Yasaqya 16 - NABUWWA KEE MALIKWA

MOOYAB MARAK NIYA TIDDIGILLEH

¹ Silaq deqsitta magaalak, bacarih tan baaxo tabak, acwah anaaqe gabat luk, farmô-mara Yarusalaam magaalal xintoh abbah yan numuh rubnam meqe.

² Qarwak xiiriyen qunxa-kimbiirih innah, Mooyab say-mari, Arnon weeqaytih-tabeenak xaqul, koboxut yan.

³ Farmoh ruuben mari Yuudâ-marak iyyoonu waanamah, «Abnam neh warisa; abtaanam nek inxica. Carra dahan elle yani'kkel xamcin iraawo qidda caxah innah, nee cataay; ku silaalol silaalinnay nee inxic. Nanu dabbô-mara kinninok, num nee akak gee waa ikket nee uqur.

⁴ Ku baaxol nanay nee inxicaay, nee bayisam faxa marak nee cata» axcelon. Xukko kee baati gaba kaleleeh; baaxooxa baysa mari baaxo cabele.

⁵ Tohuk lakal Dawuduk rade marak numuk teeni malik akkele. Usuk ummatta digga kee kacanut xiinisele. Cakkik tanim sissikuk abeleeh, qadlih taamitaanam kee taamite waanam cubbusele.

⁶ Mooyab mari kaxxiinah akah yani'nna noobbeeh, oson anaani kee kaxxiinah qubbuy iyya mara kinnoonum naaxigeh immay, ken tirtira foyya.

⁷ Tonna-leemiik, Mooyab mari keenit yakke taqabih weeqan. Kiir-Ceras magaalah addal yokmen meqe maaqo kassitan waqdi, yakkeenimiik weeqaanah, niya keenik taddigille.

⁸ Cesbon garit tan buqre kee qinab-buqrey Sibma deqsitta kafte. Mango baaxooxah abbobti woo qinab-cooxut teeqete. Woo qinab-coox duma yan saaku Yaqder deqsitta magaala fan gufak sugeeh, ayrô-mawqa le kabuk bacarih tan baaxo fan gufak sugeeh, ayrô-culma le kabuk kaadu, tonnah, Rabe Bad deqsita bad taturak sugen.

⁹ Tohuk gexxaamah, Yaqder-mari Sibmâ-qinabah akah weeqa innah, anu kaadu weeqah. Cesbon kee Elqaaleh ximo yok tamaate. Macaay inteenik, ummatta ruffo hayta daroy orbisaanahiyya mabla; ummatta ruffo haa kudaar mayan.

¹⁰ Mangom elle aabakuk ten baaxoh mari ruffa lem mali. Qinab elle aabakuk yen baaxoh mari gad abtam mali. Kamri akak bicsoonuh edde yaaqiten qinab mayana. Anu, oson wallitak abak yenen waxxaqto tibba hee.

¹¹ Tohuk gexxaamah, Mooyab kee Kiir-Ceras marah, bagi yok kaxxam qaadah.

¹² Mooyab mari dooqa elle aba'gidih, fayyat raqta aroocay qibaada elle abaanahiyya gexot taqbeloonu'mmay, tu edde mageyan.

¹³ Duma YALLI Mooyab marih giddinaamak ruubem, tama farmo.

¹⁴ Awayah tu gactek, YALLI iyyaamah, «Mooyab marih kaxxa nabna hununuh sidiica sanatih addat bayele. Mooyab maray manguk yenehiyyak dago mari raaqeleeh; woo mari boola le mara akkele» 'yaanam iyyah yan.