Yasaqya 1 - NABUWWA KEE MALIKWA

¹ A kitaabal tanim, Yuudâ-rasu kee Yarusalaam magaalal tan ummattah Yalli, Amóx-Yasaqya le kabuk ruube wacyi. Yalli a farmo ruubem, Quddiyya kee Yootamaay, Acad kee Ciskiyyaahu deqsita mari malikwah suge dabaana.

YUUDAL XINTO AKAH SUGTE'NNA

² YALLI iyyeemih, «Sin lih yabtem, YALLAK; qaran kee baaxoy, ankacisa. Anu innih qarise urri yab yok cineh; xaylo yoo cinteh.

³ Laahi is le mara yaaxigeeh; danoona ken yeddere mari qayso keenih elle yecee arac taaxigeh immay, Israayil maray yi mara kinnihiyya ta gide yaaxagu yeffereh. Tahat radoonu cineenih» iyye.

⁴ Dambi-le-ummattey, mako-le-maray, umaane-raceynittey, taama akak toome urrow, YALLA cabba hayteenih, Israayil doore Dageltay *kudduusuk yanihiyya bursutteenih darre kaat cabten.

⁵ Yalli faxe waamak macah aade waytan? Uxih digaalak macayyinnitoonuu? Moyya siinik uxih bakaq leeh; afqado kee misinkaca ahaydumah siinik muurinna.

⁶ Ibak lifiqiiy amok xagortah amma 'yaanam xagar inkih siinik biyak le. Inkih yan xagaral siinik wara kee daleeli yan. Ahaydumah liton dale af kaawut leeh, nadiifik tan baasima akah magenniton; dayla akah magenniton.

⁷ Elle sugtan baaxo siinik baateeh, magaalooli siinik cararteh. Isin abalih, marin mari tubqureenim baysaah, baaxo siinik abur aban.

⁸ Yarusalaam, gubbil xisen daboyta kee cabcab elle yooboke aracal xisen seenan-qari kee naqboytit maraasiye magaalah innah, dubuk tekke.

⁹ YALLAY Nabaamak Nabahiyya, Yarusalaamal yekkeh yan wararak marak garabak rooci cate waamal, Yarusalaam magaala Sodom kee Gomorrak kaxxih, inkitanuuk baye rarte.

YUUDÂ-MARI DIINI-CAAGIDIL AGAAGUL LUK SUGE

¹⁰ Sodom marih bis le reedonow, YALLI siinik iyyam ankacisa! Gomorrâ-marih bis le ummattey, ni Dagelti siinik aba iyyam oobbeya!

¹¹ YALLI iyyamaa, «Isin, ‹Yallah abna› axcuk abtan mango sadgoota yot tu xiqtam maay takkalen? Isin, sadgatah abna axcuk, cado akak cararissan illih sadgat kee aroodissen saqih xayta akak carrissan sadgatak cayyeh. Laa kee illi kee wadar qabalay kulli way caxxaanahiyyat ruffu maxca.

¹² Yoo taqbudeeni'gidih yi foocal temeeten waqdi, yi qarih addal annal iqita iyyi siinik iyye?

¹³ Abba haytan sadgat inkih siinik foyya. Isin rubtan qaydarus niqibyooh; tohuk kalah kaadu, alsi bila waqdi abtan qiid kee sabti ayroh abtan qiid kee diini migaaqal abtan gaaboowiyyi inkih, abtan dambik gexxaamah nadaasa yekkeh; siinik mafaxa.

¹⁴ Alsi edde bile ayroh abtan qiid kee tangoorowen ayro abtan qiid siinik baguuk niqibyo. Isin edde assen qiid quuka yol yekkeh; ahak wadir annah tanim ablem maxiqa.

¹⁵ Dooqah kulli way gaba fayya haytaanamah gaboobi siinik qabalat tutlukeh tani'kkal, siinik moggolaay racmatta le intih sin mabla.

¹⁶ Xagar isinnik taahirroysay, tahaysa taahirik yan mara takkeenimi. Anu abah sin able uma taama caba. Umaane maabina.

¹⁷ Meqem abtaanam barita. Qadlih tanim aba. Sahda maskintut xukkutte kala. Qayxiixah cakki qayxiixah ixiga. Gubuunuh cato tika» siinik iyya iyye.

¹⁸ YALLI qagseh iyyeemih, «Tahaysa yol amaay, tahat itta lih yaabenno. Isin abten dambit kaqalteenih immay anu woo dambik sin kaqliseh cankaxi qidih innah sin heeyyo. Dambik abteenimih mangah xagar siinik yoomeh yani'mmay, qado illi xagoorih innah akak gacetton.

¹⁹ Isinni fayxiik dibuk yi amrih gacteenik, baaxok tooboke daro kee caxâ-miruk aysinnaanim sinim akkele.

²⁰ Takkay immay yi yab cinteenih a umaanet gexak raqteenik, carbi siinit akkeleeh edde bayetton» iyyah yan. «Aham siinik intam yoo YALLA» iyye.

QADAALAT MAYANA

²¹ Duma Yallal teemene magaala a saaku xiiqareh xiinah caalat bahteh tan. Duma qadli le xintoh xiinak cakki-taamah taamita mari teetil yene'mmay, a saaku biileenit teetil raqte.

²² Yarusalaamey, duma lakqoh innah fula luk sugte'mmay, a saaku foyya tekke. Duma qinabak bicsen maqabih tamu luk tene'mmay, a saaku foyyâ-lee tekke.

²³ Ku addal abbobtih yan mari qamallitte yekkeeniih, siftâ-kataysiisih yanin. Oson kulli way guqul yakmeeniih, cokmi-aracal qayxiixah le cakki mayaaxigaanaay; gubuunut tekkeemih adda mawagtan.

²⁴ Tonna'mmay YALLAY Nabaamak Nabahiyya, Israayil doore Dageltay Mulki le kinni. Kaay Goytah yani iyyam leh, «Yi naqboytiitey, ahaysa cane siinil gacseyyooh; tahak wadir taqabi yol matakkan.

²⁵ Amah siinit macabaay, liton nadaasak sin kaqliseyyo. Saabunut kaqlisen saroh innah nadaafatah sin heeyyo.

²⁶ Duma luk sugten abbobti kee makaabonuh bis le mara sin addal heeyyo. Tonnal Yarusalaam magaala cakki leeh, imaan Yallal le magaala akkele» iyyah yan.

YALLIH DIGAALA

²⁷ Yalli qadli kee cakki leemih sabbatah, Yarusalaam kee tet addal yan maray toobite waddiimele.

²⁸ Takkay immay YALLIH yab cina maray dambit asahiyya baysele. Kaa cabba hee mara selele.

²⁹ Too saaku, Yallih aftok xeet kee cooxuk bicseenim elle taqbuden ikkel dooritten garsa kee bustaanat nadaamitetton.

³⁰ Laqaymuume coox kee lee sinni bustaan innah gacetton.

³¹ Caffaytu girat qidan way elle carara innal, cayla leela isinni uma-taamat cararele. Ta baatik num sin macata.