Yacedkel 43 - NABUWWA KEE MALIKWA

YALLI QIBAADÂ-QARI YUDUURE

¹ Woo yimittire num ayrô-mawqa le kabut af cabta culma fan yoo bee.

² Tokkeek Israayil doore Dageltih nabna yaybulle ifuy diifu le uble. Yallih anay baddi haffoh innah xongoleeh, Yallih ifuy diifu lehiyya baaxo inkih duude.

³ Woo waqdi wacyih ublem, Yalli Yarusalaam bayisa'gidih yemeete saaku ublem ceelak ten. Kabar deqsita weeqaytih garil uble wacyi kaadu, ta wacyi ceelak yen. Too waqdi gomboh baaxol rade.

⁴ Too ifuy YALLIH nabna yaybulleehiyya Qibaadâ-Qarik ayrô-mawqa le kabut raqta afa fanah gexeeh; tokkeek Qibaadâ-Qarih adda cule.

⁵ Too waqdi Yallih *Roocaaniyya ukkuqqa yoo hayteeh, adda le kabu raaqa daarat fan yoo culusse. Tokkel YALLIH nabna yaybulle nooriy inkih yan Qibaadah-Qari ifsahiyya uble.

⁶ Tokkel too yimittire num xaqut yok soolak suge waqdi, Qibaadâ-Qarik addak yo'lih yaaba anay oobbe.

⁷ Yok iyyeemih, «Bani-adantow, amah yok dardaarinni korsih araca. Anu ta'kkel Israayil mara lih aneyyo. Abbootanah innih ken amol gaceyyo. Israayil mara kee ken malikwa ahak wadir xeet kee cooxuk bicsen duyyeh qibaadat yi migaq mabaysan. Ken malikwah raysitte fayya le aroocay xeet kee coox elle yaqbudeenihiyyal aagaquk migaq yok mabaysan.

⁸ Malikwa isinni qarwa akak culan afa, yi qari fan akak culan afah xaqut heenih yaniiniih; tonnal ken kee yi fanat dibuk inki gidaarak sah tu masuginna. Tonnah abak yi migaaqay taahirik yanihiyya wassakoyseenih. Tohih sabbatah abeh an bagcarrat ken bayseh.

⁹ Taway, too yok sa yaqbuden duyyey yallah loonuhiyyah aban qibaada kee isinni malikwah lafa, a aracak wonnah yok beyoonay. Tah abeenik, ken addal gaceyyooh, way keenik mabaxsima» iyye.

¹⁰ Kaadu iyyeemih, «Bani-adantow, Israayil marah wacarriyaana'gidih, Qibaadâ-Qarih xisne elle tani'nna waris. Elle xisan innih ekraar bartoonay.

¹¹ Abba heenimit wacarriyaanam tublek, tonnal Qibaadâ-Qari elle yani'nnah adda ken uybullay. Xisne elle aben innaay, culma kee mawqa akak tan kabuuy, ceelok le innaay, tet xinto kee bici elle yani'nna keenih waris. Tah inkih uktubba haay keenih acuy. Tonnal kullim elle tani'nna aaxige loonuuh, xinto intam abelon.

¹² Qibaadâ-Qarih xinto ah teeti. Qaleh amol Qibaadâ-Qari kee too qarih dariifal yan arac saytuniih, elle yani'nnaak Yallih taamah haysitelon» iyye.

SADGAT ARACA

¹³ Sadgat elle abaana'gidih bicsen arac mitrik yakkeh gide ah kaana. Ta arac edde yimittireenim, too Qibaadâ-Qari edde imittirra heen mitrik ten. Woo sadgat elle abaana'gidih bicsen aracak rakiiboh elle yan affara tattabat, addah mitrik garab yakkeeh, mitrik garab kaadu baguh yakke kanaalak ten. Iro le kabu raaqa kanaalak san, fayyah inki mitrik rubqi akkuk yen.

