Yasaqya 3 - NABUWWA KEE MALIKWA

YARUSALAAMAL CEELE WAYTOH TANIM TEKKE

¹ YALLAY Dagelta kinnih Nabaamak Nabahiyya, Yarusalaam kee Yuudâ-rasuk ummatta kibaal elle luk sugte mara kee duyye beele. Lee-kee-qaysoh edde sugeenim keenik beele.

² Ken agiira kee ken qaskaraay ken cokmaaba kee ken nabuwwaay, ken ramli-qida kee doolat abbobtiiy,

³ ken qaskar abbobti kee ummattah abbobtiiy, xintô-miracwa kee gabâ-naggaarinna le mara kee sicri aba mara inkih, ragid cabsiisele.

⁴ Abbootanah, ummat amol kas baahe wee urru heeleeh; oson isinni elle faxinnaan innal ken xiiniselon.

⁵ Mari marat keenik xukkutele. Qunxa urri barah naba mara mayassakaxxa. Tut loowoh suge wee mari, isik naba mara mayassakaxxa.

⁶ Inki gulubuk rade mari isinni addak numuk teenah secca 'yeenih, «Sartanah xagaral haa saro litoh tanik, a abuuruk yan aracak abba nek tik» edde iyyan wakti amaatele.

⁷ Toh akak iyyan num, too ayro, «Aleey, ah anu duudam hinnaay, anu innih xaga maaqo mayyuuy, xagaral haan sara mayyuuy, sin catam maduudak, abbah yoo mahana» 'yaanam keenil gacsele.

⁸ Hay tonnal Yarusalaam baatih lagaq intaah, Yuudâ-rasi finqah gexam faxa. Abba haanam kee inxicca 'yaanam inkih, Yallal saduh taniimi. YALLA qaduk xaafan.

⁹ Oson aban qadli-sinna keenit aamele. Sodom magaalah mari wacarriye'kal dambi akah abe innah, a mari kaadu wacarriye'kal dambi leemit asan. Woyyow keenit takku waytaama! Baati isinnih isinnil baahan.

¹⁰ Cakki bagul yan marak, «Kullim siinil amqele» inxica. Akah taamiteenim geeloonuuh, ruffu edde axcelon.

¹¹ Woyyow, uma marat takku waytaama! Umam aba num bayeleeh; kullim kaat aamele. Sinaamal baahem kaal baahelon.

¹² Urri yi ummattat xukkutah yanih; agbi ken amol yan. Yi ummatey, sin miraacisa mari sin duquurusah, makot sin beyan.

YALLI ISI MARAL YUCKUMEH

¹³ YALLI mackamatal isi aracal gacele. Ummattal cokmi abuh ugtele.

¹⁴ YALLI isi marak idoola kee abbobtih yan maral cokmi abele. Keenik iyyu waamah: «Yi baaxoy qinab xala coox elle aabakuk sugehiyya bayissen. Buxaaxi siinik masaakiinak beyten duyyek kibut tan.

¹⁵ Yi ummat xukkot tabbixeeni'mmay, masaakiinah yan marat taaqiteenim cakkik manton. Aham siinik intam, yoo YALLAY Dagelta kinnih, Nabaamak Nabahiyya» keenik axcele.

YARUSALAAM AGABUH AYLAHU KALEN

¹⁶ YALLI kaadu iyyaamah: «Yarusalaam-agbi kaxxiinah le inna wagitay. Kaxxiinah filla qaraanal beyan. Gexan way mellekkiy axcuk gexan. Intiita sahdal yabbixen. Ibat bilqah lon biriita gexan way sasac inta.

¹⁷ Takkay immay anu ken digaaleyyooh, amo keenik molla heeh daleela keenik elle ayyaaqeyyo» iyyah yan.

^18-23 Yarusalaam-agbi elle kaxxiinita duyye Yalli keenik edde beyu waa wakti yemeeteh. Oson bilqah filla kee amooy ayti kee iba kee carayat lon bila keenik edde kalu waa wakti yemeeteh. Amot lon musaan kee seedar kee, ibat lon birtaay, bagul lon caleytitte kee, tonnah kaadu, kitooba kee gaaxoytitteey, feerat lon ferran kee sanat lon dumam kee qatri edde haan karaaratay gabat beyaanahiyya keenik bukkusele. Toh lih kaadu xagar meqe sartanay culsah xagarat haanahiyyaay, xagaral haan maklabaay, lakqo edde haan oloy gabat beyaanaay, isinni elle yablen miraayataay, bandiiliiy, amô-sara kee saaxi kee, xagar addak yaybulle saray sartaanahiyya inkih keenik kalele.

²⁴ Qatri suruy ruubak elle yenen ikkel, xagar keenik abcele. Bagul luk yenen caleytih aftok, qax-umaane le akoota bagul heelon. Qax-meqe amô-xagooruy luk yeneenik, moolah raaqelon. Xagaral luk yenen qax-meqe sarih aftok, *qabuudut gacelon. Luk sugen qax-maqaaneh aftok, qax-umaaneh wacarriyelon.

²⁵ Yarusalaamal tan labha seefit qideloonuh; celeemah tan qaskar qeebit ambaxele.

²⁶ Magaala gasoosah afal yan mari rookiteleh weeqeleeh, oson elle sugen magaala, qasunuk heen barray baaxok bagul daffeytahiyyah bis aallele.