Yacedkel 37 - NABUWWA KEE MALIKWA

LAFOOFI LE GOLO

¹ YALLIH gaba xagaral yok gacteeh, isi Roocaaniyyat beyya yoo heeh, golok gudel daffessa yoo hee. Woo goloh addal mango lafoofi ten.

² Too waqdi Yalli too goloh addal woo qaxak a qaxah yoo meekiseeh, mango lafoofiy kaffa karacca 'tehiyya uble.

³ Too waqdi yok iyyeemih, «Bani-adantow, a lafoofi ahak wadir anuwweelem kot maay celtaa?» iyye. Anu too waqdi «YALLAW, Mulki le Dageltaw, woh atu taaxige ikkal, anu maaxiga» exce.

⁴ Too waqdi Yalli yok iyyeemih, «Ama lafoofiy kaftehiyyak, ‹YALLIH yab ankacisa› inxic.

⁵ Keenik intaamah: YALLAY Mulki le siinik iyyaamah, ‹Ufuy siinit heeyyooh, rooci siinit gacseyyo.

⁶ Ramoodaay cadoyta kee arab xagaral siinih gacseyyo. Rooci siinit gacissa heeh aynuwwee sin liyo. YALLA kinniyom too saaku aaxigetton› keenik inxic» iyye.

⁷ Anu too waqdi YALLI yok elle iyye'nnal, too lafoofi lih takku waytaamat yaabe. Too yaabat an waqdi, sasac intaamih anay yol rade. Too waqdi lafoofi tittat xakbinte.

⁸ Annah wagga hee waqdi, lafoofiy tittat xakbintehiyyal cadoyta kee ramooda aduurih uble. Sarrak arab keenil gace. Takkay immay rooci keenil gaceh mananna.

⁹ Too waqdi Yalli yok iyyeemih, «Bani-adantow, ama caacaya lih yaabaay intaamah, YALLAY Mulki lehiyya: ‹Caacayow, kulli kabuk amay, ama xagaray tablehiyyat yanuwweeni'gidih ufuy hay, kok iyyah yan› inxic» yok iyye.

¹⁰ Too waqdi caacayak, too YALLI yok inxic akah iyye'nnah, exce. Anu toh exce waqdi, too lafoofiy naharak xagar tekkehiyyat ufuy culeeh, too waqdi rooci keenil gaceeh, solla 'yen. Too mari sittat, dudda le macaxih gide yekke.

¹¹ Too waqdi Yalli yok iyyeemih, «Bani-adantow, tama lafoofi Israayil marah ceelallo. Israayil mari, ‹Nanu lafoofih innah kafneh karacca inneh nani'kkal, tahaysa xiqnam linoh manan› 'yaanam iyyan.

¹² Tonna'mmay Israayil marah takku waytaamat yaabaay, keenik intaamah: YALLAY Mulki lehiyya siinik iyyaamah, ‹Yi maraw, kabri siinik fakkaay eyyeqqa sin heeh, sin baaxo sin gacseyyo.

¹³ Kabri adda siinil fakkaay sin eyyeqqa heeh, sin baaxo sin gacisu waa saaku, yi maraw, YALLA kinniyom yok aaxigetton.

¹⁴ Inni ufuy siinit heeyyo. Rooci siinit gacseyyo. Tohuk lakal isinni baaxol dabaaqah gacetton. Too saaku yooy YALLAH yani abeyyo iyyam duudusa Dagelta kinnim yok aaxigetton. Tahat yabtam yoo YALLAY Mulki lehiyya› keenik inxic» iyye.

YUUDA KEE ISRAAYIL INKI MALIKIH XINTOH GUBAT GACTE

¹⁵ YALLIH qangara kaadu yol obteeh; yok iyyeemih:

¹⁶ «Bani-adantow, caxxa baahay, ‹Yuudâ doolat kee kaa'lih yan Israayilih yooboke mara› 'yaanam bagul akak uktub. Kaadu gersi caxxa baahay, ‹Yuusuf-Efrayim kee kaa'lih yan Israayilih yooboke mara› 'yaanam elle uktub.

¹⁷ Sarrak too namma caxxi ku gabah addat, inki caxxa akah ceela'nnah, sanah tittat xakbis.

¹⁸ Ku mari, ‹Ah macah abte?› kok iyyeenik,

¹⁹ keenik intaamah: YALLAY Mulki lehiyya iyyaamah, ‹Yuusuf-Efrayim migaq elle yan caxxa, Yuuda migaq elle yan caxxa lih haam faxa. A namma caxxa tittat gaadissa heeh inki caxxah gacissa heeh inni gabat heeyyo› keenik inxic.

²⁰ «Tama namma caxxa gabat haay sinam tabalay inxic.

²¹ Sarrak keenik intaamah: YALLAY Mulki lehiyya iyyaamah, ‹Israayil mara elle gexen baaxok bahha heeh, tittal ken kobxissa heeh ken baaxo ken gacseyyo.

²² Israayil baaxoh qaleelal inki doolat ken abeyyo. Ken titta lih xiinisa malik aallelon. Ahak wadir namma doolat mayakkan. Ken doolat namma'kkel makurrunta.

²³ Tohuk wadir, anu niqibyo xeet kee cooxuk bicsen duyyeh qibaada kee, dambi abittot nadaasa isinni maaban. Yoo hawwenna heenih abak sugen dambik qafu keenih axceyyo. Ken taahirroyseyyooh; yi ummat akkeloonuuh, anu ken Dagelta akkeyyo.

²⁴ Yi naqasuh yan Dawud innah yan malik, malik keenik akkele. Inki loynaytih gubat xiineloonuuh, yi amri kee yi xinto intam digga luk duuduselon.

²⁵ Dabaaqah, yi naqasuh yan Yaqkuubuh ecee baaxoy oson akak raden ken kaxxa abbobti duma elle sugtel gacelon. Tokkel keeniiy ken xaylo kee ken ramad guubuh gacele. Too rasi kulli way kenim akkele. Yi naqasu Malik Dawud innah yan malik tokkel ken xiinisele. Kulli way abbah keenik waarele.

²⁶ Anu qahdi ken lih haysiteyyooh, too qahdi amaanah ken xiiniseyyoomuh digga keenih akkele. Ken xiseyyooh, ixxima keenik aymaggeyyooh; inni Qibaadah-Qariy tokkek way kate waahiyya too baaxol heeyyo.

²⁷ Innih ken addal gaceyyo; innih ken Dagelta akkeyyooh, oson kaadu yi mara akkelon.

²⁸ Yi Qibaadah-Qariy way kate waahiyya tokkel hayu waa saaku, irô baaxoh ummat inkih, Israayil mara isi mara abtem yoo YALLA kinnim aaxigelon› 'yaanam iyya, keenik inxic» yok iyye.