Yasaqya 11 - NABUWWA KEE MALIKWA

AMAAN LE XINTO

¹ Yiisak rade maray malikwâ-nasab le, yirgiqen caxah buxuxih bis aallele. Takkay immay woo yirgiqen caxah buxuxuy saaboh raaqehiyya saadeleh, caxah-ramiidak luddi awqele. Yiisak rade marak qusba malik tonnal awqele.

² YALLIH *Roocaaniyya kaal gaceleeh; kas kee ixxigaay, fayu kee dudday isi ummatta edde xiinisu waahiyya kaah aceele. Tonnal YALLIH fayxi aaxigeleeh kaa aynabele.

³ YALLIH amri duuduseleeh; kaa aynabuk kay amri duudusaanamat ruffu axcele. Num irok elle yable innal kay adda aaxige'kal, wonnaay annah yan numu mayya; hinnay kaadu, marin-texce-texceh kaal mayackuma.

⁴ Masaakiinah cakkik-yan-cokmi ackumele. Tu-maleelah cakkik-tan-mekla abele. Iyyem akke leh: digaala elle amrise mari diggalsimeleeh umeynit ambaxele.

⁵ Isi mara qadli kee nummâ-bagul tan xintoh xiinisele.

⁶ Too saaku, suula kee illi amaanah titta lih xiinele. Kabqi wadar lih xiinele. Rugaage kee lubak xaylo kee aroode saqi titta lih aseleeh, awki-baxa kinni way ken dacayri duudele.

⁷ Laa kee kabqi titta lih aloolele. Laahi-xaylo kee kabqî-xaylo titta lih gacele. Lubak laahi gurral aloolele.

⁸ Cambabbariya awki abeesâ-boodoh amol digreleeh; qunxa-urri afat summi le abeesas xagaamah keenil bahtu waytam mali.

⁹ Lee bad akah kibta'nnah, Yalla yaaxige mari inkih tan baaxo kibeleemih sabbatah, Yallih qaley taahirik tanihiyyah amol sahda biyaaku waah meqem bayisu waa num mayana.

¹⁰ Too ayro Dawud abbah yan Yiisak rade num, baadal tan ummattah inkih asta yakku waa simbil akkele. Mango mari kas kee fayu kaak beetelon. Usuk elle yan ikkel muxxo le nabna gacele.

MARIN BAAXOL SUGE MARI ADUURELE

¹¹ Too ayro YALLI qagisak isi-qandet isi-maray baatik-saaboh-raaqehiyya le baaxol gacsele. Assuuriya kee Masriiy; Fatros deqsita aracay Masrik gabbi-qaxat raaqahiyya kee Kuusuuy; Qeelam kee Baabelon baaxooy; Camat kee baddi dariifal tan baaxooxak ken baahele.

¹² Yalli, asta-yakku-waa-qalam baadal-tan-ummattah heeleeh; Israayil kee Yuudâ-maray fixixeh sugehiyya baadak affara kaalibik gaaboysele.

¹³ Israayil ummatta Yuudah lon kuuxewaynaan kee naqabu cabelon. Yuudâ-mari kaadu Israayil marah kuuxewaynaan kee naqabu bagut maha.

¹⁴ Oson titta geyya heenih ayrô-culma le kabul tan Filistiin-ummattat qeebi abeloonuuh; ayrô-mawqa le kabul tan ummatta kaadu buubelon. Edom kee Mooyab-ummattak qeebil ayseloonuuh; Qammon-ummatta ken yab oggolelon.

¹⁵ YALLI, Qasa badih exxay Masrit xayihiyya bayseleeh; Furaat weeqaytu kafsa'gidih laqin caacay ruubele. Ummatta ibah akak tabta'gidih kaxxam qunxaamak malcina buyyi raaqele.

¹⁶ Yalli, isi-marak saaboh raaqe marah, duma Israayilih Masri rasuk akak yawqen gita elle bicse innal, keenih kaadu Assuuriyah rasuk akak yawqen gita bicsele.