Yacedkel 44 - NABUWWA KEE MALIKWA

AYRÔ-MAWQAH AFAH TUXXIIQI

¹ Too num Yallih Qibaadah Qarik iro le kabu raqta culmay ayrô-mawqa le kabut tanihiyya fanah yoo bee. Too culma alifit ten.

² YALLI yok iyyeemih, «Tama culma alifit aneleeh, mafakkinta. YALLAY Israayil doore Dagelta kinnihiyya akak cule arac kinnuk, gersi mari akak macula. Tohih sabbatah alifit edde aadele.

³ Takkay immay ummatak abba yi foocal taahirroysen-gaqambo yakme'gidih, wokkel daffeyu duudah. Culma akak culan naharsi goliik culmah afak culla bukka 'yam duudah» iyye.

QIBAADÂ-QARIH XINTOH MADQA

⁴ Sarrak woo num kilbat le kabut raqta afaak beyya yoo heeh, Qibaadâ-Qarih fooca fanah yoo baahe. Wagga hee waqdi, YALLIH nabna yaybulle nooriy inkih yan Qibaadah-Qarik adda ifsahiyya uble. Too waqdi gomboh baaxok bagul rade.

⁵ YALLI yok iyyeemih, «Bani-adantow, ubulla haytam kee oobba haytam nagay cubbus. Qibaadâ-Qarih xinto kee wokkel abeh meqem koh warseyyo. Qibaadâ-Qarih addah culma akah taguude mara kee, akah aguude wayta mara tittak cubbus» yok iyye.

⁶ Kaadu qagseh iyyeemih, «Israayil maray yabti-cina lehiyyak intaamah: abtan dambi ahaysa sin xiqah.

⁷ Allî-baaxoh maray salot sinnihiyya yi Qibaadah-Qari culussaanaah, nadaasa kaa abten. A maray isin bahteeni, yi yab oggola mara hinna. Sadgatah qiddan saqih xayta kee qabal sadgatah bahtan waqdi, a mara yi qariy taahirik yanihiyya gabat bahtan. Tonnah abak sin kee yi fanal yen xagana bayisseenih.

⁸ Yi qibaada elle aban innak amo mawagtinnitoonuh immay, dacayrih marin gabal hayten.

⁹ Tohuk gexxaamah, yoo YALLAY Mulki lehiyya sin aysixxigeemih: faxe allî-baaxoh maray solot sinni takkuu, yi yab cina mara takku, yi Qibaadah-Qari cule waanama. Tonnal yan allî-baaxol maray Israayil marih addal yanihiyya kinni-way cule waama» iyye.

LEEWIH MARAK SEEKANNUK KALEN GARABA

¹⁰ YALLI yok iyyeemih, «Anu Leewih yooboke maray Israayil mara lih gacca 'yeh yoo cabba heeh xeet kee coox yaqbudehiyya digaaleyyo.

¹¹ Tohuk lakal Qibaadâ-Qarih afah taama kee Qibaadâ-Qarih addal tan gaba-taama aboonu duudaanaah; ummat sadgatah bahtah tan cado akak carrisan saq kee sadgatah baahan saq inkih qidaanam tu maliiy qibaadah temeete ummat cataanam meqe.

¹² Takkay immay yi qibaada cabba heenih xeet kee cooxuk bicsen duyyeh qibaadat gaceeniih, sahda dambit asisen. Tohuk gexxaamah, yoo YALLAY Mulki lehiyya xiibita'mmay, tahamah ken digaaleyyo.

¹³ Tahak wadir seekâ migaaqal yi taamat maraaqan. Yi qibaada elle aboonuh, rikeek baxsah taniimik garih amaate waanama. Hinnay kaadu woo Kulliimik-Taahiriinoh-Yayse-Golil xayyoowe waanama. Oson aben umaaneh keenih taguudem, tama digaala.

¹⁴ Tahak wadir gaca marih taamay Qibaadâ-Qarih addal abaanahiyyat ken heeyyo.»

SEEKA

¹⁵ «Takkay immay woo Leewih yooboke maray Saaduk deqsita numuk radehiyya Israayil ummat takkeemik yoo cinte saaku, Qibaadâ-Qaril yi taamat raaqeeniih, yi qibaada baguuk abak sugen. Tonna-kinnuk ta saaku, Qibaadâ-Qarih addal yok foocal xayta kee qabal sadgatah bahtu waytam ta mara. Tahat yabtam yoo YALLAY Mulki lehiyya.

