Yacedkel 9 - NABUWWA KEE MALIKWA

YARUSALAAM MAGAALA DIGGALSINTE

¹ Tohuk lakal Yallak kaxxa xongolo yol radde. Ta xongolo, «Magaala digaalu waa maraw, annah ama. Kulli num isi silac gabat luk siinik yamaatay» axcih oobbe.

² Tonna luk Yallih Qibaadah-Qarik kilbat le kabut raqta kaxxa afay akak culaanahiyyak lica numuy silac gabat le culah uble. Ken lih *baftak bicsen meqe sarot sartanah yan numuy kutbe elle aban duyye gabat lehiyya uble. Amma 'yeeniih, nacaasak bicsen sadgat elle aban aracih garil soolen.

³ Too waqdi Israayil doore Dageltih nabna yaybulle ifuy diifu le, naharak elle suge galwa-leemih amok katta 'yeh, Qibaadâ-Qarih culma fanah gexah uble. Sarrak YALLI, taaxige-meqe sarot-sartanah-yan numuy gabat kutbe elle aban duyye lehiyyah secca 'yeh,

⁴ «Ama Yarusalaam magaalak rike macabinay, adda akak tabba 'xicaay; addal teetik yakkeh yan umâ-yabulik gexxaamah, bagi keenik ankakammuk cisabboote marak qansak bagul asta hayis» iyye.

⁵ Sarrak kaadu taaxige-lica-numuk, «Isin magaalah addak usuk gexinnaan ikke kaa'lih gexaay kulli num qida. Numuh maracmatina; numuh manacruurina.

⁶ Idoola takku, furrayna takku, baxuw takku, inonti kee xaylo takku, tu macabinay sela. Takkay immay qansal asta le mara maxagina. Taway yi Qibaadah-Qarik foocal yan marak qimbisaay sela» iyye. Too mari qidim Qibaadâ-Qarik foocal suge makaabonuk qimbisen.

⁷ YALLI kaadu qagseh keenik iyyeemih, «Hayya hay gaba qida. Qibaadâ-Qari nadaasa aba. Daarat raysak kiba» keenik iyye. Oson too waqdi magaalah addal yan maral qidiyyah gaba heen.

⁸ Qidimih gaba heen waqdi, anu dibuk wokkel sugeeh; too waqdi baaxok bagul gomboh radda exceh deero abe. «YALLAW, Mulki le Dageltaw, Yarusalaamah abta bagcarrat Israayil ummatak raqte saabo seltaa?» exce.

⁹ YALLI too waqdi yok iyyeemih, «Israayil kee Yuudâ-mari kaxxam gibdi dambi baaheeh; rasul ummat annaak qidaanam baaheeh; Yarusalaam baatilik dabaq aben. Yi giddinaamak, ‹YALLI ahaysa ni baaxo cabeh ikkal, nee mayabla› iyyan.

¹⁰ Tonna-leemiik tahak wadir keenih maxuwaawa; keenih manacruura. Oson sinaamal baaheenim keenil baaheyyo» yok iyye.

¹¹ Too waqdi taaxige meqe sarot sartanah yan numuy kutbe elle aban duyye gabat lehiyya yuduureeh, «Yoo akah amrisseemik gaba kaleh» 'yaanam iyye.