Yasaqya 20 - NABUWWA KEE MALIKWA

QASUNUK YEN NABIH ASTA

¹ Assuuriyah malikih yan Sargon yecee amril, Assuuriyah qaskar abbah yen num Filistiin magaalay Asdood deqsittahiyya yibbixe.

² Sidiica sanatak naharat, YALLI, Amóx-Yasaqyak, «Ibat lito kabel kee ama xagaral lito *qabudda isik kal» 'yaanam kaak iyyeh suge. Too saaku usuk Yalli kaak iyyem oggoleeh, xagaral saro maleh ib-qassih gexak suge.

³ Asdood yibbixen saaku, YALLI iyyemii, «Yasaqyay yi naqasuh yanihiyya sidiica sanatah xagaral saro maliiy ibat kabella maliiy ibah gexe. Taham Masri kee Kuusut takku waytaamih asta.

⁴ Assuuriyah malik woo namma rasuk carbit yibbixe mara qasunuk beele. Qunxaamaay kaxxam inkih gambi qassih, iba qassih, deega qassih beeloonuuh, Masri mari qaybit radele.

⁵ Kuus kee Masril kibaal luk suge mari hagga axceleeh, niya keenik addigillele.

⁶ Too saaku Filistiin baaxoh badih dariifal yan mari iyyu waamah, ‹Assuuriyah malikik nee cateloonu inneh kibaal elle hayneh sugne marat tekkem wagitay. Hay, tahaysa anke kudnah nan!› axcelon» iyye.