Yasaqya 22 - NABUWWA KEE MALIKWA

YARUSALAAM MARIH GIDDINAAMAK TEMEETE FARMO

¹ Yalli, Sirri-goloh giddinaamak ruube farmo ah teeti. Sugay isin inkih qarwah amo akah tawqeenim macaay?

² Kaxxa waxxaqto elle takkeh tan magaalay! Kaxxa xongolo kee digir elle takkeh tan magaalay! Kok rabe mari way qeebit kok marabinna. Yekke carbih addat seefit kaadu marabinnon.

³ Sin abbobti inkih kuddeeh, qeebi abe'kal ken yibbixen. Xer ikkel kude marih agantah, siinik geen mara inkih yibbixen.

⁴ Tohuk gexxaamah excemii, «Kaxxa weeqah weeqam faxak, wonnah yok gaca. Anay yoo 'xica; inni maray rabehiyyah weeqay yoo inxica. Weeqe yoo makalina» exce.

⁵ Macaay inteenik, YALLAY Dagelta kinnih Nabaamak Nabahiyya ayro le. Too ayro xayyowtem able. Too ayro, Sirri-Golol kaxxa-waxxaqto kee ib-itqaay ummat badit edde tan ayrooy; gasoosa taddigilleeh, qaleela fanah catoh deerisan.

⁶ Qeelam-rasih-qaskar, faras amol anuk, gayse kee gaysê-baxa luk tamaateeh, faaris-gaariira luk tamaate. Kiir qaskar gooba luk tamaate.

⁷ Yuudâ-baaxoy niqmatak tanihiyya too naqboytit le faaris-gaariirak temeggeeh, faaris amot tan qaskar Yarusalaam magaalah culmah afal soolan.

⁸ Yalli, Yuudâ-mari reebuh luk sugem kale. Too ayro isin silac edde daanisan makdanat suge silac teyyeeqen.

^9-10 Yarusalaam magaalak bica faxxa gaso wagitten. Yarusalaam addal tan qarwa mangah takkeh gide lowten. Tiddigille gasoosa edde xissaana'gidih, qarwak tu'baxa tiggilen. Gubi kabu raaqa dorat lee akah gaabowtaah,

¹¹ duma suge dorih lee akah caxite wayta innah, magaalah addal dora bicsen. Takkay immay aham takke'gidih, naharal bicissa hayteh aracat sugusseh abtem, Yalla kinnim maloowinnitoonuy, kaa fan mawagitinniton.

¹² Too ayro YALLAY Dagelta kinnih, Nabaamak Nabahiyya iyyemii, «Weeqaay boogisa. Amo isinnik moolaay sartanah *qabuddat gaca» 'yaanam siinik iyye.

¹³ Siinih tu gactekii, Yalli siinik aba iyyem cabba hayteenih digir kee farcit culten. Laa kee illi usgudda hayteenih cado akak tokmen. Qinabak bicissen kamrih maqabat gacten. «Beeraak rabennok, a saaku nakamay naaqubay» inten.

¹⁴ YALLAY Nabaamak Nabahiyya isih yo'lih yaabeeh, iyyemii, «A umaanek rabba 'yaanam fan qafu mageyan» axcuk xiibite. Ah intam, YALLAY Dagelta kinnih, Nabaamak Nabahiyya.

YALLI SEBNA KEE ELAAKIM GIDDINAAMAK IYYEEMI

¹⁵ YALLAY Dagelta kinnih, Nabaamak Nabahiyya iyyemii, «Malik buxak abbah yan yaaloy Sebna deqsitahiyya fan gexay kaak intamaa,

¹⁶ ‹Fiiruk atu iyya is takkaleeh? Qalê-bagut fayya le'kket xissa kabri kok xisa intem iyyaay? A kabri daggasita kok intem iyyaay? Ku-buxah-mari akkel kabri maay lon?

¹⁷ Atu kaxxa numuh is lowta koo'mmay, YALLI ukkuqqa koo heeh baaxot koo qidele.

¹⁸ Ukkuqqa koo heeh, koqosoh innah kaxxam naba baaxok bagul koo qidu waa waqdi, kombobbolettooh, tokkel rabetto. Elle kaxxiinitak sugte faras-gaariira elle kok raaqele. Atu malik-buxak migaq baysa num kinnito!› kaak inxic» yok iyye.

¹⁹ YALLI kaadu Sebnak iyyemii, «Away lito abbootanak koo kaleleyyo; qunxa num akketto.

²⁰ Aham takku wayta saaku, Cilkiyyá-Elaakimiy yi naqasu kinnihiyyah seeceyyo.

²¹ Atu luk sugte dallaabiya kee bagi boor kaat heeyyo. Atu luk sugte abbootan kaah aceeyyo. Yarusalaam kee Yuudâ-rasuk abba kaa abeyyo.

²² Dawud nasab le malikih gubal, yaabbeeh yaysaabbe num kaa abeyyo. Usuk iyyeeh usuk madqem, gersi mari maciggiila.

²³ Siraq edde daabisan birtih innah, digga le aracal kaa daabiseyyo. Isi ahlih migaq kee kunnabna akkele» iyye.

²⁴ Takkay immay kay ahli inkih kay gaba wagta mara akkele. Quukah kay fillal gacelon. Quuka kaal akkelon.

²⁵ YALLAY Nabaamak Nabahiyya iyyamaa, «Toh takku wayta saaku, digga le aracal daabisen birta salaceleeh, too way usuk annikissele. Fillal kaak suge quuki radeleh, bayele. Tah intem yoo YALLA» 'yaanam iyyah yan.