Yacedkel 36 - NABUWWA KEE MALIKWA

YALLI ISRAAYILIT BARKAT HEELE

^1-2 Yalli iyyeemih, «Bani-adantow, Israayil qaleelat takku waytaamat yab. Yoo YALLAY Mulki lehiyya ken lih yaaba yab ankacisa keenik inxic. Israayil naqboytit kaxxiinat, ‹A qaleeli niimi› 'yaanam iyyen.

³ «Hay tonnal takku waytaamat yaabaay, keenik intaamah: YALLAY Mulki lehiyya iyyaamah, Israayilik cuggaaneh yan mari Israayil qaleela yibbixeeh ken buube saaku, ken gabal gacteenih; too mari sin bursuteeh anqaasah af siinil raqeeqise.

⁴ Tonna-leemiik dariifal yan mari elle anqaasaah buuben qaleelaay koomaamiiy, daqooruuy, gololwa kee abuuruh raqte aroocaay, tonnah kaadu, abur aben magaalooliy, takkeenimiik, yoo YALLAY Mulki lehiyya siinik axcem oobbeya.

⁵ «Yoo YALLAY Mulki lehiyya dariifal tan baaxooxah mara luk naqabut yaabah aniih, axcihiiy Edom lih naqabut yaaba. Yi baaxo been saaku farcatah rabakaay, iyyi maca nek abele 'yaanamah beeniih, saqi elle yaloole arooca isinnih haysiten.

⁶ «Tohih sabbatah taway Israayil baaxot takku waytaamat yaabaay, qaleela kee koomaamiiy daqor kee goloolah, yoo YALLAY Mulki lehiyya sahda keenit abte bura ubleemih sabbatah, edde an naqabu luk axcem waris.

⁷ Dariifal enna 'ta baaxooxa qaybit ken qideyyoomuh, kaxxa xiibah xiibita'mmay,

⁸ yi Israayiliy, qaleela ayyuufa siinih baaheleeh, caxâ-miru siinih xalele. Ahaysa isinni baaxo xayuk gacetton.

⁹ Anu kaadu sin qaxat aniih, baaxol buqre abqurettoonuuh, away kaadu darqi elle aabukelem siinih diggoysa.

¹⁰ Israayil ummatey, sin aymaggeyyooh, magaalooli fan sin gacseyyo. Tiddigille qarwa nammeyhaak xisetton.

¹¹ Ummat kee lac aymaggeyyo. Mango xaylo xalettoonuuh, dumak amaggetton. Dumak akah sugten innah tanoonay sin axceyyo. Dumak fuli gaddaliino siinit heeyyo. YALLA kinniyom too saaku yok aaxigetton.

¹² Yi Israayilih ummatey, sin baaxo fanah sin gacseyyo. Tahaysa ta baaxo sin ikoyta akkeleeh, xaylo siinik rabi mahayta» iyye.

¹³ «YALLAY Mulki lehiyya qagseh iyyaamah: sahda a baaxok intaamah, ‹A baaxo sinam takmeeh, isi marih xaylo selteh› 'yaanam iyyan.

¹⁴ Ta tiyak yoo YALLAY Mulki lehiyya axceemih, Ta baaxo tahak wadir, sinam takmeeh sin xaylo selta baaxo matakka. Tahat yabtam yoo YALLAY Mulki lehiyya.

¹⁵ Tahak wadir a baaxo ummat makot mabeytaay; sahda anqaasah elle rabtaah, ummat burah af elle raqeeqissa baaxo matakka. Tahat yabtam yoo YALLAY Mulki lehiyya» iyye.

ISRAAYIL QUSBA MANO

¹⁶ Kaadu YALLIH qangara yol obteeh; yok iyyeemih:

¹⁷ «Bani-adantow, Israayil mari isi baaxol suge saaku, ken qamal kee ken uma-taama a baaxo nadaasa abte. Ken qamal yi garil wasaktuk taahirroowe wayte barrah gide yol luk suge.

¹⁸ Isinni baaxoh addal, sahdat abak sugen qidiyya kee, xeet kee cooxuk bicsen duyyeeyah aban qibaadah sabbatah, yi naqbi le'nna yabloonay ken exce.

¹⁹ Oson abak sugen umaane kee ken qamalal keenil mekle. Ummat addat baxacah ken ruubeeh, aaxige waan marih fanat ken fixixise.