¹⁴ Ardik xabba haanamaay rakiibo edde taade ikkeh amma 'yaanam, inki mitri xexxaarah akkuk ten. Wokkel ciggilta exxa mitrik garab gide wadirih salaf le kabuh iissa axcuk ten. Xexxaarah namma mitri akkuk ten. Wohuk lakal tan exxa kaadu fanti-exxak mitrik garab gide salaf le kabuh wadir iissa axcuk ten.

¹⁵ Too exxay sadgat elle carrisaanahiyya fayya namma mitri akkuk yen. Woo aracak affara *ruknit tan solta gayse aki duyyey daga raqtak inkih fayya axcuk ten.

¹⁶ Kulli tattab akak xexxaarah laca mitri akkuk yen.

¹⁷ Fanti exxa tonnah affara gambi luk ten. Kulli gambi akak malcina mitri akkuk yen. Fanti exxak iro le kabu raaqa kanaalak exxa, fayyah inki mitrik rubqi akkuk ten. Sadgat elle aban arac fanah elle yawqen mawqeena ayrô-mawqa le kabu fan afkunuk ten.

QIBAADÂ-QARIH TAAHIRIINO

¹⁸ Tohuk lakal yok iyyeemih, «Bani-adantow, anu YALLAY Mulki lehiyya, kok axcem oobbey. Sadgat elle aban arac bicseenik lakal, amol akak sadgatah qiden saqih cado carrisaana'gidih, tonnah kaadu, qabal affara ruknil akak rifaana'gidih, abtam faxximtam taha.

¹⁹ Yi foocal gacca 'yeh Qibaadâ-Qarih addal yi taama abtu waytam, dagaak Leewî-kedok Saaduk deqsita numuk rade mara. Aham amrissam, yoo YALLAY Mulki lehiyya. Too saaku yekke dambih cabsuh sadgatah yeceen dahaltu, a maray Leewi yoobokehiyyal ucuy.

²⁰ Too dahaltu qidan waqdi, atu qabalak tu'baxa beyya haay woo sadgatah bicsen mansafak daga raqta gaysoosi kee, fanti exxal tan *ruknitte kee too exxa le sanal inkih hay. Tonnal dibuk yoh heen mansaf yakke'gidih dambik taahirros.

²¹ Tohuk lakal woo dambi kaloot yakke'gidih sadgatah yeceen dahaltu beyya haay, Qibaadâ-Qarik iro le kabu raaqa aracay ahamah rikeek yabbixeenihiyyal cado akak cararis.

²² Ciggilta ayro dabeelay hebeltoh ayma sinnihiyya bahha haay dambi kalootuh sadgatah qid. Naharak woo dahaltih qabalak akah abte innah, a dabeelih qabal beyya haay, sadgat elle aban mansaf a dabeelih qabalat taahirros.

²³ Tohuk gaba kalla hayta waqdi, dahaltu kee maruwuy hebeltoh ayma sinnihiyya yol bah.

²⁴ Too waqdi seeka too saqih cadol qasbo caxeleeh; yoh orba sadgat yakke'gidih, cado akak carriselon.

²⁵ Malcina ayroh gide kulli ayro dambi kaloot yakke'gidih, dabeela sadgatah baahetto. Tonnah kaadu, dahaltu kee maruw sadgatah baahetto. Ta saqay bahtu waytahiyya hebeltoh ayma alle waama.

²⁶ Tahim sittâ lakleh malcina ayroh gide abak sugetton. Tonnal dibuk yoh heen mansaf yakke'gidih taahirroyselon.

²⁷ Too ayyam gaba kalek lakal, seeka sadgat elle aban mansafal cado-akak-carrisan-saqih-sadgoota kee, amaanah-xiinaanamih-astah-baahan-sadgoota yoh orobta sadgootah xayyooselon. Too waqdi ruffa axceyyooh, sin oggoleyyo. Tahat yabtam yoo YALLAY Mulki lehiyya» iyye.