Yacedkel 47 - NABUWWA KEE MALIKWA

QIBAADÂ-QARIH RAGIDIK RACITTA LEE

¹ Woo num Yallih Qibaadah Qarih culma fan yoo gacse. Too culmak lee awaquk teneeh; too lee Qibaadâ-Qarik exxak teenay gabbi-qaxat raqtahiyyak amma 'teh sadgat elle aban aracak gabbi-qaxa le kabu darah gexak, ayrô-mawqa le kabuy Qibaadâ-Qari edde yafkunehiyya fanah darah oobak ten.

² Tohuk lakal woo num kilbat le kabut raqta afaak beyya yoo heeh, afah yoo yeyyeeqeeh, tokkeek ayrô-mawqat raqta culma fanah yoo bee. Too culmak gabbi-qaxa raqta exxak qunxa buyyi-baxi caxitak yen.

³ Too num edde yimittire akattat, ayrô-culma fanah caxitta lee elle gexxaamal, koona boolih mitri yimittire. Too waqdi «Tama buyyit ibah gex» yok iyye. Too buyyih addat ibah gexe waqdi, lee ibak xibqi yok gufte.

⁴ Sarrak kaadu caxitta lee elle gexxaamal, qagisak koona boolih mitri yimittire. Too waqdi too lee gulub fanah yok temeete. Koona boolih mitrih gide kaadu dori gexxa 'yam yimittire. Too waqdi lee xonko fanah yok gufte.

⁵ Kaadu koona boolih mitrih gide yimittire. Too waqdi buyyi leek kaxxam yemeggeeh; addat akak gexam maduudiyyo. Giiru akke waytek, kalah elle taban inni maraaqinna.

⁶ Too waqdi yok iyyeemih, «Bani-adantow, tamah inkih cubbus» yok iyye. Sarrak weeqayti xaqu fan yoo baahe.

⁷ Wokke gufe waqdi weeqaytuk a qaxa kee woo qaxal mango coox uble.

⁸ Too waqdi yok iyyeemih, «A weeqayti ayrô-mawqa le kabuuk addah Ordon weeqaytu fan ooba. Tokkeek Rabe Bad deqsita bad fanah ooba. Rabe Bad fanah ooba waqdi, woo bad luk sugeh yan qasbo cabaah badliitah maraaqa.

⁹ A weeqayti darah elle gexaamal alak alaakulleyta kee kullum mawaytima. A weeqayti Rabe Badih leey badliitah sugte qasbo cabsiisah. Elle gexaamal rooci lem taloole.

¹⁰ Rabe Badak Qengeedi raceynak xabba haanamaay Qen-Qeglayim raceynah amma 'yaanam yakke badal, kullum yabbixe mari baddi-af macaba. Akke kullum mabbuuxuh yamaate mari sabooka elle hawwalisa ikke akkele. Kullum qaynatak Maditraaniyah badal enna 'ya qaynatih kullum akkele.

¹¹ Takkay immay natqa le leey, dori lee kee dariifal tan natqah agantah yasiffiyem maduuda. Qasbo way macabsiisa.

¹² Weeqaytuk namma xaqul maaqo akak geyan coox aabukele. Too cooxuk ayyuufi malaqaymuuma; kulli alsal xalele. Ta coox Qibaadâ-Qarih gubak racta lee yaaqubeemih sabbatah, kulli way xaylo xalele. A coox xala xaylo maaqo sinaamah akkeleeh, ayyuufi dayla sinaamah akkele» iyye.

BAAXÔ CADMA

¹³ YALLAY Mulki lehiyya iyyeemih, «Taban kee namma kedoy Israayilih toobokehiyya kurrusuttu wayta baaxoh cuduud ah kaana. Yuusufuh yooboke marah namma exxa akak acuya.

¹⁴ Isin akak radden sin kaxxa abbobtih a baaxo aceeyyoomuh xagana culeh suge. Away too baaxo isin inki gidel kurraasita.

¹⁵ «Kilbat le kabuk Maditraaniyah badak xabba haanamaay Cetlon deqsitta magaala kee Camat deqsita daabay gitah gacaanahiyya kee Xadad deqsitta magaalah amma 'yaanamaay

¹⁶ Beroota kee Sibrayim magaalah amma 'yaanam takke baaxo kenimi. Ta namma magaalooli elle geytintam, Damasko kee Camat doolatih cuduuduk fana. Tokkek xabba haanamaay Caxar-Hattikon deqsitta magaalah amma 'yaanam tan baaxo kenimi. Caxar-Hattikon elle geytintam, Cawran deqsita rakaakayih cuduudu.

¹⁷ Tonna-leemiik kilbat le kabut raaqa cuduud Maditraaniyah badak xabba haanamaay Caxar-Qeenan deqsitta magaalah amma 'yaanam fan yakke. Damasko kee Camat too cuduuduk kilbat le kabut geytimta. Kilbat le kabut raaqa cuduud tonna.

¹⁸ «Ayrô mawqa le kabu raaqa cuduud akak ugtam, kilbat qaxat raqta exxay Damasko kee Cawran fanal geytintahiyya. Toh kaadu, Ordon weeqaytuy ayrô culmak Israayil rasu kee ayrô mawqak Gilqad rasih fanal geytinta exxat raaqahiyya. Tokkeek, Tamaari deqsita aracay Rabe badih xaqul geytimahiyya gufa.

¹⁹ «Gabbi qaxat raaqa cuduud akak qimbisam, gabbi-qaxat raaqa Tamaari deqsita araca. Tokkeek Kaadis-Mariiba deqsita illalta kee Masri cuduudul yan daqaarah amma 'yaanamaay Maditraaniyah bad fan yakke.

²⁰ «Ayrô culma le kabut raaqa cuduud Maditraaniyah bad kinni. Kilbat le kabuk Camat deqsita daabay gitah gacaanahiyyak foocat yan arac fan yakke.

²¹ Ta baaxo Israayil kedoodah kuramkura.

²² Sin ikoyta akkele. Allî-baaxoh maray sin addal yaniih xaylo sin addal xaleeh qarsitehiyya, tama baaxo kurta saaku, ken akak macabinaay ken afto keenih akak ucuy. Israayilih yooboke marih intit ken ubulaay, baaxo kurta saaku Israayil xaylok kaxxih, baaxol saami caxxa keenih qidaay, ken afto keenih ucuy.

²³ Tama marah, addat akak lih yanin kedok kaxxih, isinni afto baaxok geyaanama. Tahat yabtam yoo YALLAY Mulki lehiyya» iyye.