Yasaqya 19 - NABUWWA KEE MALIKWA

YALLI MASRI MARA DIGAALELEM WARSE

¹ Masri giddinaamak ruuben farmo ah teeti. YALLI qamburreh addat sissikuk Masri fan yamaate. Masri addal yalla 'yeenih aqbuduk sugen coox kee xeetik bicsen duyyeeya kay foocal axaxitele. Masri marak niya addigillele.

² YALLI iyyaamah, «Masri addal sahda kee sahda qeebih tittat ruubeyyooh; toobokoyta kee toobokoytaay, cuggaane kee cuggaane qeebih tittat ruubeyyo. Namma magaalah mara qaduwwih tittin amot heeyyo. Doolatwa tittat ruubeyyo.

³ Masri marih mala foyya abeyyooh, niya keenik aggileyyo. Yalla 'yeenih yaqbudeenimil cato esserelon. Ginnili kee kalluwallel fayu essereloonuuh, rabe marih roocaaniyyak, ‹Maca neh taysee?› 'yaanam axcelon.

⁴ Masri mara racmatta sinniih xuwaw sinni malikiy uma xintoh ken xiinisu waahiyyah gabal heeyyo. Aham intam yoo, YALLAY Dagelta kinnih, Nabaamak Nabahiyya» iyye.

⁵ Niil weeqaytih lee daggooweleeh, weeqayti ayrook ayro daggoowak daggooweleeh, ellecabol kafele.

⁶ Kanaalat gexxa lee ayrok ayro elle daggowtaamal abiceleeh, bayre kee qunga kafele.

⁷ Niil weeqaytih dariifal tooboke daro laqaymumteh kaffa 'teh baaxot radele. Coox edde yuysubuken siisa caacot gexele.

⁸ Niil weeqaytih kulluumuh xiinak suge mari boogiseleeh weeqele. Oson kullum edde abbaxuk sugen sabak kee gillaab foyya akkele.

⁹ Talbi-qaalak meqe sara bicisak suge marak niya addigillele.

¹⁰ Sara bicsa mara kee cawalah taamita mari abaanam waagiseloonuuh, niya keenik boolaatele.

¹¹ Xooqan magaalal yan doolat mari duquura. Masri-malikih fayu yecee marak kaxxa-mari tu xiqe sinni *fayu kaat aba. Masri malikik, «Nanu dumî-dabaanal Masril sugte ixxiga leela kee malikwah arac raaqise mara kinnino» iyyoonu anni'nnal yaaxigen!

¹² Masri malikow, ku tu-taaxaguy fayu koh acayuk tene mankel tan? Oson duudeenik, YALLAY Nabaamak Nabahiyya Masri marah loowam koh warsoonay.

¹³ Xooqan kee Mooful tan abbobti, duquurusen duquura. Sinam baaxo miraacisu waa mara ken tekkeleh sugte. Takkay immay oson too baaxoh mara makot been.

¹⁴ YALLAY Nabaamak Nabahiyya sahda badsa fayu yecee mara ken abe. Tohuk gexxaamah Masri mari baditit yaniih, yiskire numuy isi alliyoh bagul xiinah innah lagaq iyyen.

¹⁵ Gaddali akke kee, hinnay, baacoyta yakkeemih, hinnay kaadu, kaxxa num akke kee amixxige waa num yakkeemih Masri marak num tu keenih maxiqa.

MASRI MARI YALLIH QIBAADAT GACELE

¹⁶ Too ayro, Masri mari agbi innah gilic leela akkele. YALLAY Nabaamak Nabahiyya ken digaala'gidih gaba fakem yabloonu waan waqdi, cunxitelon.

¹⁷ Masri mari YALLAY Nabaamak Nabahiyya keenik abu waam kassa haan waqdi, Yuudâ-marak meysitelon. Yuudâ-marak xagarxagol kinni way meysitelon.

¹⁸ Too ayro, Masri addal tan koona magaalah addal Qibraan afat yaabelon. Wokkel yan mari Nabaamak-Naba-YALLIH migaaqal xiibitelon. Woo magaaloolik tiyak teena migaaqah «Baatî-magaala» deqsitele.

¹⁹ Too ayro, Masri rasuk gudet, YALLAY Nabaamak Nabahiyyah sadgat elle aban arac heelon. Masri cuduudul kaadu xeetik bicsen qamidduy kaa elle kassitaanahiyya heelon.

²⁰ Too aracay sadgat elle abaana kee qamiddi, YALLAY Nabaamak Nabahiyya Masril yaniimih asta akkele. Tokkel yan marat xukko takku waytaah YALLAL cato esseroonu waan saaku, wakiiliy ken catu waa keenih ruubele.

²¹ Tonnal, YALLI Masri marah ambulleeleeh; too waqdi kaa aaxigelon. Kaa yaqbudoonuh, sadgat kee mattaco kay migaaqal abeloonuuh; YALLAH nadri culeloonuuh woo nadri duuduselon.

²² YALLI Masri mara digaalele'mmay, sarrak ken aymaaqele. Oson kaal aduureloonuuh; usuk kaadu oson aban dooqa keenik oggoleleeh ken qaffoysele.

²³ Too ayro, Masri mara kee Assuuriyah marih fanat kaxxa giti gacele. Too namma rasih marak mariiy maral safarah gexeleeh, ken namma rasih mari titta lih YALLA aqbudelon.

²⁴ Too ayro, Israayil mari nabnah Masri kee Assuuriyah marat missoowele. Ta sidiica rasih mari addunyal enna 'ya marah barkat akkele.

²⁵ YALLAY Nabaamak Nabahiyya barkat keenit heeleeh, keenik iyyu waamah, «Masri maraw, yi mara kinnitoonuuh; Assuuriyah maraw, yi gabah taama kinniton. Israayil maraw, isin kaadu yi ikoyta kinniton» keenik axceleeh, barkat keenit heele.