Yasaqya 25 - NABUWWA KEE MALIKWA

YALLAH ABEN SAARE

¹ YALLAW, yi Goyta kinnito. Litom muxxo le diggah ten. Dumaak elle malisse'nnal, ku diggay dudda lehiyyat, akke-waynuh tanim abte. Toh abaluk koo aynabeyyo; fayla kaadu koh abeyyo.

² Magaala huna abte, YALLAW, suge wayteh innal cabte. Gasot maroh tan magaalay naqboytak waaso luk sugte abuuruh cabteh, huna abte. Marin marih kaxxa qarwa duma elle sugte magaala suge wayteh innal cabte. Too magaala tohuk wadir nammeyhaak way maxissimta.

³ Toh abaluk, toh aaxaguk cayla-leelah tan ummatta koo aynabele; assakaxxele. Sahdat xukkutta doolatwa elle dardarta magaala kok meysitak koo aynabele.

⁴ Baaciteeh yossomme marah reebu kinnito, Dageltaw. Gadaama kaa tabbixe way gabat tu sinni miskintuh reebu kinnito, Dageltaw. Too maray ayro carrissah caaco kee rob qayyaawise, reebissah, ken silaalissa. Xuwaw maleelah umaane kaxxa caacoy xeet taggileh inna le'mmay tu mabahta.

⁵ Xuwaw maleela xongolta. Ken tirtira kee xongolo tibba hayteeh, kacca hayte. Dahanay bacaril yani iraw radek, xabbacoowah. Allahî-marih xongolo too gurral xamcisse, YALLAW! Xuwaw-maleela abta saxxaq bayisseh tibba haysisse.

YALLI XIGLA ABELE

⁶ YALLAY Nabaamak Nabahiyya addunyâ-bagul enna 'ta ummattah, a Siyon qalel, kaxxa xigla abele. Too xiglah kulsa le maaqo kee qinabak bicsen kamriy kulsa lehiyya bicsele.

^7-8 Tokkel gacca 'yeh, kafanay addunyâ-bagul enna 'ya mara qambaalahiyya katele. Raba 'yaanam wadiriik baysele. Baadal tan ummatta inkih abak sugteh tan qaadiyyak ayyaaqele. YALLAY Mulki le kulli numuk ximo duugeleeh, kay ummatta kulli baaxol edde sugte qaybik ayyaaqele. Tahat yabtem YALLA.

⁹ Aham takku wayta saaku kulli num, «YALLI ni Dagelta kinnih, kibaal kaal hayneh, nee wadeh. Yalli kaa kinnih, kaa naamineh. Nee waddem kaa kinnuk, nafriceemiiy wallinnaama» axcelon.

¹⁰ Macaay inteenik, YALLI Siyon-Qale amaanah xiinisele. Takkay immay Mooyab marat laahi robbi addat suge caffat akah yaaqiten innah aaqitelon.

¹¹ Mooyab mari giiru aba numih innah gaba asgayyelon. Takkay immay woh tu keenih maxiqtaay; Yalli qaybik ken qidele.

¹² Mooyab mari reebu le aroocay kaxxa gasoosa le bayele. Addigilleleeh, bullaaqet angalele.