Yacedkel 45 - NABUWWA KEE MALIKWA

BAAXOK YALLIH AFTO

¹ Baaxo sahdah kedo kedol kuran saaku, afak teena YALLAH cabaanama. Too baaxoy YALLAH cabaanahiyya xexxaarah taban kee namma kiilomitri kee garab takkeemi. Baguh tabna kiilomitri takkeemi. Too baaxo inkitanuuk saytunuk tan baaxo takkeemi.

² Too baaxoy YALLAH cabaanahiyyal, affara kaalibih yan aracay kulli kaalib namma bool kee kontom mitri akak yakkehiyya Qibaadâ-Qarih taamah dessoh haanama. Too aracat maroh baguh labaatanna kee koona mitri takke booxa anele.

³ YALLAH caban baaxok garabay taban kee namma kiilomitri kee garab xexxaarah yakkeeh koona kiilomitri baguh yakkehiyya dessoh heelon. Yallih Qibaadah-Qariy saytunaanah lafitta 'yahiyyah arac elle hoonu waanam tokke.

⁴ Ta arac, inkih tan baaxol taahirik yan aracay Qibaadâ-Qarih addal Yallih taamah taamitta seekah qarwa elle xisoonu waanahiyya. Too arac kaadu Qibaadâ-Qarih xisneh deeselon.

⁵ YALLAH caban baaxok gersi garabay taban kee namma kiilomitri kee garab xexxaarah yakkeeh koona kiilomitri baguh yakkehiyya, Leewih yooboke maray Yallih Qibaadah-Qarih addal taamitahiyya ikoytah antacawwimele. Too mari dabaaqah elle gaca magaalooli tokkel xissiimele.

⁶ YALLAH caban baaxoy taahirih tanihiyyah gariik, gersi baaxoy magaala elle xisoonu waanahiyya baxsaanama. Israayilih yooboke marak faxe num too magaalal elle gacu duuda. Too baaxo xexxaarah taban kee namma kiilomitri kee garab takkeemiiy, baguh namma kiilomitri kee garab takkeemi.

BAAXOH ABBAH BAAXO

⁷ Baaxo xiinisah yan abbah kaadu baaxo tantacawweemi. Too baaxo, taahirik tan baaxo kee magaala elle xisoonu waan baaxo edde taade ikkek xabba haanamaay, ayrô-culma le kabul Maditraaniyah badah amma 'yaanam kee, magaala kee taahirik tan baaxok ayrô-mawqa le kabut raaqa cuduuduk xabba haanamaay, baaxo edde idiyya 'ta cuduud fanah gufta. Xexxaarah Israayil kedoodak inki kedoh yeceen baaxoh gide akkele.

⁸ Too baaxo Israayil abba yakku waa numih ikoyta akkele. Too baaxok taturra 'yeh Israayil marih baaxo maxaga. Keenit maxukkuta.

BAAXOH ABBAH MADQEN XINTO

⁹ YALLAY Mulki lehiyya iyyeemih, «Israayil abbobtiy, isin mango dambit assen. Ahaysa sinaamal baatil baahaanam kee xukkutaanam cabtaanama. Cakki kee qadlih tanim aba. Tahak wadir yi mara le baaxok ayyaaqe waytaanama. Tahat sin lih yabtam yoo YALLAY Mulki lehiyya.

¹⁰ «Kulli num siinik duyye mako sinni miizaanal keexaanama.

¹¹ « ‹Eefa› deqsita miizaanay kafnaan le duyye elle keexaanahiyya kee ‹Baas› deqsita miizaanay caxittam elle keexaanahiyyah gide yakke. Ta nammam inkih elle keexaanamak ‹Hoomar› deqsita miizaan yan. Inki hoomar tabna eefa yakkeeh, kaadu tabna baas yakke.

¹² «Miizaan elle haytan duyye: Labaatanni gerah inki sekil yakke. Lactam sekil inki mina yakke.

