Yasaqya 27 - NABUWWA KEE MALIKWA

ELLECABOH IISA

¹ Too ayro YALLI isi seefiy nabam gibdiih, qande kee nabna let, Leyyatan qidele. Leyyatan deqsita kaxxa abeesay makmakitak gexxa digaalele. Leyyatan deqsita kaxxa abeesay kudak sugte digaaleleeh, kaxxa alay baddi addal yaloolehiyya qidele.

² Too ayro, meqe qinab xalta caxah qadar aba. Qadarah intoonu waytaanamaa:

³ «YALLI qinab-caxak iyyam le: ‹Qinabak dacayri anu abeyyo; amo teetik anu wagteyyo. Fiiruk geerah leek tet afqeyyo. Naqboyti gabak dacriseyyo. Bar kee laqoh tet dacriseyyo.

⁴ Ahaysa tet naqabuk raaqeh immay sissib tet addat yenek, hinnay keenan tet addat yenek, woysa tittat ken carriseyyo.

⁵ Toh hinna'mmay yoo wadbiteenik, yo'lih bica mara yakkoonay; yo'lih bica mara yakkoonay› 'yaanam YALLI keenik axcele.

⁶ Ahak sarra tamaate ayroora Yaqkuubuk samad daabimele. Israayilik ummat saadele; caxâ-miri baad duudusele.

⁷ Israayil ummat qide mari, duma yan saaku akah rabe'nnah, Yalli Israayil ummat maay qide? Keenit qeebi abe marak abem hay, Yalli keenik abeh maay yan?

⁸ Ken tinqibeeh, baaxok teyyeeqe. Ayrô-mawqak silisse caacot, baaxok, YALLAW, ken tiskiliqeh.

⁹ Tonnal dambi keenik katele. Israayil mari edde ase umaanek qafu geen saaku aham akkele: sadgatah xeetik bicsen mansaf, bardak bicsen xisneh innah, iggilla heelon; riira akkele. Aseeral yaaxigen gurmuuday qibaada akah abak sugeeni, qaydarus elle ruuban mansaf soolak maraaqa; bayele'kkal.

¹⁰ Maroh gaso edde tan magaala hunah raaqele; dibu akkele. Num sinniih dibuk yan bacari akkeleeh, abuuruh raaqele. Laahi dabqih elle gacele; noktimah tokke haysitele. Qayso noktimal aloolele; noktimal coox ludwak yaloole.

¹¹ A cooxuk ludwa kafta saaku, butukka 'teh taddigille way, agbi girâ-bocoh haysita. Tut radaah geya mara hinna. Ken Kaalik keenih maracmata; ken Dageltay ken yukluke aysa maqaane keenih maaba» 'yaanam qadarah axcetton.

¹² Too ayro YALLI, Furaatak xabba haanamaay Masri cuduudul yan daqaarah amma 'yaanam fan, Israayil ummat gaaboysele. Isi mara gaaboysele. Kamadik caffa elle baxsan innal, ken baxisak ken gaaboysele.

¹³ Too ayro, kaxxa *baanta aagureloonuuh tet kaayiselon. Masri kabuk gitah been mara kee, Assuuriyal baatit yan marah seecaana'gidih tet aagurelon. Too baanta aabbeloonuuh amaatelon. Yarusalaam-qaley saytunil YALLA aqbudeloonuuh, kaa aynabelon.