²⁰ Elle gexinnaan baaxol yi migaaqay taahirik yanihiyya baysen. Toh mannalaay intek, ‹Ama mari YALLIH marak tene'mmay, a saaku kay baaxo cabeenih gexaanah yanin› 'yaanam iyyaanaah; yi migaq keenil xagan.

²¹ Oson gexinnaan baaxol ken sabbatah yi migaaqay taahirik yani xaggiimaah, toh yol umah.

²² «Tonna'mmay taway Israayil marak intaamah, ‹YALLAY Mulki lehiyya iyyaamah: Taway abu waam akah abu waam, Israayil marih taaga hinna'mmay, inni migaaqay taahirik yanih taagah aba› keenik inxic. ‹Isin elle gexinnaan baaxol yi migaq bayisak sugten› keenik inxic.

²³ Yi migaaqay taahirik yanihiyyay isin bayisak sugteenihiyya ummatah qaddoysu waa saaku, anu YALLA kinniyom aaxigelon. Siinih abu waamat, gersi baaxol yan mari saytun Dagelta kinniyom yok aaxigelon. Tahat yabtam yoo YALLAY Mulki lehiyya.

²⁴ Macaay inteenik, kulli doolat kee baaxoh addak bahha sin heeh, sin baaxo sin heeyyo.

²⁵ Xeet kee cooxuk bicsen duyyey aqbuduk sugteenihiyyah nadaasak taahirrowtaana'gidih, taahirik tan leet sin rifeyyo. Liton nadaasak sin kaqliseyyo.

²⁶ Qusba afqado kee qusba misinkaca siinit heeyyo. Xaak yan lubbi siinik kalla heeh, algin lubbi siinit heeyyo.

²⁷ Inni Roocaaniyya siinit heeyyo. Siinil ecee amri kee madqa duudusa mara sin abeyyo.

²⁸ Sin kaxxa abbobtih ecee baaxol nooketton. Yi mara akkettoonuuh; sin Dagelta akkeyyo.

²⁹ Nadaasa sin abba haytaamak, innih sin waaseyyo. Qulul sin akah gee waa innah, daro siinih tamaggay axceyyo.

³⁰ Coox-xaylo kee buqrek daro siinih aymaggeyyooh; tohuk gexxaamah, ummat addal qawratak sin qida qulul matablan.

³¹ Isinni uma-qamal kee qellatay edde asak sugteenihiyya siinih ambulleele. Too waqdi abak sugten dambi kee ceele-waytoy edde sugteenihiyyak gexxaamah, isinni nabsi inqibba heetton.

³² Tonna'mmay Israayil ummatey, aaxigeh meqeemih, tahak wadir abba haam inkih akah abam, sin taaga hinna'mmay, inni migaaqih taaga kinni. Abteenimik gexxaamah qaybi kee wacarriy sin yabbixay! Tahat yabtam yoo YALLAY Mulki lehiyya» iyye.

³³ YALLAY Mulki lehiyya iyyeemih, «Naharak sin taahirrossa heek sarra, isinni magaalah addal gacca 'teenih tiddigille qarwa akah xissittan innah siinih abeyyo.

³⁴ Duma buqre elle abak tenen baaxoh xaquk, gitah gaca mari woo buqre baatem abaluk sugen. Ahak wadir woo arooca abqurettonuuh, daro elle aysubuketton.

³⁵ Tah yabalu waa mari, ‹A baaxoy bacari tekkeh sugtehiyya a saaku Qadan bustaan celteh tan. A magaalooliy buubba heenih bututtukku heenih abur abeenih cabeenihiyya, a saaku ummat elle gacteh taniih gasoosa maroh leh tan› axcelon.

³⁶ Too saaku a baatik nagay raqte ummatay cuggaaneh siinik tanihiyya, tiddigille magaalooli bicisseeh toomeh tan baaxoy bacari tekkehiyya bicissem yoo kinnim aaxigelon. Yoo YALLAY Mulki lehiyya taham abeyyoomuh xagana culaah, abeyyo» iyye.

³⁷ YALLAY Mulki lehiyya iyyeemih, «Israayil mari ahak sarra cato yol essereleeh, too waqdi illi innah ken aymaggeyyo.

³⁸ Yarusalaam magaalal duma qiddi ayro sadgatah qidan illi mangah akkuk yeneh gide, abuuruh raqteh sugte magaaloolil elle yan mari mangah woo gide akkele. Too saaku YALLA kinniyom yok aaxigelon» iyye.