Yasaqya 10 - NABUWWA KEE MALIKWA

¹ Woyyow siinit takku waytaamow! Qadlit mataamittaanay, yi ummatta biyaakittaana'gidih, gitah ane sinni madqa abtan.

² Tu maleelah le cakki mataaxigan. Ken cakki ken geyi mahaytan. Xukko elle tan marah cakki mabtan. Gubun kee qayxiixah im gita maliinot beytan.

³ Hay, Yalli sin digaalu waa saaku macaa abetton? Yalli xer baaxok temeete bala siinil oobisek, maca abetton? Catoh iyya fan ardetton? Teddereenim anket aaquretton?

⁴ Carbit ambaxe kee casbit yan marih innah seewah sin bee akkelon. Tohuh, Yallih naqbi maxamcaay, ken edde digaaluh ruube gaba wadir magacsa.

ASSUURIYAH MALIK YALLI SINAM EDDE DIGAALA CAXXA YEKKE

⁵ YALLI iyyeemih: «Woyyow, Assuuriyat takku waytaama! Inqibe mara edde digaalu waa caxxih aftoh Assuuriya liyo. Yi bagcarra, gabat le caxxa keenik tan.

⁶ Assuuriyah-mara, Yalla-maleelay yoo bagcarrissehiyya edde digaaluh ruubeyyo. Ummatta radoonuuy ken garqoonuuy, tonnah kaadu, gital sugte guddaafah innah taqqa keenit iyyoonuh ken ruubeyyo.

⁷ «Assuuriyah malikih tu gactek, isi bagul malseemih amol yaniih, mango baaxo baysam faxak yani'mmay,

⁸ annah axcuk tirtirisaah, ‹Yi qaskarih abbobtik kulli num maliki.

⁹ Kalnu kee Karkamis magaalah marak carbil eyseh. Tonnah kaadu Camat kee Arfad magaalah marak carbil eyseh. Samaariya kee Damaskoh magaalah marak kaadu eyseh.

¹⁰ Yarusalaam kee Samaariyak fula, muxxo le yallitteh-ceelo yaqbude doolatal gaba heeh ken ibbixe.

¹¹ Samaariya kee tet addal yaqbuden yallitteh-ceelo bayseeh; tonnah kaadu, Yarusalaam kee tet addal yaqbuden yallitteh-ceelo bayseyyo› axcuk tirtirisa» iyye.

¹² Tonna-leemiik, Yalli Siyon-qale kee Yarusalaamal abah yaniimik gaba kalu waa saaku, Assuuriyah malik abah yan tirtiraay leh yan kaxxiina kee hidak gexxaamah kaa digaalele.

¹³ Assuuriyah malik, «Abba heem inkih inni qandet abeeh, qandeey kas kee bagi cubbi liyooh, ummatak qeebil eyseeh, inki ikkeh ken gacse. Oson daaniseenih sugen duyye keenik bee» axcuk tirtiriseh. Tonnah kaadu, «Wokkel tan malikwak, celem akah aba innah, amot taqqa exceh gexeeh,

¹⁴ baaxol enna 'ta doolatwa kimbiro qari gideey, oson edderra heenim, naala elle gaaboysan innal, taqabi sinnim gaaboyse. Faxe qawi gali masgayyinnaay; faxe qawi af fakaamah yot kaayu malliilinna» axcuk tirtirisa.

¹⁵ Takkay immay godma gabat tet le numuk nabiyoh intam bictaa? Miisar tet gabat le numuy duyye teetit yargiqehiyyak maay yayse? Gabâ-caxxi num mayakkuqa; num gabâ-caxxa yakkuqe ikkal.

¹⁶ Tonnal hay, YALLAY Dagelta kinnih, Nabaamak Nabahiyya kay qaskaray masu nabahiyyat xagar selta dalka ruubele. Usuk le massakaxxak gubal xagarat urta giray baruge waytahiyya ruubele.

