Yacedkel 8 - NABUWWA KEE MALIKWA

YACEDKEL YALLAK YUBLE WACYIK NAMMAYHAYTOH EXXA ( ) YARUSALAAMAL ABAK SUGEN DUYYÊ-QIBAADA

¹ Seewah nee edde been laceyhaytô-sanatak laceyhaytoh alsak konoyhaytoh ayrot, Yuudâ-baaxol yok kaxxih seewah been idoola lih, inni buxah addal malâ daffeynat an waqdi, Mulki le Dageltih qande garcik yol obte.

² Annah wagga hee waqdi, girah innah urtaamay sahdayti ceelo lehiyya uble. Xonkook addah yan xagar kaak gira ceelak yeneeh; xonkook daga raaqa xagar, dugga heenih yisiffiyen nacaas innah, liliq axcuk yen.

³ Gabah innal tanim yoo fanah ruubunteeh; amô-xagor yok tibbixe. Too waqdi suwaawur gurral, Yallih Roocaaniyya qaran fanah yoo teyyeeqeeh; Yarusalaamak kilbat le kabuk yamaaten waqdi, Yallih Qibaadah-Qarik adda akak culan afa yoo bahte. Tokkel gabat bicsen duyyey yallah loonuhiyya fanah yoo bahte. Yallih naqabu bahtem, too duyyek ten.

⁴ Tokkel kaadu duma Kabar deqsita weeqaytul an waqdi akah uble'nnah, Israayil doore Dageltih nabna yaybulle ifuy diifu le uble.

⁵ Too waqdi Yalli yok iyyeemih, «Bani-adantow, kilbat fanah wagga heey» yok iyye. Wagga hee waqdi Qibaadâ-Qarih culmeynak garil, sadgat elle aban aracak xaqut, too xeet kee cooxuk bicsen duyyey Yalli niqbahiyya uble.

⁶ Too waqdi Yalli yok iyyeemih, «Bani-adantow, ama'kkel takkem tablee?» yok iyye. Qagissa heeh, «Israayil mari aba qaybih tan taama ubuley. Tama table qaybik gexxaamah, yi aracay taahirik yanik yoo yeyxeereenih. Ahak sarra amahak gaca qaybi elle yakke arac abletto» yok iyye.

⁷ Tokkek daarat akak culan afa yoo yuybulle. Woo daaratih gidaar-bagut tan booha yoo yuybulle.

⁸ Sarrak, «Bani-adantow, ama boohak af meqe'nnah eynebba hayis» yok iyye. Woo boohak af eynebba heeh cule waqdi, qari afa uble.

⁹ Sarrak, «Tama afaak culay addal takke uma taama kee qaybi wagit» yok iyye.

¹⁰ Adda culeh wagte waqdi, gidaarak bagul Israayil mari yaqbude duyyeh tasaawiriiy, caraamak tan alluwwa kee, kalah kaadu, garbah baaxok bagul gexxa alluwwah tasaawir uble.

¹¹ Too saaku too duyye aqbuduk sugte Israayil idoola, Safán-Yaadanya deqsita num edde anuk, tokkel malcina-tabanih num akkuk yenen. Kulli num keenik qaydarus elle ruuban girgira gabat luk yen. Too girgiraarik qer awaquk yen.

¹² Too waqdi Yalli yok iyyeemih, «Ama Israayil idoola sirrit abta taama tablem hinna? Tasaawirik kibuk yan qarih addat duyye yaqbuden. Oson tah akah abaanam, ‹YALLI a baaxo cabeh ikkal, nanu sirrit abnam nek mayabla› 'yaanama» yok iyye.

¹³ Yalli kaadu qagseh yok iyyeemih, «Uxih ahak gactam abah ken abletto» iyye.

¹⁴ Toh inxicca 'yeh, YALLIH Qibaadah Qarik kilbat le kabut raqta culma fanah yoo bee. Tokkel Tammud akak iyyaanamay yallah loonuhiyyah weeqa agabu uble.

¹⁵ Too waqdi Yalli yok iyyeemih, «Bani-adantow, ama'kkel yakke umâ-yabuli maay tablee? Ahak sarra kaadu amahak gactam abletto» yok iyye.

¹⁶ Sarrak Qibaadâ-Qarik adda le kabut raaqa daarat fanah yoo bee. Tokkel, YALLIH Qibaadah-Qarih adda akak culan culma kee sadgat elle aban aracak fanal, labaatanna kee koona num yen. Too labaatanna kee koona numuu, qibaada qarit darre cabak, ayrô-mawqa fan qununnu 'yeh, tawqeh tan ayro aqbuduk yenen.

¹⁷ Too waqdi Yalli yok iyyeemih, «Bani-adantow, tamah table koo hinna! Yuudâ-mari tama'kkel abah yan umam-yabuli tableh tanik, ah celtam kinnii? Kulli waqdi qamalliinok aade waanaah; anu anqibinnaanim abaanam celtam kinnii? A diini-maleela gacak gactam elle aban inna maay tablee?

¹⁸ Tonna'mmay tahaysaay yi bagcarra le'nna ablelon. Keenih maracmataay maxuwaawa. Anay fayya haak yoo kallacaanamah keenik moggola» yok iyye.