Yacedkel 40 - NABUWWA KEE MALIKWA

QIBAADÂ QARIY SARRA XISSIIMU WAAHIYYAH YUMBULLE WACYI ( ) YALLI YACEDKEL YARUSALAAM FAN BEE

¹ Seewah nee edde been labaatanna kee konoyhaytô sanat tikkaay, allî baaxoh mari Yarusalaam yibbixeemih taban kee fereyhaytô sanat tikka 'yeh, qusba sanat culeemih tabanhaytoh ayro tikka 'te saaku, YALLIH qande maqar luk yol gacteeh, too qande fayya yoo hayteeh yoo beyteh.

² Yalli isi wacyih Israayil rasu fan yoo beeh, Yarusalaam magaalal tan kaxxa qaleh amol yoo hee. Too qalek gabbi-qaxat magaalah innal xissinte qarwa uble.

³ Tokke fanah yoo bee. Too waqdi nacaas innah liliq iyya num uble. Too num qarih akak culan daaratih afal soolah uble. *Baftak bicsen boor kee baaxo edde yamittiren caxxa gabat luk yen.

⁴ Woo num yok iyyeemih, «Bani-adantow, akke akah temeetem, anu koo aybulleem nagay ankacissuuy cubbusseh raqta'gidi kinnuk, intih wagitaay tublem Israayil marah waris» yok iyye.

AYRÔ-MAWQA GASOH AFA

⁵ Anu ublem, Yallih Qibaadah-Qarik ten. Too Qibaadah-Qarit gaso maroh ten. Too num baaxo edde yamittiren caxxay sidiica mitri xexxaarah yakkehiyya bahha heeh, Qibaadâ-Qarit maroh heen gaso edde yimittire. Too gasok gidaar fayyah sidooca mitri akkuk yeneeh, masuh sidooca mitri akkuk yen.

⁶ Tohuk gaba kalla hee waqdi, daarat akak yawqen afay ayrô-mawqa le kabut af cabtahiyya fanah gexe. Tokkek mawqeena yewqeeh; amo guffu hee waqdi, dagaak guba fanah culma takkeh gide yimittire. Sidooca mitri xexxaarah tekke.

⁷ Culmak gitak akak gacan aracak gura kee migdi le kabut sidooca aracay dacayri-mari elle soolahiyya yen. Woo arooca sittat lecey akkuk teneeh; kulli arac affara kaalib luk yen. Woo *ruknittek kulli *rukni sidooca mitri akkuk yen. Ken fanal ten gidaar masuh namma mitri kee garab akkuk yen. Woo dacayrih yan mari elle soola arac kee Qibaadâ-Qarik afa le kabut raaqa daarat fan akak yawqen goliy Qibaadâ-Qarit afa cabahiyyak fanat, akak taban aracay xexxaarah sidooca mitri yakkehiyya yen.

^8-9 Too goliy akak yawqeenihiyya yimittire waqdi, affara mitri xexxaarah yekke. Too goli, too culmal raqte aroocak Qibaadâ-Qarit xayuk yeneeh; woo golik gidaarwa masuh inki mitri akkuk ten.

¹⁰ Dacayrih yan marih aroocay woo gitah gacan aracak tattabat raqtahiyya nabnah inki gide akkuk ten. Keenik fanal tan gidaarwa kaadu masuh inki gide akkuk ten.

¹¹ Tohuk lakal culma le kabuk raqta gitah akak gacan arac baguh yakkeh gide yimittire waqdi, tittat laca mitri kee garab tekke. Fakimit tan culmah akak culan namma afak fanat tan faxo yimittire waqdi koona mitri tekke.

¹² Woo dacayrih yan marih sidooca aracak foocat, qunxa gidaaray amok fayyah mitrik garab yakkeeh, masuh kaadu mitrik garab yakkehiyya yen. Too aroocak kulli arac affara kaalib luk yeneeh, kulli *rukni xexxaarah sidooca mitri akkuk yen.

¹³ Dacayri-marih aracak tiyak teenak xabba haanamaay, nammeyhaytô dacayrih yan numih aracak gitah gacan foxok foocat raaqa aracak ellecabo fan yimittire waqdi, taban kee nammay kee garab mitri yekke.

¹⁴ Culmak ellecabot raaqa arac daarat fanah beyak yen. Too arac kaadu yimittire waqdi baguh tabna mitri yekke.

¹⁵ Culmak afal tan gidaarak xabba haanamaay ellecaboh arac edde raaqa ikkeh amma 'yaanam, labaatanna kee koona mitri tekke.

¹⁶ Woo aroocak afa le kabut raqta gidaarwa qunxa afoofî-xaylo luk ten. Tonnah kaadu adda le kabu raqta gidaarway aroocak fanal tanihiyya qunxa afoofi luk ten. Gitah akak gacan aracak foocat tan adda le kabu raqta gidaarwa, bilqah heen nakli-tasaawirih bagul luk ten.

