Yacedkel 33 - NABUWWA KEE MALIKWA

YALLI YACEDKEL UMMAT DACRISA NUM ABE

¹ YALLIH qangara yol obteeh; yok iyyeemih:

² «Bani-adantow, ku baaxoh mara lih yaabaay, baaxol carbi yakku waa saaku takku waytam keenih waris. Baaxô-mari isi addak ken dacrisu waa numuy dacayrih gaca dooritaama.

³ Woo num naqboyti xayyoowem yable waqdi, ummatah garci kala'gidih baanta yaagure.

⁴ Ta anay yaabbe num aabbih tibba 'yeeh, too waqdi naqboyti amma 'yeh kaa qide kaa tekkek, too raba isik wee week, numuk wee waama.

⁵ Macaay intek, astah xongolo oobba heeh cubbil gacaamal kudeh yasillimem duudak yen.

⁶ Takkay immay dacayrih yan num naqboyta amaatih ubullaay astah baanta aagure wayya heek, tonnal naqboytit amma 'teh a marak tu qideenik, too mari isi uma-taamah rabele'mmay, too marih raba gaaxah yan numuk weeyyo.

⁷ «Hay ta way, bani-adantow, kok axceemih: Israayil marat dacayri hayu waam koo. Anu kok excem keenih warisaay garci keenih kal.

⁸ Uma-taama le numuk, ‹Atu uma-taama litooh isi qamalah rabetto› kaak axce waqdi; woo num rabak cattiima'gidih, ‹A edde tan uma taama cab› 'yaanam kaak axce wayya haytek, usuk too abak suge uma-taamat edde rabele'mmay, too numih raba kok weeyyo.

⁹ Uma-taama le num, woo uma taamak uduura 'yaanam kaak axcih, ku fayu cinna heeh woo uma taamah rabe kaa tekkek, kay rabah messertinta» yok iyye.

NUMTIN AMÔ MASUULIYATA

¹⁰ YALLI kaadu qagseh, yok iyyeemih, «Israayil marak intaamah: ‹Isin, «Nanu abne dambi kee qellat nel yemeggeh yan. Edde nanim baati. Taway tahak mannal catimnu dudnaah?» 'yaanam intan› keenik inxic.

¹¹ ‹Waara YALLAY Mulki lehiyya kinniyooh, inni migaaqal xiibita'mmay, uma taama le num isi uma taamah rabam kaak mafaxa. Woo uma taama cabba heeh mano kaak faxa. Israayil-xayloy, uma taama cabaay, manok raba madooritina› keenik inxic» iyye.

¹² Kaadu yok iyyeemih, «Bani-adantow, ku marak intaamah, Duma meqe taama luk yen num uma taamat asam baahek, duma abak suge meqe taama kaah xiqtam mali, inxic. Uma num uma taamak yeedeek, digaala kaal matamaata. Meqe taama luk yen num woo meqe taama cabba heeh uma taamat asek, duma abak suge maqaaneh sabbatah qafu kaah maxca. Kaa digaaleyyo.

¹³ Meqe num waareleemih qahdi kaah culek lakal, usuk isih ‹Duma abe maqaane yoo xiqtah› 'yaanam niyat hayya heeh, uma-taama qimbise kaa tekkek, duma abba hee maqaanek tut baaqid kaak maha. Takkay immay isih abe uma-taamah isih rabele.

¹⁴ Uma numut umam akkeleemih garci kaah kalek lakal, woo num woo umaane cabba heeh meqe taama fan gacek, rabi cokmi kaal mayamaata.

¹⁵ Masalan, sahda abuuduh duyye kaak beyte saaku, damaanatah luk raaqe duyyey kaak been duyye kaah gacseenik sarra luk raaqehiyya gacse kaa tekkek, hinnay kaadu, garqoh sahdak bee duyye gacseeh, uma-taama cabba heeh mano akak geyu waa xinto kataate kaa tekkek, tonnal marabay; rabi cokmi kaal mayamaatay qumri kaak raagah.

¹⁶ Dumah abeh suge dambi kaah cabeyyo. Meqeemit ase kaa tekkeeh, cakkik tanim abe kaa tekkek tonnal waarele.

