Yasaqya 29 - NABUWWA KEE MALIKWA

YARUSALAAMAL TAKKU WAYTAAMA

¹ Yarusalaam-magaalay, kum tekkeh tan! Dawud dabqah elle sugeeh, Yallih sadgat elle aben mansaf elle yan magaalay, sanatat sanat osisaay, abtan qiidittek maadiyina'mmay,

² isin faxe qiid abtaanamah, Yalli, «Anu a magaala biyaakiseyyo» 'yaanam iyyah yan. «Yarusalaam boogiseleh, rookitele. Sadgat elle aban aracal qabal elle caxita innah, magaalal qabal caxitele.

³ Yarusalaamat qeebi abeyyo. Maro teetit haysiiseyyooh, tokkeek qeebi teetit absiiseyyo.

⁴ Yarusalaam-magaala ramma axceleeh, tet xongolo kabrik addak tawqe xongoloh xaw aallele. Is maqar cabeleeh, siisah addak hunnuy inta xongoloh xaw xaawele.

⁵ «Takkay immay mango naqboytiitiy kot qeebi abahiyya siisa akkele. Koh racmate waa mari caffay caaco beyte akkele» iyye. Tah sissikuk takku waytaama.

⁶ YALLAY Nabaamak Nabahiyya qaran-kakkaqooy baaxoh-angoyya kee ibak-gibdi-xongolo ruubele. Tonnah kaadu, kaxxa caaco kee caacay kee sinam takme gira ruubele. Yarusalaam mari tohuk cattiimele.

⁷ Mango baaxoh maray qeebi siinit abuh maro siinit heehiyya, siinil bar tublen soono akkele.

⁸ Satqite numuy soonot maaqok cayyehiyyah bis le. Woo num xiinik ugta waqdi, woo cayi edde abem soonok sugta. Bakaarite numuy soonot leek cayyehiyyah bis le. Woo num woo xiinik uguta waqdi, woo bakaarat edde suga. Mango maray mango baaxok yemeeteh Siyon-qalet qeebi abu waahiyyat, takku waytam tamaha.

⁹ Ama tekken xangi-maleelay akah taniinihiyya tika. Akah tanin inti maleela tika. Qinabak bicsen kamri aaqube'kal lagaggaq intan. Gambiik gambil lagaq intaana'mmay, toh kamri maqubih sabbatah abtaanam hinna.

¹⁰ YALLI kaxxa xin siinil ruube. Nabuwwa sahdah addah inti takkem faxxiimak ten. Takkay immay YALLI namma inti keenik alfeh. Sirri yable mari sahdah kas kee misinkaca yakkeenim faxxiimak ten. Takkay immay YALLI misinkaca keenik alfeh tut rade ken kaleh.

¹¹ Sin yuybulle wacyi maceddaanaay; alifit yan kitaabih addal yan yaabih gide siinil akkele. Woo kitab numuk teenay yakriyehiyyal beyya hayteh, «A kitaabal tanim macaay? Ikriyey!» intek, woo num «Anu aham akriyu mabicsa. Macaay intek alifit taniih, fakiimeh akak wayta asta le'kkah makriya» axcele.

¹² Akriye waa numul beyteeh kaadu, «Yoh ikriyey» intek, «Aleey anu kawsa maaxiga» 'yaanam axcele.

¹³ Yalli iyyamaa, «A mari afak yoo yaynabem ceela'mmay, afqado keenik yoo matassanabba. Oson yot aban qibaada yi garil hebeltô-maqna mali. Diinih loonum, sahda teyyeeqe madqa kee abuk-raqtih luk sugen qaada.

¹⁴ Tohuk gexxaamah anu ta maral ablewaynuh taniimiy kaxxa cunxoh akak cunxutoonu waanahiyya baaheyyo. Oson kasloytiitih lon marih kas foyya abeyyo. Ken maray bagi cubbi luk yenek woo cubbi foyya abeyyo» iyye.

CAKKI LE DABAN AMAATELE

¹⁵ Edde tanin mala YALLAK yaaqurem yakkale maraw, sinim tekkeh! Uma-taama bar ditet abaah, «Nanu abnam iyyi nek yableeh, iyyi yaaxige?» 'yaanam intan.

¹⁶ Sugtem deerik afah korissaanam faxxan! Kallak buuti bicse num kee, kallak bicsen buuti inkim celsissan. Buuti is bicse numuk, «Yoo mabicisinna. Isi gabak yoo maabinna» iyyam bictaa? Woh iyyaamih dudda maay le? Buuti, gabak is bicse numuk, «Woh tu yaaxige num hinna!» iyyam maay duudaa? Maduuda.

¹⁷ Dago waqlak wadir kaxxa-garboh sugte baaxo niqmatah tan buqreh-baaxo akkeleeh, woo buqreh-baaxo kaxxa-garboh innah gacele.

¹⁸ Too ayro, kitab addal tanim ayti-mali aabbele. Inti-mali kaxxa diteh addak awqele; inti geele.

¹⁹ Rammita mari, YALLAT kaxxam ruffa axcele. Israayil doore Dageltay kudduusuk yanihiyyat, masaakiina ruffa axcele.

²⁰ Macaay inteenik, racmatta maleela baatih gexele. Kulliimil qangaasalah raba mari mano luk maraaqa. Umaaneh abittoh sangeelak yen marih baati akkele.

²¹ Cakki-bagul-yan-maral diraabah-sumaaqita-mari bayele. Cokmi-buxal, cakki-le-mara cakki-waysiisa-mara baati qambalta. Qellat-sinni-mara-cakki-gee-kala-mari bayele.

²² Tohuk ugutak, YALLAY Abraahim gadaamak yeyyeeqe Dagelta kinnihiyya, Yaqkuubuk rade marih giddinaamak iyyamaa, «Yaqkuubuk rade mari ahaysa akah wacarriyam mali. Ahaysa cunxoh fooci keenik maburraacita.

²³ Macaay inteenik, anu siinih acee xaylo tabloonu waytan waqdi yoo aqbudetton. Yaqkuub doore Dageltay kudduusuk-yani kinniyom yok aaxigetton. Yi migaq aynabetton. Yi meysi xagarat siinik culele.

²⁴ Too saaku yab ayti akak cule waak sugte hawri-maleela yaabat radele; bagi cubbi geelon. Kulli way ceele-wayto baahak suge mari meqem bartele» iyyah yan.