Yasaqya 2 - NABUWWA KEE MALIKWA

WAY BAYE WAA WAGARI

¹ Aham, Yalli Yarusalaam kee Yuudâ-rasih giddinaamak Amóx-Yasaqyah-gabat ruube farmo. Too farmo intaamah:

² Tamaatu wayta ayroorah addat YALLIH Qibaadah-Qari elle yan qale kulli'kkek fayyah giffa axcele. Kulli qalek fayyah giffa luk raaqele. Kulli koomak fayyah giffa luk raaqele. Baadal tan ummatta tet fan amaatele.

³ Mango baaxol yan mari too saaku iyyu waamah, «Qibaadâ-Qari elle yan YALLIH-Qale fan nee beya» tittak axcelon. «Israayil ummat doore Dageltih-Qibaadah-Qari elle yan arac nawaqu wayna. Yalli tokkel isih faxem nee barsele. Usuk faxe gitat gexenno» 'yaanam axcelon. YALLIH-baritto elle tanim, Yarusalaam magaalaay; Siyon qalek isi ummat lih yaaba.

⁴ Mango doolatwah fanat bica abeleeh; baaxooxal yan tittin-way bicsele. Qeebi edde abak sugen seefwa buqre edde aban biriitah korselon. Qeebi edde abak sugen macaxu caxak luud edde yargiqen gileelah gacselon. Tahak wadir doolatwa gaaduh tittah magexxa; ahaysa qeebi tittat aboonuh masilaacsitan.

⁵ Tonnal hay! Yaqkuubuk rade maraw, YALLI neh yecee ifut genxa'gidih ama.

YARUSALAAMAL YAN UMA-DIINI

⁶ Yallaw, Yaqkuubuk rade isi marak texxeereh. Oson ayrô-mawqa le kabul yan mara kee Filistiinih yooboke mari ken barse baab taamah haysiten. Isinni qaada cabba heenih marin qaadah tanim aben.

⁷ Ken baaxol dahab kee lakqo kibuk tan. Oson yedderen duyye kaxxam mango. Ken baaxol mango faaris yan. Oson lon gaariirak loowo matamixxiga.

⁸ Ken baaxol xeet kee cooxuk bicsen duyyeeyay yaqbudeeni kibuk tan. Too duyyey isinni gabak bicseenihiyya yaqbudeenih, gabat oren duyyeh gomboh radan.

⁹ Tohih sabbatah kulli num keenik qaybit radeleeh, gaca mara akkelon. YALLAW, keenih maracmatin.

¹⁰ YALLA kee kay kaxxa nabnah meysih, xixxaq le qaleela kee baaxô-bagul dagen boodoodah addat ombooqora.

¹¹ Sahdâ-kaxxiina kee anaani gaba edde kalta wakti amaatele. Too ayro nabna luk raqtu waytam, dibuk YALLA.

¹² Macaay inteenik, YALLAY Nabaamak Nabahiyya ayro le. Too ayrot qande leemiiy kaxxiina kee qubbuy intam inkih wacarroysele.

¹³ Lubnaanal tan sariida kee Basan rasul tan garsa baysele.

¹⁴ Amo xer qaleela kee koomaamiiy,

¹⁵ xer ikkek yamaate mara akak yabloonuh bicsen fayya 'ta arooca kee megdebih bicsen gasoosa elle sugte baaxo booxah cabba heele.

¹⁶ Kaxxa nabna kee qaxa le maraakib finqisele.

^17-18 Sahdayti kaxxiina kee anaani gaba kaleleeh; Yallih aftok aqbuduk sugen xeet kee coox bayele. Too ayro nabna luk raqtu waytam, dibuk YALLA.

¹⁹ Usuk baaxo yasgayye'gidih yamaatu waa saaku, YALLA kee kay kaxxa nabnah meysih, ummat gablah addat tambooqorem kee booriimah addat tambooqorem akkele.

²⁰ Too ayro dahab kee lakqok bicsen duyyey yalla 'yeenih aqbuduk sugeenihiyya baaxot qideloonuuh; woo duyye elle qiden arac gablâ-kimbir kee hantuuti-dabqi akkele.

²¹ YALLI baaxo yasgayye'gidih yamaatu waa saaku, ummatta kaa kee kay kaxxa nabnah meysih, gabla kee booriima le qaleelah bagut ambooqorelon.

²² Tonna'mmay sahdaytuy rabah yakkehiyyal kibaal mahana. Sahdayti ma tuxxiq leh?