Yacedkel 6 - NABUWWA KEE MALIKWA

YALLI DUYYÊ-QIBAADA ILAAQE

¹ YALLIH qangara yol obteeh; yok iyyeemih:

² «Bani-adantow, Israayil qaleela fanah wagga haay; anu axcem keenih waris.

³ ‹Israayil qaleelaw, Mulki-le-YALLIH yab oobbeya› inxic. Yoo YALLAY Mulki lehiyya edde yaaba yab, qaleela kee koomaami kee qaleelak fanat tan goloolak, ‹Oobbeya› inxic. Xeet kee cooxuk bicsen duyyeeya elle yaqbuden arooca bayisu waa seef ruubeyyo.

⁴ Sadgat elle aban arooca finqa abeyyo. Qaydarus elle haan duyyeeya bututtukka axcele. Too duyyek foocal sugu waa mari, aqbuduk sugen xeet kee cooxuk bicsen duyyeh foocal, ken qidelon.

⁵ Israayil marak raysa too oson yaqbuden xeet kee cooxuk bicsen duyyeh foocal qideyyo. Lafa keenik sadgat elle aban aracak foocal caacayat ruubeyyo.

⁶ Israayil magaalooli suge waytem ceelak cabba heeyyo. Oson yaqbuden duyye kee sadgat elle aban arac riira abeyyo. Abba heenim inkih, suge wayteh innah, keenik heeyyo.

⁷ Sahda kulli ikkel keenik qidelon. Too waqdi YALLA kinniyom yok aaxigelon.

⁸ «Seefik dago mari cattiimeleeh; too mari ummat kee mango baaxooxa fanat fixixele.

⁹ Seewah ken been baaxol anelon. Too saaku yoo kassa heelon. Too waqdi ken akah digaaleeh qaybik ken akah qidem, ken kalbiy gano lehiyya ubleeh, yoo cabba heenih xeet kee coox yaqbudeenim keenik ubleemih sabbat kinnim aaxigelon. Isinnih aben umaane kee, qaybik taniimiy edde sugeenihiyyak gexxaamah, isinni nabsi anqibelon.

¹⁰ Anu YALLA kinniyom yok aaxigelon. Maabina keenik excem abeenik, ken bayisu duuda Dagelta kinniyom aaxaguk raaqelon» yok iyye.

¹¹ YALLAY Mulki lehiyya yok iyyeemih, «Israayil marah gamoomitaay keenih qaad. Israayil mari abe umaaneh kaxxa boogeh boogis. Carbi kee qulul kee dalkah ambaxelon.

¹² Allal yan mari keenik dalkah ambaxele. Xayi'kkel yan mari carbit keenik ambaxele. Tohuk raqtem qululuh ambaxele. Tonnal yi naqbi le'nna ablelon.

¹³ Woo oson Yalla 'yeenih yaqbuden duyye kee, sadgat elle aban aracih dariifal, raysi tittak bagul gacele. Kaxxa koomaami kee qaleelâ-sanaay, silal-le-coox kee sublâ-gubay qaydarus qeerisakaay xeet kee coox elle aqbuduk sugeenihiyyal, raysi raaqele. Too waqdi ummat inkih YALLI yoo kinnim aaxigele.

¹⁴ Gaba keenil qideyyooh baaxo keenik bayseyyo. Gabbi-qaxat raqta bacarih tan baaxok xabba haanamaay Ribla deqsita aracay kilbat le kabut raaqahiyyah amma 'yaanam, abuuruh tan baaxoy num sinniih lac sinni abeyyo. Israayil mari elle yan baaxok tu macabay inkih bayseyyo. Ummat too waqdi anu YALLA kinniyom yoh aaxigelon» yok iyye.