Yacedkel 4 - NABUWWA KEE MALIKWA

YACEDKEL YARUSALAAM MAGAALAY MAROT TANIHIYYAH AFAL TAAMITAK YEN

¹ Yalli kaadu yok iyyeemih, «Bani-adantow, gexay kallak bicsen xaa baahay foocal isik daffes. Too xaak bagul Yarusalaam magaala ceela taswiir bicis.

² Yarusalaam marot heeloonum taybulle asta takke'gidih, too taswiirih a kabu kee woo kabul boodooda dagaay bullaaqe tittak bagul haak, eded bicis. Qaskar arooca kee megdebwa edde yaggilen mansafitte bicis.

³ Birtak bicsen buuti bahha haay is kee magaalak fanal gidaar innah soolis. Too waqdi magaala fanah ufkun. Tama magaalat maro heeloonu'mmay, ceelallo akak takkem koo. Taham Israayil marah asta akkele.

^4-5 «Taway kaadu guri tattabah deerih gac. Too waqdi Israayil mari abba heeh yan dambi kol oobiseyyo. Sidiica bool kee sagla-tabanih ayro Israayil mari baahe umaaneh digaalah, tama'kkel deerih sugetto. Ken edde digaalu waa sanootah gide, ayrok digaalah kol heeyyo.

⁶ Tohuk gaba kalta saaku kaadu aki tattabah gacettooh; Yuudâ-mari baahe baatilih morootom ayro biyaakat sugetto. Sanootak ken digaalu waah gide ayrok digaalah kol gacele.

⁷ «Taway Yarusalaamat haan maro fanah wagga hay. Yarusalaamal feera escessa haay, teetit takku waytaamak tableemit yab.

⁸ Yarusalaamat haan maro gaba kale'kal tanim fanah, tattabaak tattabah kortaamak akatat koo axeeyyo.

⁹ «Taway kaadu gexay kamadi kee gabru deqsitta darooy, loosuuy qatra kee qas-daro esgella hay gaqambo akak bicis. Too gaqambo sidiica bool kee sagla-tabanih ayroy deerih sugtu waytahiyya akamuk sugetto.

¹⁰ Ayrol maaqok kiilok fereyhaytoh af adoobitetto. Geeri ayroh koo cayissam koh raqta'gidih, too koh hee saaqatal akmetto.

¹¹ Leek kaadu ayrol namma kobbaaya koh hee saaqatal aaqubetto.

¹² Sahdah caara oskonoonocca haay, gira akak urusaay; too giral gaqambo bicisaay, woo gaqambo sahda koo elle table aracal akum» yok iyye.

¹³ YALLI iyyeemih, «Tahamak maqna, Israayil mari anu fixixih ken elle ruubu waa marin baaxol caraamak tan maaqo akmelon 'yaanama» yok iyye.

¹⁴ Anu too waqdi, «Aleey, YALLAW, Mulki le Dageltaw, tahamaay akke waytay bas! Anu ahaydumah annah tan nadaasat ase saaku mayyu. Qunxaaneey akke isih rabe saq kee ali qide saqih cado kinni-way okmeh maaxiga. Caraamak tanim okme saaku mayyu, yi Dageltaw» exce.

¹⁵ Too waqdi YALLI yok iyyeemih, «Wonnal hay meqehik, sinam caarih aftok laahi robba bahha haay, bocoh aftok gira edde urusay, too giral gaqambo bicisay akum» yok iyye.

¹⁶ Sarrak yok iyyeemih, «Bani-adantow, Yarusalaam mari geyak suge maaqo akah gee waan innah abeyyo. Wokkel yan mari meysi luk yakme maaqo miizaanal keexak akmeleeh; yaaquben lee keexol keenih aceeyyoh, axaxitak aaqubelon.

¹⁷ Lee kee gaqambo keenik ambaxele. Too waqdi tahaysa tanim mali 'yaanamal titta wagga heelon. Tohuk lakal aben dambih sabbatah, xagar keenik boolaatakaay qakkootak qakkootelon» yok iyye.