Yasaqya 24 - NABUWWA KEE MALIKWA

YALLI INKIH YAN BAAD BAYSELE

¹ YALLI addunyâ-bagul tanim foyya abeleeh, kaxxa baatih baysele. Baad bayseleeh tet bagul yan mara fixixisele.

² Seeka kee seekak kalih maraay, kaadintu kee kaadintu le numuuy, kaddaama kee kaddaama le barraay, duyye xaama num kee yaylamme numuuy, abuud faxa num kee abuud yecee numuuy, mago edde tan num kee mago le num inkih, inki digaalah digaalimelon.

³ Baaxo inki gexook bayele. Tet bagul yan marat kaxxa buuba akkele. Tahat yabtam YALLA. YALLI iyyem raq mali.

⁴ Baaxo kafeleeh, coox laqaymuumele. Addunyâ-bagul yan mari boolaatele. Kaxxa marah yan mari aqunxuyuk maacisele.

⁵ Baaxo nadaasa abtem sinaama. Macaay inteenik, Yalla cinaanaah, usuk aba iyyem abe waanaah, Yallih Qahdiy daayiman waarahiyya makan.

⁶ Tonna-leemiik Yallih-abaaro addunyal obte. Tet bagul yan mari akah biyaakitam, isinnih aben umaane. Addunyâ-bagul yan mari isih abe umaanek gexxaamah, bayak maaciseleeh dago mari raaqele.

⁷ Qinab xala coox kafele. Qinabak bicsen kamri waytimele. Tohuk gexxaamah duma farcatat suge mari qaadele.

⁸ *Kirar kee karambo aagaruk afracuk abak yenen gad gaba kaleh.

⁹ Qinabak bicsen kamrih amol abak yenen gad ahak wadir yumurruqeh; kamri qeero keenit baahe.

¹⁰ Magaalah addal uluuluka kee umaane amaggeleeh, sinam meysih qarwa isit alfele.

¹¹ Qinab kamrih waytih ummat «Woyyow» axcele. Duma akkuk yen farcat amurruqele. Farcat kee ruffa ahaysa addunyal gaba kalele.

¹² Magaala abuuruh raaqeleeh, akak culan afa bututtukkay riira tet abelon.

¹³ Addunya kee addunyal enna 'ta ummatat, tamah takku waytaama. Caxâ-miru akak yifiilen caxah amot, akak aylahiten caxâ-miri tiya-tiyah akah raqta innah, addunyay baatehiyyah bagul num-num saaboh raaqele.

¹⁴ Woo saaku rabak raaqe mari africeleeh qililisele. Ayrô-culma le kabul yan mari YALLIH misliinot yaabelon.

¹⁵ Tonna leemiik ayrô-mawqa le kabul yan marak, isin YALLIH nabnat yaaba. Baddi-xaqul yan marak, YALLIH migaq essekexxeya. YALLAY Israayil doore Dagelta kinnihiyya essekexxeya.

¹⁶ Baaxô-maggaraqak saareh-anay nel rada. «Qadaalat kee cakki le Dageltah fayla takkay» inta xongolo nel radah oobbe. Sarrak ganoleelay sinam gantahiyya uble. Too waqdi, «Woyyow yi nabsow, woyyow yi nabsow, unsumuumeh maana! Ganoleela uxih sinam gantah matanaa!» 'yaanam exce.

¹⁷ A addunyal tan ummatey! Siinit raddu wayta cunxo kee, edde raddaana'gidih boodo kee oflo bical siinih tan.

¹⁸ Cunxo sinaamat qidda xongoloh anay yoobbeh kudu waa mari boodot radele. Woo boodok yewqe num oflot radele. Macaay inteenik, qaran-afoofa fakkinteeh, qaraanak kaxxa rob rada. Baad-rakiibo tangayyeh tan.

¹⁹ Baaxo kaxxa angoyyah angayyeleeh, rike rikeh kurruumeleeh xuumele.

²⁰ Baaxo yiskire numih innah kabuk kabul lagaq axcele. Digga sinni siraqih innah angayyele. Abte Yallih-cinak gexxaamah annikisseleeh, abte niksok sarra muugutta.

²¹ Too ayro YALLI qaraanal taniimiy cayla lehiyya qaraanal digaalele. Baaxô-bagul tan amoytitte kaadu digaalele.

²² Casbi gurrah boodot titta lih ken heele. Too boodoh addat mango ayro sugga iyyeenik lakal, ken edde digaalan ayro amaatele.

²³ Sarra, YALLAY Nabaamak Nabahiyya reedele. Tohuk gexxaamah alsa kee ayrô-diifi amballayuk maraaqa. Too saaku YALLAY Nabaamak Nabahiyya Yarusalaam magaalal Siyon-qalel reedele. Yarusalaamal sugtu wayta makaabon too saaku kay nabna ablelon.