¹ «Gitak darifih neh raaqa. Gita nek maalifina. Israayil doore Dageltay kudduusuk yanihiyyat nee mataqbisinay, nanay nee inxica» 'yaanam iyyan.

¹² Isin toh inteenik, Israayil doore Dageltay *Kudduusuk yani siinik iyyamaa, «Anu sin lih yaabe yab cinna hayteenih duquurusiyyal yeemeneh, ayrisiyyal kibaal haa mara takkeenim siinih teysek,

¹³ ama dambi, tonkommeeh bokokte gasoy maqar cabba hayteh raddam faxxahiyya siinil akkele. Isin tonnal garciik radetton.

¹⁴ Raddoonu waytan waqdi, uma'nnah yiddigille buutih innah akketton. Too buutik raaqe galqi yiddigillek wadir xiqam mali. Gombod edde weeraanam luk maraaqa. Lee edde kumsan mingil mayakka» iyye.

¹⁵ Mulki le YALLAY Israayil doore Dagelta kinniih *Kudduusuk yanihiyya iyyaamah, «Amay yol uduuray yol eemena; tonnal waddiimetton. Macisabbootinay kibaal yol hayisa; tonnal qande geetton» 'yaanam iyya'mmay, isin wohim cinteenih.

¹⁶ Tohih aftok isin, «Kaxxa arda le faariisit gacca 'neeh kudenno» inten. Nummah kudetton! Sin faariisa kaxxa arda lem takkaleeni'mmay, ama lakak sin yayradde mari siinik aakumele.

¹⁷ Keenik inki qaskariiti siinik alfi num ayraddele. Keenik koona qaskariiti, takkeenimik sin ayraddele. Qaleh amol takarten sinbiilik sah, qaskarak tu siinih maraqta.

YALLI ISI UMMAT WADELE

¹⁸ Tonna'mmay YALLI, tohuh, isi niqmat siinil oobisam faxaah; kaadu siinih racmata'gidih ugtele. Macaay inteenik, YALLI cakki le Dagelta kinni. Kaal kibaal haa mari ruffu iyya mara.

¹⁹ Isin Yarusalaamal yan marak ahaysa ruffa inteenih maweqtan. Yalla kallactan waqdi, siinih amqeleeh; cato kaal essertan waqdi, sin catele.

²⁰ Yalli gadaama kee gibdaabina siinil ruubele'mmay, isih siinik mabaxsimaay; nagay kaa aaxigetton.

²¹ Edde gexxan gitak guri kabul afkune kee, migdi kabul afkune takken waqdi, kay xongolo aabbettoonuuh, «Giti ah kaak; akkek gacay gexa» 'yaanam axcih aabbetton.

²² Dahab kee lakqo bagul akak hayten duyyey aqbuduk sugteenihiyya beyya hayteenih, guddaafa elle qidan gurrah baaxot qidettoonuuh, foocak nek kala 'yaanam axcetton.

²³ YALLI rob siinih ruubeleeh; buqre elle abinnaan ikkel, qidinnaan daro siinih aabukele. Mango daro orbisetton. Laahi siinik mango qayso geeleeh amaanah aloolele.

²⁴ Buqre edde abak sugten awurwa kee danoona kaxxam meqe qayso kee daro siinik geele.

²⁵ Sin naqboytiitit kaxxa sugudi yakku waah, ken kaxxa megdebwa taddigillu wayta saaku, kulli qaleela kee koomaamik lee darah oobele.

²⁶ Alsa ifuh ayroh innah gaceleeh, ayro kaadu ifuh malcina adda dumak lafitta axcele. Malcina ayroh ifuy yesgelleenihiyyah bis aallele. Aham takku waytam, YALLI isi mara abeh yan biyaakak edde qaffoysu waa saaku.

YALLI ASSUURIYAH MARA DIGAALELE

²⁷ YALLI allak yambullee. Kay naqbi habug inta girah bis leeh; woo girak kaxxa qeeriy datahiyya yawqe. Kay afak yawqe yab habug inta giray sahda takmehiyyah bis le.

²⁸ Kay ufuy kaxxa weeqay kullim duufut beyahiyyah bis le. Baadal tan doolatwa yaqiyyireh, finqa ken abele. Baadal tan ummatta badseleeh, santiitat hayya ken heeh makot ken beele.

²⁹ Takkay immay Yallih ummatey, isin ruffa axcetton. Qiddi bar abak yenen saare abetton. YALLA elle yaqbuden qalel, YALLA saarissaana'gidih, fooxima gabat luk tawqen waqdi, farcatah yassallen inna assalletton. Israayil-ummat dacrisa Dageltih-qale yamaate mari farcatah yassalle inna assalle lon.

³⁰ YALLI, isi xongoloy kaxxa nabna lehiyya akah tantaabbe innah abele. Kay bagcarra qandek leh gide ablelon. Yallih-cayli habug inta giraay; kaxxa rob kee kaxxa caaco kee, tonnah kaadu, kaxxa arroqleh gurral amaatele.

³¹ YALLI isi cayla Assuuriyah mara yayballayu waa saaku, kaxxa xongoloh xongoleleeh; too xongolo yaabben waqdi, Assuuriyah-maray sin aatakuk suge birti inna le caxxat amuttukele.

³² Yalli fiiruk geerah ken yaagureemih karambo kee *kirar kanniyto yaabbeenimik maadayinnon. Tonna leemiik YALLI isih Assuuriyah-maral-yuckume-digaalat ken digaale le.

³³ Assuuriyah malikih raysi edde carara'gidih, kaxxa gira dumaak bical sugte. Ta arac, kaxxa adda leeh baar le araca. Mango boco sittin bagul akak heen araca. YALLI isi ufuy urta *danih innah habug iyyahiyya too bocot ruubele.