Yasaqya 21 - NABUWWA KEE MALIKWA

YASAQYAL WACYI OOBE: BAABELON BAYELEM KAAH WARSE

¹ Yalli, badak garil tan baaxoy sahda dabaaqah elle deedaltahiyyah giddinaamak, ruube farmo ah teeti. Gabbi-qaxak tamaate caacoh innah, bacarih tan baaxoy sinam kaxxam akak meysittahiyyak tu amaatih able.

² Kaxxam uma wacyi yol oobeeh; ublem, ganoleelay gano abtahiyya. Qamalleelay sinam radda uble. «Qeelam maraw, qeebih gaba qida. Meediyah maraw, magaalat maro haa. Is sinaamal bahte umaane teetik gacseyyo» iyye anay oobbe.

³ Taham acsube waqdi, xagar yok kaxxa biyaakah biyaakita. Lacawat tan barrah innah biyaakita. Aytik oobbeemik meysi yoo tibbixeeh; intih ubleemik cunxita.

⁴ Cissit maan. Meysi xagar yok timlikeh. Bari yakkem assexeeruk suge'mmay, meysih axaxitak xiinam baahe.

⁵ Wacyih miiz missoysa able. Qibinah seenan fidisah able. Maaqo yakmeeniih, maqab aaqabih able. Too way, ‹Qaskar abbobtiy, uguta. Gob zeytit (saliidit) duuga› iyyan.

⁶ Macaay inteenik, YALLI yok iyyemii, «Dacayrih gacu waa num rub. Too num yabalu waamat yaabaama.

⁷ Tittak xaqut faras amot yan maray kulli num nammayhaytô faras gabat lehiyya kee, gaala kee danan amot yamaate mara yable waqdi, kaxxam cubbi abitaama. Yeey, kaxxam cubbi abitam kaal tan» iyye.

⁸ Dacayrih hee num iyyemii, «Yi amoytaw, kulli ayro akkel a fayya le aracih amol dacayrih asa. Bar kaadu dacayrih soolak xiina.

⁹ Away ken ableh anih: faras amot yan maray kulli num nammayhaytô faras gabat lehiyya yamaateh yan. Too waqdi, ‹Baabelon baateh! Oson yalla axcuk aqbuduk sugen duyye baateeh, riira tekkeeh baaxô-bagul qangalaylut tan› 'yaanam iyyen» iyye.

¹⁰ Yi maraw, daro caffak baxsan waqdi elle tuman innal, sin tumeeni'mmay, away Israayil doore Dageltay Nabaamak Nabahiyyak oobbe farmo siinih warseh an. Tama siinih warsem too xaagu.

EDOM SADDA FARMO

¹¹ Yalli Duumah deqsita aracih giddinaamak ruube farmo ah teeti. Edomuk num yoh seece. «Dacayrih yan numow, barak maca raqteeh, barak maca raqteeh?» 'yaanam iyye.

¹² Too waqdi anu kaal gacsemii, «Maaci maacisele'mmay, bari siinit qagtele. Ahak sa essertam tellek, uduuray esser!» kaak exce.

QARAB MARA SADDA FARMO

¹³ Yalli, Qarab marih giddinaamak ruube farmo ah teeti. Arhoh yemeete Dadan maraw, Qarab baaxok garbo elle tan aracal a bar anfiddigetton.

¹⁴ Teema mari, bakaarita marah lee baaheeh; maaqo gabat luk, dabboh ken fan yemeete marat garayen.

¹⁵ A mari akak yoowwem, seefiy ken edde qidaanam faxak sugeeni. Siiben seefik kudeenih yemeeten. Gaysê-baxay ken edde mudoonuh qalaamiseenik kudeenih yemeeten. Rada carbik addak kudeenih yemeeten.

¹⁶ Macaay inteenik, YALLI yok iyyemii, «Keedar deqsita kedo a saaku le nabna sanat addat gaba kalele.

¹⁷ Keedarah tooboke agiiray qeebi gayset abak sugtehiyyak dagoom raaqele. Ahat yabtam, yoo YALLAY Israayil doore Dagelta kinni» iyye.