Yasaqya 15 - NABUWWA KEE MALIKWA

MOOYAB MARA SADDA FARMO

¹ Mooyab marih giddinaamak ruuben farmo ah teeti. Qaar kee Kiir magaalooli inki barih addat baateh! Too magaaloolil kaxxa haan yekke.

² Dibon mari qibaada-elle-aban-qale yewqeenih, sadgat elle aban aracih garil weeqan. Mooyab mari, Nabo kee Medabâ-magaalah-marah boogisaanaah rookitan. Rookah amo kee deben isinnik mooleenih.

³ Woo mari, gititteh addal, sartanah *qabuddat gaca. Magaalak maglallah yan arac kee qarwah amol yan mari weeqaah rookita.

⁴ Cesbon kee Elqaale-mari weeqat yan. Oson aban weeqi Yahax fan yontoobbe. Qaskar agantah axaxitteeh, niya keenik tiddigille.

⁵ Mooyab-marah afqado yok danantah. Macaay inteenik, yasillimem faxa mari Xooqar kee Qeglat-Selisiya fan kuda. Marak teeni weeqak Lucit fan beya gita gexan. Marak teeni anay fayya haak boogisak Coronyim fanah kudan.

⁶ Nimrim garil yen buyyi kafeeh, woo buyyih xaqul toobokeh sugte qayso laqaymumteeh anxaxinimik tu maraaqinna.

⁷ Tonna-leemik ummatta luk sugte duyye gabat luk Saagan deqsita Golo fan kudan.

⁸ Mooyab-cuduud guffa haa aroocal deero aba marih xongolo radda. Eglaayim kee Beer-Eelim magaalal deero aba marih xongolo radda.

⁹ Dibon magaalal yan dori qabalat qassoowe. Anu Mooyabah yooboke marah wohuk gacta umaane daanal abbixe. Tohumu, lubaakay raaqa mara selu waahiyya kinni.