Yacedkel 39 - NABUWWA KEE MALIKWA

GOOG ABE BOOLA

¹ Yalli kaadu yok iyyeemih, «Bani-adantow, Goog abina ilaaqaay, kaat takku waytaamat yab. Kaak intaamah, ‹YALLAY Mulki lehiyya kok iyyaamah, Mesek kee Tuubal deqsitta namma kedoh abbah yan Googow, anu naqboyta kok ekkeh an.

² Elle gexak sugte kaalib kok makka heeh, elle tan kilbat le kabuk xer rikek koo miraacisak, Israayil qaleelal tan Israayil ummat gaadda'gidih koo baaheyyo.

³ Tohuk lakal koo aatukeyyooh, gayse guri gabak kok akah radaah gaysê-baxi kaadu migdi gabak kok akah radda'nnah abeyyo.

⁴ Koo kee ku qaskar kee, ku qaxat gacca 'teh ko'lih qeebi abta'gidih temeete qaskar ambaxeleeh; raysi siinik Israayil qaleelal raaqele. Raysa siinik haada kee alluwwâ maaqo abeyyo.

⁵ Kaxxa booxak bagul ginaada kok raaqele. Tahat yabtam yoo YALLAY Mulki lehiyya› inxic» iyye.

⁶ «Magoog rasu kee baddi afal amaanah xinta ummat elle tan rasut gira ruubeyyo. Too saaku anu YALLA kinniyom kulli num yok aaxigele.

⁷ Yi migaaqay taahirik yani Israayil ummatay yi ummatah tanihiyyah addal akah yamixxige'nnah abeyyo. Tahak wadir ceele-waa migaq yoh abaanam maqansiisa. Tohuk wadir gersi baaxol yan mari inkih, anu Israayil rasul taahirik yan Dagelta kinniyom yok aaxigelon.

⁸ Amaatele exce ayro amaateleeh raq matalla. Tahat yabtam yoo YALLAY Mulki lehiyya› » iyye.

⁹ Qagseh YALLAY Mulki lehiyya iyyeemih, «Israayil magaaloolih addal tan ummat, carbi silaacay baaxot radehiyya onkossa heenih girâ-bocoh heelon. Tohumuu, qunxa gob kee kaxxa goobwaay, gayseesa kee gaysê-xaylo kee, qeebi edde aban coox kee macaxwa inkih, gaabossa heenih bocoh haysitelon. Too silaacay girâ-bocoh haysiteenihiyya malcina sanatah bocoh dudda ken heele.

¹⁰ Too silac girâ-bocoh haysiteloonuuh; tohuk gexxaamah bocô-goranah coox elle yan booxa magexaanaay, garbok bocoh coox mayargiqan. Ken warare mara warareloonuuh, ken buube mara buubelon. Tahat yabtam yoo YALLAY Mulki lehiyya» iyye.

GOOG KABRI

¹¹ «Toh inkih takku wayta saaku, Rabe Bad deqsita badak ayrô-mawqa le kabut raqta Safarah Gacan-Golo deqsitta goloh addal, Goog elle yaaguqeeni'gidih, arac aceeyyo. Goog kee kay qaskar too aracal aaguqeloonuuh; tohuk lakal sinam tokke safarah magacan. Too arac Goog le Mango Qaskarih Golo deqsitele.

¹² Israayil marat too axxul le raysa uguqqaay, too arac fiyya haanam malcina alsa keenik beele.

¹³ Woo baaxol enna 'ya mari woo raysa aaguqelon. Oson toh abeenimih sabbatah, yi nabna ayballayu waa ayrot, oson migaq geelon. Tahat yabtam yoo YALLAY Mulki lehiyya» iyye.

¹⁴ «Woo malcina alsi gaba kalek lakal, baaxol raaqe raysa aagaquk baaxo taahirroysa'gidih, raysa gorrisu waa mara doorelon. Too mari malcina alsih gide too goranat gacele.

¹⁵ Woo baaxoh addal elle meekitaanamal sahda lafa geyan waqdi, xaqut kaak asta heenih cabelon. Tonnal kabri daga mari yamaate waqdi, too lafa Goog le Mango Qaskarih Goloh addal aaguqelon.

¹⁶ Tohiital Caman deqsitta magaala anele. Caman 'yaanamak maqna Mango 'yaanama. Tonnah abak baaxo taahirroyselon.»

¹⁷ YALLAY Mulki lehiyya yok iyyeemih, «Bani-adantow, anu keenih bicse sadgat yattakammeeni'gidih, haada kee alluwwah sec. ‹Israayil qaleelah amol kaxxa sadgat akkele. Tokkel alluwwa kee haaday, sahdâ qabal kee cado yakmeeni'gidih ama› keenik inxic.

¹⁸ ‹Qaskar raysak cado akmettoonuuh, baad abbobtih qabala aaqubetton. Yakkeenimiik, maruw akkiiy ida akki reyta akkiiy, hinnay kaadu, ariiqo bahsiisen awur akki elle yasguuden innal, ken asguudelon.

¹⁹ Ta mara anu sadgatah qidu waa saaku, isin gabul le cadok dudda haytaanam keenik akmetton. Qabalak keenik cayya intaanam fan aaqabuk sugetton.

²⁰ Anu siinih xayyoosa maaqok faras takku, faras amot gexa marih cado takku, qaskar takku, wohuk kalah tan labhay qeebi abtahiyyah cado takku, dudda haanaah gide akak akmetton. Tahat yabtam yoo YALLAY Mulki lehiyya› 'yaanam keenik inxic» iyye.

ISRAAYIL MADAARA

²¹ Yalli iyyeemih, «Inni nabna irô baaxoh mara aybulleeyyo. Inni cokmi aybulle'gidih gaba qida saaku, yi gaba le'nna aybulleeyyo.

²² Israayil mari tohuk wadir YALLAY ken Dagelta kinniyom yok aaxaguk raaqele.

²³ Israayil mara seewah marin baaxo akah beenim, ken umaane kee yol baahen ceele wayto kinnim, gersi baaxoh ummat inkih aaxigele. Anu too waqdi darre keenit cabeeh, ken naqboytit carbil keenik akah tayse'nnah abe. Qeebit raben.

²⁴ Darre keenit cabeeh, oson aben umaane kee dambik gexxaamah ken celta digaala keenit abe» iyye.

²⁵ YALLAY Mulki lehiyya iyyeemih, «Anu a saaku, Yaqkuubuk rade marah racmateyyo. Ahak sarra akah sugen gaddaleela ken abeyyo. Inni migaaqay taahirik yani dacriseyyo.

^26-27 Anu taahirik yan Dagelta kinniyom sahda aybulle'gidih, inni mara naqboytit lih elle yanin aracak ayyaaqeyyo. Ahak sarra isinni baaxoy num ken elle meysiise waahiyya uduurra 'yeenih amaanah xiinoonu waan saaku, duma yok yexxeereenim kassa haan waqdi wacarriyelon.

²⁸ Too waqdi yi mari anu YALLAAY; ken Dagelta yoo kinnim aaxigelon. Ah elle yaaxigoonu waanam, duma innih seewah ken ruubeeh a saaku wadir gaabossa ken heeh, num keenik cabe'kal, inkih ken rasu ken gacsaamal yok aaxigelon.

²⁹ Israayil marat inni Roocaaniyya heeyyo. Tahak wadir darre keenit macaba. Tahat yabtam yoo YALLAY Mulki lehiyya» iyye.