¹⁷ Yallay Israayil ifuh yani girah innah akkele. Israayil doore Dageltay *kudduusuk yanihiyya habug inta giray inki ayroh addat eqeb kee sibaasib cararissa akkele.

¹⁸ Mango coox le garbo kee baqurê-baaxo agantah, uma dalka sahda elle baysa'nnal, baysele.

¹⁹ Dago cooxuy qunxa urri kinni-way loowo akak yaaxigehiyya raaqele.

DAGO MARI YUDUUREH

²⁰ Too ayro, Israayil marak raqte saabo, ken bayse maral kibaal mahaysitta. Oson nummaak kibaal elle hoonu waanam, YALLAY Israayil doore Dagelta kinnihiyyay *kudduusuk yani.

²¹ Israayil-marak baatik saaboh raaqe mari, isi Dageltay qande lehiyyal aduurele.

^22-23 Away Israayil mari mangah baddi afih qiddeh gide yakkeemih dago mari aduurele. YALLAY Dagelta kinnih, Nabaamak Nabahiyya inkih tan baaxooxat «Abeyyo» iyye baati elle inxicci 'ye innal abe leemih sabbatah, Israayil-ummattat «Abeyyo» iyye baati bical taniih; a baati keenih elle taguude innal keenit akkele.

YALLI ASSUURIYAH UMMATTA DIGAALELE

²⁴ Tonna'mmay YALLAY Dagelta kinnih, Nabaamak Nabahiyya iyyaamah, «Yi-ummattay Siyoonul tanihiyyaw, Assuuriyah-marak mameysitina. Dumî dabaanal Masri mari akah abe innah siinit xukkutaanamah mameysitina.

²⁵ Tah akah axcem, siinit liyo naqbi xayih gaba kaleleeh; yi bagcarrat ken bayisu waamih sabbata.

²⁶ Yoo, YALLAY Nabaamak Nabahiyya duma Miidiyan-mara Qoreb-Xixxaq deqsita aracal oogoreh eneeh, Assuuriyah mara kaadu inni keetalat aagureyyo. Masri mara bad fanah caxxa escesse waqdi elle digaale innal, Assuuriyah mara digaaleyyo.

²⁷ Too ayro Assuuriyah marih gabak sin ayyaaqeyyooh, sunkul siinik abbaxuk sugen quuki siinil maraaqa. Kaxxam filli-cayla litoonumih sabbatah, fillal siinik haak sugen *madmad aggilele.

KEN NAQBOYTIT BAAXO KEENIK TIBBIXE

²⁸ Naqboytit qaskar Qaay deqsitta magaala yibbixeeniih, Migroon magaalak tatreenih gexen. Sakayi Mikmas magaalal caben.

²⁹ Qaleelak tabeena tatreenih gexeeniih; «Bar xiinih Gabaq deqsita arac orbenno» iyyan. Raamâ-magaalal suge mari wariggiteeh; Malik-Saawul-magaalay Gibqa deqsittal suge mari kude.

³⁰ Gallim magaalah maraw, deero aba. Laysah maraw, ankacisa. Woyyow, Qanatot maraw!

³¹ Madmenâ-mari kudmat yan. Geebim mari kaadu kudmat yan.

³² A saaku naqboyti elle anfiddigelem, Noob magaala. Tokkeek Siyon-qaley Yarusalaam magaalal tanihiyyal meysissoh feera ascasselon.

³³ YALLAY Dagelta kinnih, Nabaamak Nabahiyya, isih qandey kaxxa cunxo sahdat qiddahiyyat caxak yirgiqen luddi innah ken baysele. Ken addak kaxxiina kee nabnah lafitta 'ya mari bayeleeh qaybit radele.

³⁴ YALLI, caxa godmat elle yargiqen innal, ken argiqele. Cooxuk inkih yayse Lubnaan cooxih innah radelon.