Yasaqya 17 - NABUWWA KEE MALIKWA

YALLI SUURIYA KEE ISRAAYIL RASU BAYSELEM WARSE

¹ Damaskoh giddinaamak ruuben farmo ah teeti. YALLI iyyemii, «Damaskoh magaala ahak wadir magaala matakkay abur akkele.

² Qarooqeril tan magaalooli abur akkeleeh; illi kee laa elle taloole baaxo akkele. Woo illi kee laa wokkek num maxiiriya.

³ Gasoosa maroh edde tan magaalooli, Israayilik bayeleh; Damaskoh-magaala amô-baxxaaqqa weele. Suuriyah marak rabak raaqe mari Israayil marak kaxxih dago mara akkelon. Taham intam yoo, YALLAY Nabaamak Nabahiyya» iyye.

⁴ YALLI iyyaamah, «Too ayro Israayil marih nabna gaba kalele. Xagar keenik boolatakaay qakkootak qakkootelon.

⁵ Israayil, daro elle tooboke baaxoy woo daro akak orbiseenihiyyah innah gacele. Refaayim Golo deqsitta golol sugte buqrey daro orbisa mari cabem akak yifiileenih foyyah raqtehiyyah innah gacelon.

⁶ Dago mari keenik raaqele. Israayil mari *daytuun caxay xaylo inkih akak ifiilla heenih, namma *daytuun akkeey sidooca *daytuun akke amot akak raqte akke kee, hinnay kaadu, gubi luddat dago xaylo akak raqtehiyya innah gacelon. Ah intam yoo YALLAY Israayil doore Dageltah yanihiyya kinni» iyye.

⁷ Too ayro sinam, Yallay kulli num ginahiyya fan wagteleh; Israayil doore Dageltay *Kudduusuk yanil kibaal haysitelon.

⁸ Isinni gabak bicsen aroocay sadgat elle abaanahiyyal kibaal haak maraaqan. Tonnah kaadu Aseera deqsittaamay yaqbudeenihiyyah astah heenih sugen gurumuuda kee, qaydarus elle qeerisan aroocal kibaal haak maraaqan.

⁹ Too ayro ken magaalooliy meqe innah gaso maroh edde heenihiyya, duma elle suge marih magaalooliy Israayil marak kuden waqdi garbo tekkehiyyah innah, foyya akkeleeh abuuruh raaqele.

¹⁰ Toh macah sabbatah akkeleemih inteenik, Yallay, kaxxa qale akah eleelitan innah aleelo siinih yakkeeh sin wadahiyya, hawwenteenih. Kaa cabba hayteenih, taahirik yan cooxu axcuk, isinni gabak coox tuysubukeenih, marin baaxok baahen coox tuysubuken.

¹¹ Woo coox daabissen ayrok ciggilta ayrot yambeeh qobor baaha way, akak orbissaanam manton. Takkay immay gadaama kee akak ure waan biyak siinih baahele.

¹² Ankacisey! Baadal tan ummatta, badal sabo raddaah bad haffita waqdi elle xongola'nnal, xongolta.

¹³ Doolatwa baddi haffoh innah habbuy inta. Takkay immay Yalli ken yassacakku waa waqdi, qaleh amok caacay baahe siisah innah, wadir gacelon. Silayti baahe caffih innah wadir aduurelon.

¹⁴ Bari yakke waqdi cunxo sinaamat qideloonuuh; maaci maacisa waqdi masugan. Ni baaxo buuba marih ellecabo tamah teetiiy; tamah keenit akkele.