^13-14 «Sadgatah teceenim kexxan way abtaanamaa: orobte darok kamadi (sirray) tekkek, lactam gabak inki af sadgatah teceenimi. Gabru deqsitta darok lactam gabak inki af sadgatah ucuya. Caxâ xaylok bicsen *zeyti (saliid) kaadu booluk inki af sadgatah ucuya. Ta duyye ‹Baas› deqsitta keexol haa: tabna baas inki hoomar yakkeeh inki hoomar inki kor yakke.

¹⁵ Israayil baaxol yaloole illi kee wadarak namma booluk inkittu sadgatah ucuya. «Anu dambi siinih caba'gidih, sadgatah baahan daro kee cado akak carrisan sadgat kee, amaanah xintaana'gidih astah abtan sadgat akah tacoonu waytaanam, tama inna. Tahat yabtam yoo YALLAY Mulki lehiyya» iyye.

¹⁶ «Baaxol enna 'ta Israayil-ummat, ta sadgat, abbah yan numul baahoonay.

¹⁷ Usuk too waqdi cado akak carrisan saq kee sadgatah baahan daro kee qinabak bicsen kamri, alsi biloh yakke qiid kee Sabti ayroy qiidih edde asaanahiyya kee, wohuk kalah tan ayrooray ummat qiidih edde assahiyya baaham kaal tan. Dambi kalootuk aban sadgat kee, sadgatah yeceen darooy, cado akak carrisan saq kee, amaanah xintaana'gidih astah abtan sadgat inkih, abba baahaama. Ta sadgat Israayil-ummatah dambi kalootuk orbele» iyye.

QIDDI MASSAKAXXA

¹⁸ YALLAY Mulki lehiyya iyyeemih, «Sanatak inikhaytoh alsak inikhaytoh ayrot, aymak tu sinni dahaltu Qibaadâ-Qari taahirroysaana'gidih sadgatah qidoonaay.

¹⁹ Sek too dahaltuy dambi-kaloot-sadgatah qideenihiyyah qabalak tu takkem beyya heeh, Qibaadâ-Qarih albaab dagah amook tani'kkel caxay. Sadgat elle aban mansafak affara *ruknil kaadu caxay, adda le kabut raaqa daarat adda akak culan culmal, tonnah kaadu caxaama.

²⁰ Alsak malcinhaytoh ayro garciik cube'kal dambit asa num yenek, hinnay kaadu edde asem dambi lem kinnim aaxige'kal dambit asa num yenek, woo numih aftok dambi kaloot kaah takke'gidih toh aba. Tonnah abteenik, Qibaadâ-Qari taahir abetton.

²¹ «Sanatak inikhaytoh alsak taban kee fereyhaytoh ayrot, Elle-Tatriyyi-Qiid assakaxxetton. Malcina ayroh kamiir maleh bicsen gaqambo ukuma.

²² Qiid naharak yakke ayro baaxoh abba sadgatah awur yeceem kaal tan. Too sadgat usuk isih edde ase dambi kee Israayil mari edde assa 'ye dambi kalootuk orbele.

²³ Ta malcina ayrok kulli ayro, YALLAH sadgatah malcina awur kee malcina maruw qidak sugay. Too awurwa kee marway qidahiyya hebeltoh ayma alle waytaama. Tusguudek sarra cado akak inkih carrisaama. Tonnah kaadu, dambi kalootuh, dabeela kulli ayro qidaama.

²⁴ Kulli awur kee maruwuy sadgatah qiddeenihiyya lih, darok sagla kiilo takkem kee caxâ xaylok bicsen *zeytik (saliidik) kaadu sidiica litri takkem taceenimi.

²⁵ «Iraawô-Dabih-Qiidiy sanatak malcinhaytoh alsak taban kee konoyhaytoh ayrot abaanahiyya kaadu, baaxoh abba dumî qiidih akah abe innah, malcina ayrok kulli ayro cado-akak-carrisan-sadgat kee, dambi-kalootuh-baahan-sadgatah, saqak too dumî qiidih gide qidaama. Tonnah kaadu dumak kaxxih, daro kee caxâ xaylok bicsen *zeyti sadgatah baahaama» iyye.