Yasaqya 14 - NABUWWA KEE MALIKWA

ISRAAYIL MARI ELLE SUGE MARIN BAAXOK YENDEBBE

¹ YALLI Israayil ummattah racmateleeh, isih doorite mara nammeyhaak ken abele. Dabqah elle sugen isinni baaxol gacoonay ken axcele. Aki baaxok yemeete mari wokke ken lih angaleleeh, dabqah ken lih gacele.

² Gersi-baaxoh-mari, Israayil marah isi baaxo fan yaduureeni'gidih cato abelon. Tokkel, YALLI isi le baaxol, woo marak labim kee sayim Israayil marih buxaaxih addal taamitelon. Duma Israayil mara qeebit yibbixeh suge mari, ta saaku ken gabat antixibbixele. Tonnal Israayil mari duma keenit xukkutak suge marak reedah amol gacelon.

BAABELON MALIKIH BOOLATINO

³ YALLI, isin luk sugten biyaakak sin urseleeh; cisabbootiyyak amaanah sin xiinisele. Dirkih sin absiisak sugen gibdi taamak sin ayfoofele.

⁴ YALLI toh siinih abu waa waqdi, Baabelon baaxoh malik missilah haysittoonuuh, intoonu waytaanamah, «Racmatta sinni malik yinnikisseeh, ahaysa sahdat maxukkuta.

⁵ YALLI keeniy umeynitih yanihiyyah xintok gaba kaleh.

⁶ Ken malik ummattat naqabut xukkutak sugeh, akak yeyse baaxoh mara xakaake kalaamak maadayinna.

⁷ Taway ellecabol sahda inkih toffoofeeh ruffu 'teeh amaan geyteh. Kulli num ruffu 'yeeh gad abe.

⁸ Yinnikisse malikih rabah, saagan coox kee Lubnaan baaxol tooboke sariida ruffu 'teh, ‹Ahaysa atu rabteh ikkal, nee yargiqe mari mayan› iyyen.

⁹ «Akeeral yan mari Baabelon-baaxoh-malik yamaatu waa waqdi, kaa arcibisaana'gidih bical sugelon. Addunyâ-bagul yen saaku cayla-leelah yen marih-roocitte uguugutak, malikwâ-roocitte isi qarkaytok uguugutak, kaa arcibisaana'gidih bical gacelon.

¹⁰ Oson yakkeenimiik kaah seeceloonuuh, ‹Atu away nek kaxxih boolatteeh a saaku ni bis lito› kaak axcelon.

¹¹ ‹Luk sugte nabna gaba kalteh; ku massakaxxah kirar aagaruk sugeeni'mmay, a saaku ah kooy akeera gexe mara lih tan. Bagul akak tanim xaariyaay; xagaral kok luultem, baaxô-xaariya› kaak axcelon.

¹² «Maaci maacissoh cutuktaw! Elle sugte qaraanak radde! Duma mango baaxok qeebil teyseeh, a saakuuy baaxol radde.

¹³ Atuuy, isi-niyal intemii, ‹Qaran ewqeh abbootanah kulliimik daga raqta cutuukak dagal, dardaarinni korsil gaceyyo. Kilbat le kabut raqta angaaraw qalel malikih gaceyyo.

¹⁴ Qamburrek daga ciggiileyyooh, kulliimik daga raaqa Dageltah innah gaceyyo› 'yaanam inte'mmay,

¹⁵ toh makkinnay akeerak iqiyal rabe mara lih gacte.

¹⁶ «Rabe mari koo yable way wagga koo haak koo asseleeleqele. ‹A num baaxo asgayyuk yeneeh doolatwat meysi qidak yen num hinnaa?

¹⁷ Aham magaalooli bayisak sugeeh inkih tan baaxo abuur abe num hinnaa? Aham yoxen mara casbik awqe kalak sugeeh buxa gexe kalak suge num hinnaa?› axcuk sitta esserelon.

¹⁸ Addunyal sugga 'te malikwak kulli malikih kabrih garit, ken elle kassitan asta heeloonu'mmay

¹⁹ koh kabri madagaanaay; ku raysa caxak yirgiqen luddi innal baaxot qideloonuh, teetit ummatta aaqitele. Ku raysih bagul carbit rabte qaskarih raysitte gacele; sitta lih akeerak iqiya fan oobetton.

²⁰ Macaay intek, atu isi baaxo foyya abteeh; isi mara qide num kinnito. Tonna leemiik gersi malikwa elle yoogoqen innal matamoogoqa. Ku buxah mari inkih umaane leela kinnoonuuh; ken migooqa kassite way!

²¹ Masgaada qimbisa! A malikih xaylo, ken kaxxa abbobti abte dambik gexxaamah, ambaxele. Keenik num xintoh abba mayakkaay, hinnay kaadu, baaxô-bagul mango magaala maxisan.

YALLI BAABELON BAYSELEM WARSE

²² YALLAY Nabaamak Nabahiyya iyyeemih, «Baabelon magaalat qeebi abeh abur tet abba heeyyo. Migaq teetik bayseyyo. Addal teetik num maraaqaay, rooci-elli-haytaamak tu macaba. Taham intam yoo YALLA.

²³ Baabelon magaala inin dabqi abeyyooh, Baabelon elle suge arac xooka abeyyo. Baabelon magaala kullim duufut beya fiyeynat fiyeyyo. Taham intam yoo YALLAY Nabaamak Nabahiyya» 'yaanam iyye.

ASSUURIYAH MARA SADDA FARMO

²⁴ YALLAY Nabaamak Nabahiyya xiibiteeh, «Anu ucsubem abeyyo. Akkele akak excem akkele.

²⁵ Assuuriyah maray yi baaxol yanihiyya bayseyyo; inni qaleh amol keenit aaqiteyyo. Inni mara Assuuriyah marih xukkok ayyaaqeyyo; fillal keenik suge quuka keenik kaleyyo.

²⁶ Inkih yan baadak abam faxam tamahaay, baadal tan ummatta edde digaalu waa gaba fakeh» iyye.

²⁷ YALLAY Nabaamak Nabahiyya taham abaamal gaba kaleeh; ummatta edde digaalu waa gaba fakeh immay, aham abe kaa kaltam matan.

*FILISTIIN MARA SADDA FARMO

²⁸ Malik Acad edde rabe sanatat temeete Yallih-farmo ah teeti.

²⁹ Isin *Filistiin maraw, ruffu maxcina. Sin aatakuk suge birti yiddigilleh immay, abeesak teena rabtaamah wohuk gacta abeesa ciggiilele. Abeesa xalte naalaytih addak haada baadeysi awqele.

³⁰ YALLI isi marak masaakiinah yan marah, elle yaffoofen baaxo aceeleeh, amaanah xiinelon. Takkay immay YALLI, Filistiin maraw, siinil kaxxa qulul ruubeleeh, takkeenimiik too qululut ambaxetton.

³¹ Gasoosa maroh edde tan magaalooliy, boogisaay cato esserita! Filistiin maraw, takkeenimiik meysita. Kilbat le kabuk qamburre celta siisah innah tanim tamaate. Tohum, qaskaray bexxi addat akak ane waa.

³² Filistiin rasuk farmo baaha maral maca gacsenno? YALLI Siyon-magaala xiseeh, kay ummattay xukko elle tanihiyya tokkel amaan geeloonum keenih warsenno.