Yasaqya 18 - NABUWWA KEE MALIKWA

KUUS MARA SADDA FARMO

¹ Ankacisey! Kuus weeqaytitteh qaxat raqta baaxoy galwah anay elle yantaabbehiyyak,

² doolat farmo baaha mari bayrek bicsen doonikit gacca 'yeh badal amaatele. Farmot sissiki maraw! Qande le doolat le maray xeeriih, tonnah kaadu, xagar arab akak xamciniih addunyal inkih akak meysitaanahiyya fan farmo beya. Ken baaxo weeqaytitte adda akak radde baaxo.

³ Baaxô-bagul yan maraw ankacisa! Qaleh amol qalaamat ugsoonu waan waqdi wagita! Baanta yaaguroonu waan waqdi oobbeya!

⁴ Macaay inteenik, YALLI yok iyyaamah, «Dabqih elle an aracal gacca exceh, dahan yan barih saldah innah tibbat ken wagta; laqo takke waqdi tan ayroh innah, tibbat ken wagta» iyyah yan.

⁵ Qinab xaylo yifiileenik duma, qobor radaah, qinab xaylo alayta saaku, Yalli, qinab caxah luud gilet elle yargiqen innal, ken argiqele.

⁶ Ken qaskarih raysi guma kee alluwwâ-gadda akkele. Ken raysa, cagay guma akmeleeh, alluwwa gilal akmele» 'yaanam iyye.

⁷ Toh tekke saaku, weeqaytitte adda akak radde baaxo le maray qande le doolat leeh, tonnah kaadu, xeeriih xagar arab akak xamciniih addunyal inkih akak meysitaanahiyya, YALLAY Nabaamak Nabahiyyah acwa baahelon. Woo mattaco Siyon-qaley YALLAY Nabaamak Naba elle yaqbudeenihiyya fan baahelon.