AFA LE KABUL RAAQA DAARAT

¹⁷ Sarrak too num Qibaadâ-Qari akak culan afak daarat fanah yoo bee. Tokkel woo irô-kabu raqta gasot xakabuh xisen soddom goli yen. Too soddom golik foocat xeet qalumuh elle heen arac yen.

¹⁸ Too aracay qalumuk bicseenihiyya xexxaarah daaratak a kabuuy woo kabu akkuk yen. Qibaadâ-Qarik afa le kabut raaqa daarat, adda le kabut raaqa daaratak ramma axcuk raaqa.

¹⁹ Adda le kabut raaqa daaratih fan koo beyta culma fayya le aracal ten. Woo num woo namma culmak fanal raqta baaxo xexxaarah takkeh gide yimittire waqdi, kontom mitri tekke.

KILBAT LE KABUT GASOH AFA

²⁰ Tohuk lakal, woo num kilbat le kabut raqta culmay afa le kabu raaqa daarat fan beytahiyya yimittire.

²¹ Gitah akak gacan aracak gura kee migda le kabut raaqa dacayrih yan marih sidooca aracaay, woo lica aracak kulli aracat tan gidaarwa kee, Qibaadâ-Qari akak culan naharsi goli yakkeemiik inkih, ayrô-mawqa le kabut raqqa 'ta culmak kaxxih, inki gide akkuk ten. Culma xexxaarah labaatanna kee koona mitri akkuk teneeh, baguh taban kee nammay kee garab akkuk ten.

²² Qibaadâ-Qarih adda akak culan naharsi goli kee taagoota kee nakli-tasaawir inkih ayrô-mawqa le kabut raqta afah innah akak ten. Malcina rankok lakal mawqeena bukka inta way, woo culma fanah tamaate. Too culmak ellecabot raaqa arac daaratat af luk raaqa.

²³ Ayrô-mawqa le kabut raqta culmal akah tene'nnah, kilbatak adda le kabut raaqa daarat fanah beyta gersi culma ten. Too num too namma culmak fanal raqta baaxo xexxaarah takkeh gide yimittire waqdi, kontom mitri tekke.

GABBI-QAXIH GASOH AFA

²⁴ Sarrak woo num gabbi-qaxal yoo bee. Tokkel kaadu culma uble. Too culmaak addah akak culan naharsi goli kee, gura kee migdak tan gidaarwa yimittire waqdi, gersi culmah gide akkuk ten.

²⁵ Duma kaxxih, a culmah kabuk tan golitte taagat luk ten. Culmak afa xexxaarah labaatanna kee koona mitri akkuk ten. Baguh taban kee nammay kee garab akkuk ten.

²⁶ Wokke mawqeenay elle yawqeenihiyyak malcina ranko tawqe. Too culmak ellecabot raaqa arac daaratat af luk raaqa. Tonnah kaadu, adda le kabut raqta gidaarwak bagul, nakliita tasaawir yen. Too gidaarwa gitah akak gacan aracat afkunuk raqta.

²⁷ Tokkeek kaadu adda le kabut raaqa daarat fan beyta culma ten. Woo num woo namma culmak fanal raqta baaxo xexxaarah takkeh gide yimittire waqdi, kontom mitri tekke.

ADDA LE DAARATAK GABBI-QAXAT RAQTA AFA

²⁸ Too num gabbi-qaxat raqta culmaak adda le kabut raaqa daaratih fan yoo bee. A culma takkeh gide yimittire waqdi, gersi culmah gide akkuk ten.

^29-30 Dacayrih yan marih arooca kee, adda akak culan naharsi goli kee, Qibaadâ-Qarih adda le kabut raqta gidaarwa inkih, too naharak uble culmah innah ten. A culmah addal tan arooca kaadu taagoota luk ten. Ta culma xexxaarah tittat labaatanna kee koona mitrik teneeh, baguh taban kee nammay kee garab ten.

³¹ Akak culan naharsi goli, afa le kabu raaqa daarat fan afkunuk yen. Bilqah heen nakli-tasaawir gitah akak gacan arac gexxa 'yam gidaar bagul taswiirih yen. Afa le kabu raaqa daaratak bacra rankok lakal mawqeena bukka inta way, woo culma fanah tamaate.

ADDA LE DAARATAK AYRÔ-MAWQAT RAQTA AFA

³² Tokkeek too num ayrô-mawqa le kabut raqta culmaak, Qibaadâ-Qarik adda le kabut raaqa daarat fanah yoo bee. Too culma takkeh gide yimittireh. Too culma nabnah gersi culmah gide akkuk ten.

³³ Dacayrih yan marih arooca kee, culma akak culan naharsi goli kee, adda kabut raqta gidaarwa inkih, too duma yimittire dacayri-marih arooca kee, culma akak culan naharsi goli kee, adda kabut raqta gidaarwa gide tekke. Dariifat inkih taagoota akak teneeh; addah akak culan naharsi goli kaadu dariifat taagoota luk yen. Tittat xexxaarah labaatanna kee koona mitri akkuk yen. Baguh taban kee nammay kee garab mitrik akkuk yen.

