Yacedkel 34 - NABUWWA KEE MALIKWA

ISRAAYIL LOYNITTE

¹ YALLIH qangara yol obteeh; yok iyyeemih:

² Bani-adantow, Israayil abbobtit takku waytam keenih waris. Keenit takku waytam keenih warisaay keenik intaamah: YALLAY Mulki lehiyya siinik iyyaamah, «Israayil-loynittey, finqi sin yibbixeh! Isinni amo wagittaanah illi amo mawagittan.

³ Can naktaanaah, illi xagooruk bicsen sarat gactaanaah; ariiqo bahsiisen illi doorru hayteenih takmen. Takkay immay illi madacrissan.

⁴ Boola le numuk amo wagitak masuginniton; biyaakita mara daylisak masuginniton. Mudduume marak dale daylisak masuginniton. Buxak badite mara le buxah gacisak masuginniton; finqite mara gorrisak masuginniton. Aaminnaanim keenil baahak sugten; keenit xukkutak ken xiinissen.

⁵ Illi loyna luk masuginnaay, tohih sabbatah fixixih yan. Tonna-leemiik alluwwa qiddem kee tokmem yekke.

⁶ Yi illi kaxxa koomaami kee qaleelah amol meekot yen. Inkih yan baadal finqiteeniih immay ken gorriseeh ken baahe mari masuginna.

⁷ «Siini bas loynittey! Yoo YALLI siinik axcem ankacisa.

⁸ Yi illi duweena weeh, kulli num kaa haysiteeh alluwwâ gadda yekke. Yi illit duwah yan mari kaa madacrisinnaay amo kaak mawagtinnay; isi amoh dacayrih raaqe.

⁹ Tohih sabbatah illi duweenitow, yooy YALLAH yani siinik axceemih,

¹⁰ Waara YALLAY Mulki lehiyya kinniyooh inni migaaqal xiibita'mmay axceemihii, yoo YALLAY Mulki lehiyya sin naqboyta kinniyom yok ixiga. Inni illi siinik beeyyo'mmay, tahak wadir duwah siinil maaca. Ahak wadir isinni amo dacrissoonay siinik maxcay, inni illi siinik cateyyooh, akami sin mahaa.

MEQE LOYNAYTU

¹¹ «Yoo YALLAY Mulki lehiyya siinik axceemih, Inni illih goran innih abeyyooh, innih ken dacriseyyo.

¹² Illit duwah yan num baye illi gorrissa heeh elle gaaboysaah elle dacrisa gurral, anu inni illik kaadu toh abeyyo. Kaxxa dite le baatih ayro edde sugen baatik ken gacseyyo.

¹³ Marin baaxok ken gacseyyooh, inki aracal ken gaaboyseyyo. Wadir ken baaxo ken gacseyyo. Israayil baaxoy qaleela leeh buyyitte lehiyya ken gacseyyooh; akadah (agdah) yan arac ken beyya heeh, ken aylooleyyo.

¹⁴ Israayil rasul akadah tan qaleela kee goloola beyya ken heeh, wokkel ken aylooleyyo. Tokkel meysi maleh akah yaloolen innah keenik abeyyo.

¹⁵ Inni illi innih dacriseyyo. Yolooleenik lakal, elle nookan arac innih keenih heeyyo. Tahat yabtam yoo YALLAY Mulki lehiyya» iyye.

¹⁶ «Baatem innih gorriseyyo; buxak baditit tanim innih gacseyyo. Muddumtem innih dayliseyyo; lakmissam innih qaffoyseyyo. Takkay immay gabul leeh qande lem bayseyyo. Macaay inteenik, anu qadlih aninnaanim aba loyna kinniyo.

¹⁷ «Tonna'mmay yi illow, yoo YALLAY Mulki lehiyya siinik axceemih, kulli numul siinik ackumeyyo. Umam kee meqem tittak siinik baxseyyo. Illi kee wadar tittak baxseyyo.

¹⁸ Meqe qayso yakmeemih cayye waa illi siinit yan. Akme waamat taqqa 'teenih gexxan; sila le lee taaqubeeniih, isinnih aaqube waytan lee darraqossan.

¹⁹ Isin ibah edde teeqeteenih cabten qayso yi illi yakmeeh, isin darraqossen lee yi illi yaaqube.

²⁰ «Tonna-leemiik yoo YALLAY Mulki lehiyya qande le illi kee qande sinni illih fanal cokmi abeyyo.

²¹ Biyaakitta ida tenek, ganaysaqtaanaah tet giqak, illik addak xiiriyak tayyaaqen.

²² Ahaysa inni illi tahak cateyyooh; umam keenil baahi mahaa. Inni illik kulli lacal cokmi abeyyo. Meqe lac kee uma lac tittak baxseyyo.

²³ Malik Dawuduy yi naqasuh yanihiyyah innah yan loynaytu keenih heeyyo. Too loynayti ken dacrisele.

²⁴ Yoo YALLAY Mulki lehiyya, innih, ken dacrisa Dagelta akkeyyooh; Malik Dawud innah yan malik ken xiinisa'gidih abba keenik abeyyo. Taham exceh, edde maqagita.

²⁵ Ken amo amaanah akah xinta'nnah, inni kee ken fanal xagana haysiteyyo. Ken baaxol enna 'ta alluwwa bayseyyo. Tonnal yi illi inkih meysi maleh bacarih tan baaxo kee garboh addal amaanah xiineleh dacrele» iyye.

²⁶ YALLI kaadu qagseh iyyeemih, «Barkat keenit heeyyooh yi qaleelay taahirih tanih xaqul dabaaqah ken heeyyo. Tokkel faxxiima uddur rob keenih ruubeyyooh, niqmat keenil oobiseyyo.

²⁷ Coox caxâ-miru keenih xalele; buqrek daro orbisitelon. Kulli num isi baaxol amaanah keenik xiinele. Yi marak axawah edde yanin silsilat kalla heeh, naqoosah ken le marak currih ken ayyaaqu waa saaku, YALLA kinniyom yok aaxigelon.

²⁸ Irô baaxoh mari ahaysa ken mabuuba. Ahaysa alluwwa ken maqiddaay ken matakma. Sahda ken mameysissay, ahaysa amaanah xiinelon.

²⁹ Qidinnaan daro elle taabuke baaxo keenih aceeyyooh; ahaysa maqululan. Irô baaxoh mari anqaasah af keenil maraqeeqisa.

³⁰ Israayil ummat dacrissam yoo kinnim kulli num aaxigeleeh; oson yi mara kinnoonum kulli num aaxigele. Tahat yabtam yoo YALLAY Mulki lehiyya.

³¹ «Isin yi illow, innih ayloole illow, yi mara kinnitoonuuh, anu sin Dagelta kinniyo. Tahat yabtam YALLAY Mulki lehiyya» iyye.