Yasaqya 28 - NABUWWA KEE MALIKWA

WOYYOW SAMAARIYAH-MAGAALAT TAKKU WAYTAAMOW!

¹ Efrayimih yooboke maraw, kamri taaqube sakaareenow, able liton; woyyow axcetton. Amo elle miqiton magaala, qobooruk bicisen kalabtaay; elle kaxxiinittaanam teeti. Woyyow, teetit takku waytaamow! Niqmatak tan kayrih tan golok daga raqta magaala siinik birroh innah laqaymuumele. Qaxa liton bilqa litoonuh immay bayettoonum digga le.

² Dagelti gabat lem oobbeya. Qande le celemiy kuwwat le, atkaay qeebi keenit aba'gid gabat leeh; bical yabbixeh yan. Usuk mamaata abu waa saaku, arroqley kaxxam gibdih gurrah, kullim bayissa caacoh innah, kullim duufut beya weeqi'nnah, amaatele, gufele tokke. Toh inkih baaxol oobisele.

³ Israayilik kamri taaqabok amot lon kalabta radele. Ibitteh teetit taqqa axcelon.

⁴ Laqaymumte birroh inna leh, niqmatak tan kayrih tan golok daga raqta magaala keenik xayi waktih addat bayele. Is luk sugte qaxa kee bilqa suge wayteh innah gacele. Kusrah amot tooboke xayloy alayte waqdi num ifiillaay ukumma heeh innah bayelon.

⁵ Too ayro, YALLAY Nabaamak Nabahiyya kay maray baatik saaboh raaqeh qaxa kee bilqaay nabna akkele.

⁶ Yab kuraah, cokmaabah yan marah qadaalat kinnim barisele. Magaalâ culma beya gita wagtaah, dacayri edde aba marat niya heelem, YALLAY nabna le.

YASAQYA KEE TISKIRE NABUWWA

⁷ Seekaay nabuwwa abte sikratah ibi keenik lagaggaq iyya. Kamrit aben sikratih taagah annikissuk yandafoofolen; baditak gita malit radan. Nabuwwa kamrit tiskireh tan. Suwaawuruy oson yableenit radoonu cineenih; yefferen. Seeka kaadu kaxxam tiskire; sinam amoh keenik bahta yab mekloonuuy kuroonu yefferen.

⁸ Maaqô-mingilwa alliyot baysen. Abcise'kah cabeenim matan.

⁹ A mari anqaasah yok iyyaamah: «Usuk iyyaay? Iyya is yakkaleeh? A farmo iyyah warsam yakkale? Anguk molla 'yeh yan qunxa urruh warsitaamaay ken geysiisaama» 'yaanam axcuk yok wayto yaceen.

¹⁰ «Usuk uma'nnal nee barsah yan. ‹Wonnah abaay annah aba› iyya. ‹Naharsi amril gersi amri osisa; Away tu-aba, sarra tu edde osa› 'yaanam urri innah nee barsah yan» 'yaanam axcuk wayto yok yaceen.

¹¹ Faxe waytaanam yi yab tekkek, marin maray beedi-afat yaaba sin barisuh Yalli ruubele.

¹² «Offoofiyaay, ahaysa uqrufa; taqbe marak uqrufa inxica» siinik axcuk sugtem Yalla'mmay, takkeenimik Yallih-yab cinten.

¹³ Tahak wadir YALLIH qangaray keenih yacee, tonnal akkele: «Annah abaay wonnah kaadu aba; Naharsi amril gersi amri osisa; Away tu aba, sarra tu osisa» 'yaanam axcuk ken amrisele. Tonnal too qangara too saaku ken beyak, deerih ken qidele. Mudduumelon; oflot radelon; mudduumelon; ken abbixelon.

¹⁴ Kulliimil qangaasalah rabah! *Yarsalaamal xiinisa maraw, tahaysa YALLIH iyyem oobbeya.

¹⁵ «Nee kee rabi fanal qahdi yan. Nanu akeera lih bica hayne» intan. «Duufut sinam beya weeqayti yamaate way nee mabeya» intan. «Silac nek duquurusiyya» intan. «Dirab kibaalah nek yan» intan. «Bala qaraanak tamaate way, nee maxagta tu mabahta» intan. Tirtirissan; tahal falmittan.

¹⁶ YALLAY Mulki le tohuh iyyamaa, «Siyoonul yigirriben xaay limo mangooh, digga le rakiibo yakkehiyya heeyyo. Yoo yaamine num mabadita.

¹⁷ A magaala edde massowtu waytam, qadaalata. Sekexih gexxaamak cakki kee qadaalat tet sooliseyyo. Diraabay isin elle taamineenihiyya bayseyyo. Isin uqurah liton arac weeqi duufut beele.

¹⁸ Sin kee rabi fanal yan qahdi bayele. Akeera lih hayten bici gaba kalele. Duufut sinam beya weeqayti yamaate way duufut sin beele.

¹⁹ Bala qaraanak siinit elle amaatinnaanimil sin baysele. Bar siinit amaateleeh, laqo siinit amaatele'mmay saabo sin cabsiisele» iyye. Ta farmok maqna teexegeenik, kaxxa hagga siinil akkele.

²⁰ Missilah, «Qunxa qarkayto iba kok cabiiy, amo kok cabe'kah inkih koo matabbixaay; dudda sinni guula num mataybududda» iyyaana'mmay,

²¹ YALLI duma Faraadim-qalel akah abe innah siinit ugtele. Gibqon-Golol akah bagcarrite innah siinit bagcarritele. Isi taamay isin kaak akkaluk suge waytaana abele.

²² Ahaysa anqas tayseedeenimi. Cinna hayteenik, axawah edde tanin silsilat kiriqqa siinil heelon. YALLAY Dagelta kinnih, Nabaamak Nabahiyya siinil oobisu waa baati siinil yuckumem yoh warseh yani'mmay, anqas cabtaanam siinih tayse.

²³ Ankacisaay yi yab oobbeya. Yi yab cubbusaay ayti akah ucuya.

²⁴ Buqre-abe baaxo yabqure waqdi, yabqure baaxo kulli way madaga. Yabqure'gidih baaxo kulli way macota.

²⁵ Naharak buqre elle aba ikke missossa haa. Tohuk lakal kammuun kee kudbara kee, tonnah kaadu, kamadi kee gabru deqsitta daro elle yabqure. Kulli dariyyu le aracal yabqure.

²⁶ Yalli kaah yecee ixxiga leeh, tohuk gexxaamah isi taama meqe innal aba.

²⁷ Data filfil kee kudbara tuma waqdi, kaxxa caxxat akkiiy, qunxa caxxat akki, tuma.

²⁸ Kamadi akak bahta'gidih, fiiruk geerah caxxat matuman. Kamadi aame'kal faras gaari bagul akak elle beyan inna yaaxigeh.

²⁹ Tah inkih YALLAY Nabaamak Nabahiyyah baritto. Kay kas qajiibih yaniih, kay ixxiga kaxxa nabna le.