Yacedkel 7 - NABUWWA KEE MALIKWA

ISRAAYILIK ELLECABO XAYIH

¹ YALLIH qangara yol obteeh; yok iyyeemih:

² «Bani-adantow, yoo YALLAY Mulki lehiyya Israayil rasih giddinaamak iyyam ankacis: Ken ellecabo xayih! Inkih tan baaxoh baati edde takku wayta wakti xayyooweh yan» yok iyye.

³ «Israayil ummatey, sin ellecabo xayih! Abba hayten umaaneh cokmi siinil abeyyooh; liyoh an naqabu yok abletton. Ama qax-umaane le abtoy edde assa 'teenihiyya siinit macaba.

⁴ Siinih maracmata. Siinih maxuwaawa. Abten qaybik tan abtoh sin digaaleyyo. YALLA kinniyom tonnal yok aaxigetton, keenik inxic» yok iyye.

⁵ YALLAY Mulki lehiyya kaadu yok iyyeemih, «Balak bala sin ciggiilele.

⁶ Sinim gaba kalteh; sin ellecabo xayyowteh; sin ikke tekkeh!

⁷ A baaxol yan maraw, sinim tekkeh! Ahaysa qaleh amol yan makaamah abak tenen sadgat kee qiid siinik raaqeleeh; abtaanah absissaanam waagissa heetton.

⁸ «Away xayi saakih addat yi naqbi siinil oobele. Abba hayten umaaneh sin digaaleyyo. Ama qax-umaane le abtoy edde assa 'teenihiyya siinit macaba.

⁹ Siinih maracmata. Siinih maxuwaawa. Abteenih tanin uma taamak gexxaamah, digaala raq siinik mali. Anu YALLA kinniyom kee, sin digaaltam yoo kinnim, too saaku aaxigetton, keenik inxic» yok iyye.

¹⁰ «Israayil mari edde bayu waa wakti yemeeteh. Umam tittal baahaanam temeggeh. Sahda kaxxiinah qubbuy inta.

¹¹ Caylah umaane sinaamal baaha mari baahah yan baatil yemeggeh. Sahda luk sugte gaddaliino kee qax-maqaane kee kunnabak tu ken lih maraqta.

¹² Wakti amah kaana; xayyooweh. Yi digaala kulli numul tamaatu waytaamih sabbatah, xaama num edde yafriceeh, yaylamme num edde qaada uddur akke waytam taaxigeenimi.

¹³ Yi naqbi kulli numul oobeleeh; edde kasaaritta 'yem geyam fanah sugu waa tellemmô-num mayan. Uma-mari yi naqabut bayele.

¹⁴ *Baantah anay radeleeh; too way kulli num bical gacele. Takkay immay yi naqbi kulli numul oobaamih sabbatah, carbih num magexa.

ISRAAYIL DAMBIH DIGAALA

¹⁵ «Giti addal tanim carbiiy; buxah addal tanim dalka kee qululu. Baaxok yawaqu waa num carbit rabele. Buxah addal sugu waa num, dalka kee qulul gadda akkele.

¹⁶ Marak garab goloh addal suge kimbiiriy qale fan gilitahiyyah innah, qale fan kudele. Kulli num isih abe dambih nadaamitele.

¹⁷ Kulli numuk ibak gaba keenik taanele.

¹⁸ Sartanah *qabuudut gaceloonuuh; inkih yan xagar meysih keenik axaxitele. Amo keenik mooleloonuuh; yakkeenimik inkih qawratak radelon.

¹⁹ Luk sugen dahab kee lakqo guddaafah innah qidelon. Anu bagcarrita saaku, ken lakqo kee dahab yi bagcarrak ken macatta. Dahab kee lakqo faxaanam keenih maduudussa; qululuk ken macatta. Dumaak dambit ken asissem, tama dahab kee lakqo.

²⁰ Duma yan saaku dahab kee lakqo kee luuluk mangom luk sugeenimih sabbatah, tohul kaxxam kaxxiinitak yeneeni'mmay, maca akak abeenih? Sarra woo duyyek yalla axcuk yaqbuden duyye bicsen; ableh-umam akak aben. Tohuk gexxaamah anu too duyye caraamu keenil abeyyo» 'yaanam iyye.

²¹ Yalli iyyeemih, «Marin baaxoh marih gabat ken bubsuuseyyo; umeynit oson edderra heenim keenik akah buubaah, nadaasa keenik akah aban innah abeyyo.

²² Yoo elle yaqbuden yi qari nadaasa abah ableemih, tu elle magacsa. Qamalli adda culla 'yeh nadaasa abeh cabaamah tu akak maxca, keenik inxic» yok iyye.

²³ «Baaxol titta qida mari yemeggeh; magaalal umaane aba mari caddo cabelek, silsilatwa bicis.

²⁴ Kaxxa umeynitih yan mara siinit ruubeyyooh; too mari buxaaxi siinik nagrele. Isin qibaada elle abtan arooca nadaasa abu waa mara siinit ruubu waa waqdi, siinik qande le mari elle kaxxiinitem gaba kalele.

²⁵ Niya siinik radeleeh; amaan faxettoonu'mmay mageytan.

²⁶ Balak-bala sin ciggiilele. Naharak toobben xaaguk gaca xaagu sarrak aabbetton. Sarra takku waytam neh warisa axcuk nabuwwat kallacsimetton. Seeka ummatah-warissam mageytaay; idoola ummatak-fayuh-intam mageyta.

²⁷ Malik weeqeleeh, mislik niya radele. Ummatat axaxo heele. Abba hayteenimih sin digaaleyyo. Sinaamal abak sugten cokmi siinil abeyyo. YALLA kinniyom too waqdi yok aaxigetton» iyye.