Yacedkel 38 - NABUWWA KEE MALIKWA

GOOG YALLIH SILAACA

¹ YALLIH qangara yol obteeh; yok iyyeemih:

² «Bani-adantow, Magoog rasuk Mesek kee Tuubal deqsitta namma kedoh abbah yan Goog deqsita numih abina ilaaqaay, kaat takku waytaamat yab.

³ Kaak intaamah: YALLAY Mulki lehiyya, ‹Naqboyta kok ekkeh an› kok iyyah yan.

⁴ Sanat santiita kok hayya heeh, koo kee ku qaskar qusba yaahatal ayfukuneyyo. Qaskaray faaris amok qeebi abtahiyyak mangom lito. Kulli qaskariiti gob kee seefit tikyah yan. Takkay immay koo kee ku qaskar fixixiseyyo.

⁵ Fursi kee Kuus kee Fuut rasuk yemeete mari ken lih yan. Too mari inkih gob loonuuh amot dacayrih haan birti-kalabta lon. Koo catoonuh bical yanin.

⁶ Qeebi abta labhak Goomar kee kilbat le kabuk xer rikel yan Beet-Togarma mari inkih ko'lih yan. Wohuk kalah mango baaxoh mari ko'lih yan.

⁷ Bica kok axce. Qaskar inkih, atu ken amrisa waqdi, bical gactay.

⁸ Uli baaxoy mango baaxol sugte ummatta tittal uduurra 'teh titta lih elle tanihiyya tan. Ta baaxoh mari carbi meysi mali. Mango sanatak lakal, too baaxo akah tabbixe innah koo ruubeyyo. Toh Israayil rasuuy; mango dabaanah Israayil qaleeli dibuk suge. Num sinniih lac sinni rasuh suge'mmay, a saaku woo mari woo qaleelal amaanah xiinan. Takkay immay too marat atu qeebi abetto.

⁹ Koo kee ku qaskar kee, wohuk kalah, mango baaxok yemeete mari sin lih gacca 'yeh, caacoh innal, ken wararetton. Inkih tan baaxo qamburreh innah buuletton» iyye.

¹⁰ YALLAY Mulki lehiyya Goog giddinaamak iyyaamah, «Too ayro gufta saaku, uma malah malsetto.

¹¹ Cato sinni baaxoh maray carbi able weeh, amaanah xiinaah, gaso sinni magaaloolil yanihiyya qeebit tabbixeemil malsetto.

¹² Dumî dabaanal abuuruh sugte baaxol a saaku amaanah xiina mara wararettoh buubetto. Too warartu wayta mari, mango marih addak yemeete mara. A saaku mango lac kee duyye lon. Dabaaqah baadak cundubul yanin.

¹³ Saba kee Dadan deqsita rasuk yemeete mara kee, wohuk kalah, Isbaaniya rasuk yemeete badaaqat aba mari kok iyyu waamah, ‹Qaskar luk amma 'teh qeebi sinaamat akah abtem, duyye keenik buubta'gidi innaa? Dahab kee lakqo kee lac kee duyye buubba hayteh gabat luk gexxam maay faxxaa?› kok axcelon» iyye.

¹⁴ Tohuk gexxaamah Yalli Goog warisu waa farmo yol ruube. Yok iyyeemih, «Yi Israayilih ummat amaanah elle xinta ikkel,

¹⁵ atu kilbat le kabuk dabaaqah elle tani'kkek texxeereh gexetto. Mango macaxuy celeemah yanihiyyay mango baaxok yemeetehiyya yakkeemiik faras amot amaateloonuuh ko'lih gexelon. Too waqdi ta mara wararetton.

¹⁶ Yi Israayilih ummatat caacoy baaxok baaxo gexxah innah, elle temeete innaak qeebi abetto. Sarrah yan dabaanah, yi baaxo tabbixe'gidih, koo ruubeyyo. Toh akah abu waam, raqqa 'te baaxooxah mari yoo yaaxige'gidiiy, tonnah kaadu, kol baahu waamak gexxaamah, taahirik yan Dagelta kinniyom yok yaaxigeeni'gidi» iyye.

YALLI GOOGUL BAAHU WAA DIGAALA

¹⁷ YALLAY Mulki lehiyya iyyeemih, «Atu, dumaak Israayilih tooboke inni nabuwwah afat, wakti gufa saaku Israayil marat qeebi aba num ruubeyyo akak exceh suge num kinnito» iyye.

¹⁸ «Goog Israayilit qeebi abu waa saaku, yi naqabuy gibdihiyya ambulleele. Tahat yabtam yoo YALLAY Mulki lehiyya.

¹⁹ Too saaku Israayil rasul ibak gibdi baaxoh angoyyi akkelem inni bagcarray gibdihiyyah addat aybeleeleqeyyo.

²⁰ Kullunta takkuu, kimbir takku, naba ala takku, qunxa ala takkay, baaxol ibah gexxa 'tam takku, a baadal enna 'ya bani-adanti takku, yi meysik gexxaamah axaxitele. Qaleeli radele. Boolal bokokele. Magaaloolit maroh tan gasoosa addigillele.

²¹ Googul umaaneh innah tanim baaheyyooh, akak cunxitta 'ya umaane kaal ruubeyyo. Taham intam yoo YALLAY Mulki lehiyya. Kay mari qeebih tittal aduureleeh seefit titta qidelon.

²² Toh lih kaadu dalka kee qabala tittak caxeloonuuh, tohul ken digaaleyyo. Kaa kee kay qaskar kee, wohuk kalah yan maray kay xaquk gacca 'yeh qeebih gulguluh yanihiyyal, kaxxa roobuy gira kee dani (xalol kibrik) agleh yanihiyya keenil ruubeyyo.

²³ Nabna le Dageltay taahirik yanihiyya kinniyom mango baaxoh mara tonnal aybulleeyyo. Oson YALLA kinniyom tonnal yok aaxigelon» iyye.