Yasaqya 13 - NABUWWA KEE MALIKWA

BAABELOONUH SADUH TAN FARMO

¹ Yalli Baabeloonuh giddinaamak Amóx-Yasaqyal ruube farmo ah teeti.

² YALLI iyyeemih, «Tu elle aabuke wayta qaleh amol, qeebi yanim elle yaaxigen qalaamat hayisa. Makaabon elle tani'kkel gaaboowaana'gidih, qeebi abtu wayta qaskarah amri ucuya. Qeebi aboonu waanamih astah gaba ken fan fayya hayisa.

³ Anu innih, yi bagcarra yaybulleeni'gidih, celeemah tan yi qaskaray yi taamah doorehiyyah seece. Oson yi iisa yafrice mara kinnon» iyye.

⁴ Qaleh amok rada anay ankacisa. Mango maray gaaboowehiyyah anay kee, gaabowte doolatway waxqaxitahiyyak anay rada. Nabaamak Naba YALLI, mango qaskar qeebih bical haa.

⁵ Inkih yan baad baysaana'gidih, YALLA kee, isi bagcarra gabat le qaskar baad edde yaadiye xer baaxok yamaaten.

⁶ YALLIH ayro amaatelek, boogisa! Qande le Dagelti baati edde baahu waa ayro xayih.

⁷ Too ayro kulli numih gaba axaxiteleeh, kulli numuk niya addigillele.

⁸ Yakkeenimiik wariggiteloonuuh; biyak ken abbixele. Xalay edde xayyoowe barrah innah emreqeeqedelon. Wariggah mariiy mara keenik wagga heeleeh wacarriyih fooci keenik gombod ceelele.

⁹ YALLIH ayro amaatele. Toh, Yallih-naqabuy kaxxam gibdi edde yakku waa ayroy racmatta sinnihiyya. Dambi elli haa mari inkih bayeleeh, baad abuuruh raaqele.

¹⁰ Cutuuka kee cutuukah-egla ifak maraqta. Ayro tawqe waqdi dattoowele. Alsa kaadu ifu cabele.

¹¹ Yalli annah iyye. «Ken umaaneh sabbatah, baadal bala oobiseyyooh; umaanet asa mara ken umaanek gexxaamah digaaleyyo. Kaxxam isit yakkale mara ayqunxeeyyo; racmatta-maleelay anaani lehiyya ramma heeyyo.

¹² Tohuk saaboh raaqu waa mari, agle sinni dahabay kulli waqdi geytime waa akkele.

¹³ Yoo YALLAY Nabaamak Nabahiyya bagcarritu waa saaku, qaran axaxiteleh, baaxo elle sugte aracak angayyele.

¹⁴ «Loyna sinni illi elle fixixe'nnal, fixixelon. Admoh yemeete marak sageeri elle kudda innal, kulli num isi baaxo fan kudeleeh, isi mara fan gacele.

¹⁵ Geyinnaan num gilet qideloonuh; yibbixen mara seefit qidelon.

¹⁶ Xaylo oson abalih ken foocal duubuyak qidelon. Buxa keenik buubelon; agabu keenik cayliselon» iyye.

¹⁷ YALLI kaadu iyyeemih, «Baabelon yabbixeeni'gidih, Meediyah-maray lakqot tu wee waah dahab yeceenimih ayra oggole waahiyya keenit ruubeyyo.

¹⁸ Ta mari gayse kee gaysê-baxat furrayna qidele. Salaadah maracmataanaay qunxa urruh maxuwaawan.

¹⁹ Baabelon magaala, baaxooxak inkih qaxah tayse magaala. Tet mari teetit kaxxam yakkale. Takkay immay anu Sodom kee Gomorrak akah abe innah, deerik afah tet koriseyyo.

²⁰ Sahdayti sarrah, dabqih teetil magacaay; sahda elle gace wayta abuuruh raaqele. Gexak yemeete Qarabtoyti siraq teetil maha. Illi le num illi teetil mayayloola.

²¹ Dubaali dabqih elle yaniih, inin qarwa elle xissita arac akkele. Goroyyak dabqi akkele; dabeeli-ceelo le ginni addal akak meekitele.

²² Teetil tan qarwa kee doolat buxaaxil yangula kee wakrih anay qalê-berri innah elle xongolele. Baabeloonut wakti yemeeteh, ahaysa kaxxam masugta» iyye.