Yacedkel 5 - NABUWWA KEE MALIKWA

YACEDKEL AMÔ XAGOR YIRGIQE

¹ YALLI yok iyyeemih, «Bani-adantow, af le seef bahha haay ama deben kee moyya isik mool. Sarrak woo xagor miizaanal haay sidooca ikkel kur.

² Sidooca exxak, exxak teena magaala edde abbaxuk sugen marok caban saaku, magaalah addal gira edde rub. Nammeyhaytoh af magaalak addal elle gexamgexxaamal seefit irgiggiqay qid. Sidochaytoh af caacayat rub. Tonnal anu seef haysitta heeh woo marah ayraddeyyo.

³ Takkay immay xagooruk dagom raaqisay saroh exxat uxuy.

⁴ Too xagooruy raaqissek garab ifdigga haay girat qidaay gira takamay inxic. Too xagoorut gexxa gira Israayil rasu inkih duudusele» yok iyye.

⁵ YALLAY Mulki lehiyya iyyeemih, «Yarusalaam fan wagga heey. Raqqa 'te baaxok gudet, baadak cundubul tet hee.

⁶ Takkay immay Yarusalaam mari yi amri cineh, raqqa 'te baaxooxah marak umaaneh lafitaanam isinnik yuybulleenih. Yarusalaam yi amri cinteeh anu aba axcem abe cinteh. Tet dariifal enna 'ta baaxooxah marak yabti cinah lafittam tet kinnim isik tuybulleeh.

⁷ Away Yarusalaamey, yoo YALLAY Mulki lehiyya kok iyyam ankacis. Yi amri cinteeh yi yab bursuttehiiy; tonna-leemiik kok dariifal tan baaxok lafitta umaane bahte. Oson abuk-raqtih luk sugen qaada keenik kaxxih qaadah haysitte.

⁸ Tonna leemiik yoo YALLAY Mulki lehiyya kok axceemih: tahak wadir qaduwwi kok ekkeh an. Inkih tan ummat elle table'kkel cokmi kol abeyyo.

⁹ Anu niqibyo dambiy abba haytehiyyak gexxaamah, ahaydumah kot abe weeh, sarrak kot abak raaqe wayu waah an digaalah koo digaaleyyo.

¹⁰ Yarusalaamey, anu kot abu waa digaalah, xaleena xayloh-cado akmeleeh; xaylo xaleenah-cado akmele. Too bis le kaxxa digaalah sin digaaleyyooh; wohuk raaqe mara fixixih kulli kabul ruubeyyo.

¹¹ «Waara YALLAY Mulki lehiyya kinniyooh, tonna-kinnuk axceemih: gabat bicsen duyye kee caraamak tan taamat, Qibaadâ-Qari yok nadaasa abteeniih; tonna-leemiik anu kaadu darre siinit cabeyyooh; siinih maracmatay siinih maxuwaawa.

¹² Ummatak sidochaytoh af siinik qulul kee dalkah magaalak addal ambaxele. Aki sidooca af kaadu magaalak afal seefit selelon. Raaqe sidooca af kaadu affara kaalibil caacayat ruubeyyo. Sarrak innih seef luk ken ayraddeyyo. Tahat yabtam yoo YALLAY Mulki lehiyya.

¹³ «Siinil beyah an digaalak cayya axcem fanah, siinih abeh an naqabuh bala siinil oobisak sugeyyo. Tah siinit takku wayta saaku, yooy YALLAH yani yol bahten makoh sin inqibeeh yaabem aaxigetton.

¹⁴ Yarusalaam abuuruh cabeyyooh; dariifal siinik tan baaxoh ummat sin garik gitah gacteh gexxa waqdi, burah af siinil raqeeqiseloonuuh; siinil maxayyoowan.

¹⁵ «Yi naqabu kee bala siinil obtam yableeh anu sin digaalam yable mari, siinik sakkiteleeh; sahda bursuttaah anqaasah elle rabta mara akketton. Siinit tekkem gersi marah sarrah kas akkele.

¹⁶ Maaqoy geyak sugteeni sin waysiseyyooh; qulultoonay sin axceyyo. Qululuh abtaanah tanin biyak, af-le-gaysê-baxay sin edde baysoonuh qideenihiyya biyaakah le inna siinil aallele.

¹⁷ Xaylo siinik qidda'gidih, qulul kee alluwwa siinit ruubeyyo. Sin edde qiduh biyak siinit ruubeyyooh; sahda siinik titta qideleeh; carbi addal siinik akkele. Tahamat yabtam yoo YALLA» yok iyye.