Yasaqya 26 - NABUWWA KEE MALIKWA

YALLI ISI MARAH IISA ACEELE

¹ Too saaku Yuudâ-rasul qadar abelon. Qadarah iyyoonu waanamaa, «Ni magaala qandeey maqar le; Yalli isih maro teetit heeh yan; tet wada'gidih maro edde hee; is Yallih dacayri geyteh tan.

² Numma le mari cula'gidih tet gasoh afa faka, ummatey. Imaan le mari akak cula'gid tet gasoh afa faka, ummatey. Kibaal Yallal digga le mari cula'gid gasoh afa faka.

³ Isi gital digga 'ye mara cooca sinni amaanal xiinissa. YALLAW, too mari kol kibaal haak, wagriiy amaanal ken xiinissa.

⁴ YALLIH dacayri daayiman tan; daayiman amo nek wagtele. Kulli waqdi YALLA naaminay, YALLAL eemena; kibaal kaal haa.

⁵ Kaxxiina leela qaybik qide; ken magaalay nabna luk sugte yiggileh abuuruh tet cabe. YALLI bullaaqet tet yesgelle.

⁶ Xukkot suge marih itqah tan; tu maleela kee masaakiina itqa kee gitah tet haysiten.

⁷ «Numma le marih giti meqe. Qadaalatlow, qadli le marah, gita missossah, makok kaltah.

⁸ Ku gitat genxa waqdi, YALLAW, kibaal elle haynam koo, YALLAW. Amo-elle-meqinom koo, YALLAW. Fanxam ku massakaxxa, YALLAW.

⁹ Baral koh maxhaxah, Dageltaw, maaca kaadu ku raksit liyo. Addunyal ku cokmi yablen way, sinam qadli kinnim baritta.

¹⁰ Dambileelah meqem abta way, tonnal qadli kinnim mabartan. Cakkit-gexah yan marih-baaxol, umam aban; dambi lem baahan. YALLI le misliino kee heebat macubbusan; toh mayaaxigan.

¹¹ YALLAW, isi-gaba ugusse'mmay, toh mayablan; edde maradan. Isi marah lito kacanu, ableloonuh; wacarriyelon. Koo niqbam girat ambaxele.

¹² «YALLAW, wagari neh taceem koo. Nanu abneeh nugdube taamoomi, 'kak geynem koo; nee xiqsissem koo.

¹³ YALLAW, ni Goytaw, ni Dageltaw, ku cato geyak, naqbudem koo. Kok sah reedonwa ni-amol sugte.

¹⁴ Mayanin, alqo, boodo oobeeniih; Mayaduuran; kabrik muugutan. Ken digaalteh ken bayisse'kkal, aysa rooci keenil magaca. Ahak wadir ken kassam matan.

¹⁵ Ni baaxo kaxxa rasuh hayte; YALLAW, tet kaxxa rasuh hayte. Baaxo dumak baguh teymeggeh. YALLAW, atu litoh tan nabna, baadal doolatwa takkeemik, aaxaguk maacisele, YALLAW.

¹⁶ «Ku mari gadaamite saaku, ken digaalteeh adbisse saaku, catoh koo fan yemeeten, YALLAW, isinni bagut dooqa abiten.

¹⁷ Lacawat tan barray boogissa, elle weqtaah boogissa gurral, ku foocal boogisneh nen, YALLAW.

¹⁸ Booget neneeh, lacawat neneh; immay xallem, dubuk caacaya. Baadah tuxxiq lem mossiminna. Gibdaabinaay gadaamah addak, ummat nayyaaqu maduudinno. Baadal nasri mabaahininno.

¹⁹ «Ku marak rabtem anuwwele; ken xagaral rooci gacele. Kabri culteeh diiko nagartem anuwweeleeh, qilila abele. Kafte qayso naafi doogisaah, Yalli rabtem tonnal doogise.

²⁰ «Yi ummatey, buxah addah cula; qarwak afa isinnit alifa. Yalli naqabuk xamacam fan dago gide kaak ombooqora.

²¹ Addunyâ-bagul yan mara inkih ken umaaneh digaala'gidih, YALLI dabqik yawqeh yamaate. Sinam rooci yeyyeeqe mara, aysa baaxo ken mataaqura; qiden marih qabal awqele.