¹⁶ Yi Qibaadah-Qari culak yoh baahan sadgat qidan mansafih taama gabat akak hayu waah, Qibaadâ-Qarih addal yi qibaadah taama akak gactu waytam, dibuk ta mara.

¹⁷ Qibaadâ-Qarik adda le kabut raaqa daaratih afaak adda culan waqdi, *baftak bicsen meqe sartanat gacoonay. Qibaadâ-Qarih adda takku, daaratal, Yallih taamat yanin waqdi, illi xagooruk bicsen sarak hebeltoh im isinnil hee woonay.

¹⁸ Ken qumaamat kee guba haan caari-kala *baftak bicseenim faxximta. Toh akah kinnim, gersi sara xagaral haan waqdi, xooqaanamih sabbata.

¹⁹ Qibaadâ-Qarik afa le kabut raaqa daaratay sinam elle tanihiyya fanah yamaaten waqdi, Qibaadâ-Qarih addal taamat sugen waqdi xagaral luk sugen sara kalla heenih, woo taahirik yan aracal caboonay, gersi sarat isinnit hoonay. Toh akah kinnim, woo saray xagaral loonuhiyya taahirik yan sara kinnuk, woo afal suga mara biyaake waa'gidi.

²⁰ «Seeka amo isik moole waytaama. Hinnay kaadu amo xagor isinnik aynabe waanama. Fanal elle meqe'nnal yanay iyyaanama.

²¹ Qibaadâ-Qarik addâ kabu raaqa daarat culan waqdi, qinabak bicsen kamri aaqube waanama.

²² Seeka cabtentoh tan barra digibe waanama. Israayilih tooboke baxuwway bikirit tanihiyya akkiiy, hinnay kaadu, seekik raqte gubnak kalih agabul rihime waanama.

²³ «Yi ummat taahirik tanim kee ane waytam barsaanama. Saytunim kee nadaasa lem ken barsaanama.

²⁴ Ummat fanal yi xinto wagga haytaamal tittin way rade kaa tekkek, yi xinto elle inta'nnal ken kalkaalaanama, seekak siinih raqta tiya. Qiddi ayro yi xinto elle inta'nnal abaanama. Sabti ayro essekexxeya.

²⁵ «Sekti abba kee ina akkiiy, hinnay kaadu, baxá kee lab-baxa akkiiy, toobokoyta kee digibe wayte maqanxá rabtek, nadaasa kaa abaanamah, keenil gexaama. Wohuk kalih marih rabah gexe waama.

²⁶ Ta marak numuk teeni garih yemeetek, taahirrowwa 'yeh malcina ayro sugan kaal tan.

²⁷ Tohuk lakal Qibaadâ-Qarik adda le kabu raaqa daarat culla 'yeh, taahirrooweemih sadgat Yallah abay. Tonnal woo yi Qibaadah-Qarih addal abak suge Yallih taamah gacam duudah. Tahat yabtam yoo YALLAY Mulki lehiyya» iyye.

²⁸ «Israayil marah baxak baxal nagrah raqta baaxo ikoytah keenih eceeh. Takkay immay seekah Israayil rasul ikoytah ecee baaxo matana. Oson faxxa haanamah, anu innih keenih an.

²⁹ Sadgatah baahan daro kenimi. Dambi-kalootuh-baahan-sadgat kenimi. Ummat edde asse qellatih-cakkih-bahta-sadgat kenimi. Tohuk kalih imiy ummat Israayil rasul yi qibaadah daanissa haytahiyya inkih kenimi.

³⁰ Daro orobta waqdi naharat yargiqen daro kenimi. Kalah kaadu yi migaaqal sadgatah bahha hannaanim kenimi. Gaqambo alaysinnaan waqdi, too gaqambok naharsi gaqambo seekah yacoonay. Tonnal toh aba marih buxal barkat ruubeyyo.

³¹ Isih rabeey, hinnay kaadu, ali qide yekke kimbiro kee lacti cado, seeka akme waytaama» iyye.