Yacedkel 35 - NABUWWA KEE MALIKWA

YALLI EDOM DIGAALU WAAM WARSE

¹ YALLIH qangara yol obteeh; yok iyyeemih:

² «Bani-adantow, Edom deqsitta qaleela le baaxot takku waytaamat yab.

³ Yoo YALLAY Mulki lehiyya ummatah waris kok axcem waris. Keenik intaamah, Edom qaleelay, anu naqboyta siinik ekkeh an. Lac sinniih num sinni baaxo koo abeyyo.

⁴ Magaalooli kaadu abur siinik abeyyo. Baaxo siinik abuuruh cabeyyo. YALLA kinniyom too saaku yok aaxigetton.

⁵ «Isin dumaak Israayil ummatah qaduwwih sugteeniih; Israayil ummat isih bahte dambih digaala keenil temeete saakuy kaxxa gadaamat sugeenihiyya, isinni le kabuuk ken qidaana'gidih absissen.

⁶ Tonna-leemiik waara YALLAY Mulki lehiyya kinniyooh, inni migaaqal xiibita'mmay, rabal sin digaaleyyo. Too rabak tasillimen ikke mageytan. Baatil kee sahdâ qidimih yimixxige mara kinniton. Sin kaadu woo baatil abbixele.

⁷ Edom rasuy qaleelah tanihiyya num sinniih lac sinni baaxo abeyyooh; tokke safarah gexinnaan num qideyyo.

⁸ Qaleelah amo sahda raysak kibbiimeleeh; carbit rabu waa marih ginaada koomaami kee goloolaay daqor buulele.

⁹ Magaalooli siinik wadirik num elle gace waa abur abeyyo. Too saaku YALLA kinniyom yok aaxigetton.

¹⁰ « ‹Yuuda kee Israayil baaxo yiimiiy; oson kaadu, ikoytah lino mara› inteenih; yooy YALLA kinnihiyya elle yen baaxo isinnih haysittaanam faxxen.

¹¹ Hay tonnal, waara YALLAY Mulki lehiyya kinniyooh inni migaaqal xiibita'mmay, yi marat abten bagcarra kee keenih luk sugten kuuxewaynaan kee keenih luk sugten naqabih, cane siinil gacseyyo. Too saaku sin akah digaalam, keenil bahten umaaneh sabbatah kinnim aaxigelon.

¹² Isin kaadu ken burutak, ‹Israayil qaleela niimiiy; abuuruh raqteeh, ni gabal gacte› axcuk, yabteenim siinik oobbem aaxigetton.

¹³ Tirtirisak yi giddinaamak edde yabten yab kee ceele-waytoy inteenihiyya siinik oobbeh.

^14-15 «Tonna-leemiik yoo YALLAY Mulki lehiyya siinik axceemih, isin Israayil maray yok sah numtin mara akke waahiyyat kaxxa baati tekke saaku, farcatah akah gacca 'ten innah, anu kaadu inkih yan baad akah ifricca 'ya baati siinit abeyyo. Seeqir qaleela kee inkih yan Edom rasu num sinniih lac sinni bacarih tan baaxo abeyyo. Anu YALLA kinniyom too saaku kulli num aaxigele» iyye.