Yasaqya 23 - NABUWWA KEE MALIKWA

SUUR KEE SAYDAY FINIIKIYAH MARI DABAQAH ELLE SUGE BAATE

¹ Yalli, Suur magaalah giddinaamak ruube farmo ah teeti. Suur baateeh; Suurul amaatuk yen maraakib edde culak yen marso kee qarwa bayteh immay, maraakib maraw, weeqaay boogisa. Sin maraakib Kobroosuk yuduure saaku, sin qambaltam ta xaagu.

² Baddi-afal yan maraw, tibba 'xicay rookitaay arkita. Saydâ-maray badat gaddalite mango duyye sin fan baahak suge.

³ Masrik orobta tellemmô-daro Suur magaala amaatuk sugteeh; baadal tan ummat duyye elle yaylammeeniih xaamaanam ta magaalak sugte.

⁴ Saydah magaalay wacarriy! Ku bad yaabeh, iyyemii, «Lacaw kee xalay able wayteeh, xaylo aynabe wayte barra ekkeh an» iyyek!

⁵ Suur magaala baatem yaabboonu waan waqdi, Masri mari kaxxam waagiseleeh wariggitele.

⁶ Isin baddi-afal yan maraw, rookitaay boogisa. Isbaaniyah baaxo fan kuddaanam gabbata.

⁷ Dumî dabaanaak xissinteeh, kaxxa farcat elle akkuk yenem, Suur magaala. Teetik mango mari safarah gexak yeneeh, tellemmo elle aban baaxooxal dabqih gacak yen.

⁸ Suur inaytâ-magaalay malikwa akak temeetehiyyak ten. Teetil tellemmo abak ten muddaqiyitte baadal migaq-gexxo le marak ten. «Annah tanim teetil bahtem iyyaay?» innek,

⁹ ta magaalal tah oobissem, YALLAY Nabaamak Nabahiyya kinni. Akah abem, teetiy sahda elle kaxxiinitak sugte bayisa'gidiiy; baadal migaq-gexxo le mara inkih wacarroysa'gidih abe.

¹⁰ Ahaysa Suur maraw, booruy duyye siinih elle obta mantoonuk, Niil-weeqaytih garil yan marih innah, baaxo ubqura.

¹¹ Yalli bad fanah gaba ruube. Inkih tan baaxo meysih axaxxe. YALLI, «Kanqaan baaxol koositih bicsen arooca bayisa» 'yaanamih amri yecee.

¹² Yalli iyyemii, «Saydah magaalay ku farcat gaba kaleh. Ku mari xukkot yan. Kobros fanah kudaanamah, wokkel kinni, amaan mayan.

¹³ Baabelon mari edde yan caalat wagitay. Too mari ta saaku hebeltô-loowot mayan. Assuuriyah mari ta baaxo dubaali dabaq abe. Baabelon yabbixeeni'gidih fayya le aroocay tet akak yabbixoonu waanahiyya bicsen. Baabelon mari koositih bicsen arooca foyya keenik aben. Inkih tan magaala abuuruh cabba heen.

¹⁴ Badal maraakibit gexa maraw, boogisa. Wadbah luk sugten Suur baateh.

¹⁵ Away edde yaabeh suge daban yakku waa waqdi, Suur malcina-tabanih sanat hawwentimele. Malcina-taban, malik qumrih sugah gide. Too malcina-tabanih sanatak lakal, Suuruh xiiqareh-xiinah abak yenen gad teetih abelon.

¹⁶ «Hawweenen xiiqareh-xiinaytoy *kirar gabat haay, aagaruk magaalat meekit. Kirar uguraay gad ab. Tonnal koo kassitelon» teetik axcelon.

¹⁷ Woo malcina-tabanih sanatak lakal, YALLI Suur-magaalah-mari abak yen tellemmo abitay ken axcele. Addunyâ-bagul tan doolatwah isi nabsi kirah aceele.

¹⁸ Tohuh tellemmot geyta maksab yenek, taamat geyta lakqo tenek, magaadanat madaanisaanay; YALLIH taamat assa'gidih, YALLA-yaqbude-marih meqe maaqo kee meqe sartan edde xaamelon.