³⁴ Akak culan naharsi goli, afa le kabu raaqa daaratih foocal yen. Gitah akak gacan arac gexxa 'yam tan gidaarwah bagul bilqah heen nakli-tasaawir yen. Daarataak bacra ranko bukka inta way, too culma fanah tamaate.

ADDA LE DAARATAK KILBAT-LE-QAXAT RAQTA AFA

³⁵ Tokkeek too num kilbat le kabut raqta culma fanah yoo beeh, tokke kaadu yimittireh. Too culma nabnah gersi culmah gide akkuk ten.

³⁶ Aki culma kaxxih, dacayrih yan marih aroocaay, adda le kabut raqta gidaarway bilqah heenihiyya kee, akak culan naharsi goli kee, rooruh tan taagoota luk ten. Tittat xexxaarah labaatanna kee koona mitri akkuk ten. Baguh taban kee namma mitri kee garab akkuk ten.

³⁷ Akak culan naharsi goli, afa le kabu raaqa daaratat afkanuk raaqa. Gitah gacan arac gexxa 'yam tan gidaarwah bagul bilqah heen nakli-tasaawir yen. Daarataak culma akak culan naharsi goli fan, koo tayyaaqe bacra ranko le mawqeena ten.

KILBAT LE KABUT GASOH AFAT XAYI QARWA

³⁸ Culma akak culan naharsi golik garit, xisen qari yen. Cado akak carrisan saqih cado, naharal elle kaqlisaanam tokkek ten.

³⁹ Culma akak culan naharsi golih addal, affara miiziy titta fanah yafkunehiyya yen. Woo affara miizik nammayay kabul yen. Cado inkih akak carrisan saq kee, dambi-kalootuh-baahan-sadgat kee, edde-asen-qellatih-cakkih-baahan-saqa elle asguuduk yeneenim, ta miizwah bagu.

⁴⁰ Too qarik iro le kabul, affara miiziy titta ceelahiyya yen. Too affara miizik nammay qari akak culan mawqeenak kabuk teenal yeneeh; aki nammay mawqeenak gersi kabul yen.

⁴¹ Tonnal sadgatah baahan saq elle yasguuden miizwa tittat bacaar akkuk ten. Woo bacaarak fereey qari addal yeneeh, fereey kaadu afal daaratal yen.

⁴² Cado akak carrisan saq elle yasguuden miizway fereey akkuk tenehiyya akak bicseenim, orra heen xeetik ten. Woo miizwak kulli miiz fayyah mitrik garab akkuk yen. Baguh inki ibih faraaqoh gid yakke affara kaalib luk yen. Saq sadgatah qidan waqdi edde taamitta 'yan duyye inkih, woo miizih amol ten.

⁴³ Gidaarwal duyye edde takran duyyey fallakka lehiyyak kulli tiy akak gaba gennaqtah gide takkehiyya ten. Sadgatah qidan saqih cado elle haak yeneenim, miizwah amok ten.

⁴⁴ Sarrak too num adda le kabut raaqa daarat fanah yoo bee. Tokkel adda kabu raaqa daaratat namma goli uble. Too golik tiyak teeni kilbat le kabut raqta culmak garit yeneeh, gabbi-qaxa fanah afkunuk yen. Tiyak teeni kaadu gabbi-qaxat raqta culmak garit yeneeh, kilbat le kabu fanah afkunuk yen.

⁴⁵ Too num yok iyyeemih, «Ama gabbi-qaxa fan yafkune goli, a Qibaadah-Qarih addal Yallih taamat tan seeka elle taamitta goli» yok iyye.

⁴⁶ Kilbat le kabu fanah yafkune goli, sadgat elle aban aracat tan seeka elle taamitta goli. Seeka inkih, Leewi deqsitta kedok migaaqah Saaduk deqsitak yen numuk rade mara. YALLIH xaqul YALLIH taamat gacaanam akah oggolsintem, dibuk keeni.

ADDA LE KABUT RAAQA DAARAT KEE QIBAADÂ-QARI

⁴⁷ Sarrak a num adda le kabut raaqa daarat yakkeh gide affara kaalib akak yimittire waqdi, kontom mitri yekke. Qibaadâ-Qari elle yenem, ayrô-culma le kabuk teneeh; foocat kaak sadgat elle aban arac yen.

⁴⁸ Tohuk lakal Qibaadâ-Qarih adda akak culan naharsi goli fanah yoo bee. Addah akak culan afa yimittire waqdi, xexxaarah namma mitri kee garab tekkeeh, baguh malcina mitri tekke. Gura kee migdak tan gidaarwak kulli gidaar masuh mitri kee garab akkuk yen.

⁴⁹ Tokkeek Qibaadâ-Qari akak culan naharsi goli fan koo tayyaaqe mawqeena ten. Too goli baguh tabna mitri akkuk yeneeh, xexxaarah lica mitri akkuk yen. Too culmak gura kee migdal namma qamidduy sooliseenihiyya yen.