¹⁷ «Tonna'mmay ku mari, ‹YALLI abam gita hinna› 'yaanam iyyan. Takkay immay gitat tanim abe waytam, yoo hinna keeni'kkal.

¹⁸ Duma cakkik tanim abak suge num woo cakki cabba heeh uma taamah abittot gacek, too umaaney edde asahiyyak gexxaamah rabele.

¹⁹ Uma-taamah abittot suge num woo umaaneh abittok raqqa 'yeh meqeemit ase kaa tekkek, tonnal too num isi rooci rabak catem deqsitele.

²⁰ Hay, Israayil maraw, isin ‹YALLI abam qadlik tanim hinna› intan. Takkay immay anu sin abto elle tani'nnal siinil mekla» keenik iyye.

YARUSALAAM BAATIH XAAGU

²¹ Seewah nee edde been taban kee nammahaytô sanatak tabanhaytoh alsak konoyhaytoh ayro, Yarusalaamak yoowweh yemeete num yol yemeeteeh, «Yarusalaam makko tekkeh» 'yaanam iyye.

²² Carra woo num yamaatek dumal, YALLIH gaba yol gacah yoh tumbulle. Saaku too num yol yamaatek dumal, akah suge duudak YALLI af yoo geysiiseh. Tohuk wadir yaabay affaruk sugehiyya yaabam qimbise.

ISRAAYIL UMMATTAH DAMBI

²³ Tohuk wadir YALLIH qangara yol obteeh; yok iyyeemih:

²⁴ «Bani-adantow, Israayil rasuy abuuruh yanihiyyak addal yan mari iyyaamah, ‹A axxul le baaxo Abraahimiy inki numuh yenehiyyah ikoytah tontocowweeh; nanu manginooh, elle nani ikkel neh kaadu ikoytah akah antacawwe waytam mali› 'yaanam iyyan.

²⁵ Tonna'mmay keenik intaamah, ‹YALLAY Mulki lehiyya siinik iyyaamah, Isin qabal akak tif iyya cado takmen. Xeet kee cooxuk bicsen duyye taqbuden. Sahda qiddan. Hay, tonnal, ta baaxo sinim akkelem mannal siinit celtaa?

²⁶ Isinni seefit kaxxiinittan. Umâ-yabulih taniimit assan. Kulli num siinik cuggaaneh siinik yan numih barrat fido faxa. Hay, too way, baaxo sinim akkelem mannal siinit celtaa?› keenik inxic.

²⁷ «Wohuk kalah keenik intaamah, ‹Yoo waara YALLAY Mulki lehiyya inni migaaqal xiibita'mmay, ama abuuruh tan magaaloolih addal yan mari ambaxele. Magaalak irol yan mara alluwwâ-gadda abeyyo. Qaleela kee gablah addat yombooqoreh yan mara biyak gadda abeyyo.

²⁸ Inkih yan rasu num sinniih lac sinni abur abeyyo. Oson kaxxam edde akkaluk sugen qande keenik bayseyyo. Ken qaleela dibuh yan aracay sahdayti gitah gace waa abeyyo.

²⁹ Oson aben dambih, ken digaalu waah baaxo keenik bacari abu waa saaku, YALLA kinniyom yok aaxigelon› » iyye.

NABI FARMOL CIGGILTEM

³⁰ YALLI kaadu iyyeemih, «Bani-adantow, ku mari magaalat maroh tan gasoh xaqu kee isinni qarwah afal yangoorowen waqdi, ku yaabat yaabaanaah, ‹YALLAK yemeete yab ankacisnu waynak nee beya› sittak iyyan.

³¹ Yi mari atu keenik intaamih ankacsah kol kobxan; elle daffeyan. Takkay immay atu aba keenik intam maaban. Atu edde yabta yab kicnoonum ceelan. Takkay immay lon inti-xeera macaban.

³² Ku yab kaalayta meqe num kacanuh aba gadah lon. Fooximâ-gurrah aytih yaabbeeni'kkal, abinal maasisan.

³³ Atu keenik inxicca 'tem, raq lem hinna, akkeleemiiy; too saaku nabi ken addat sugem aaxigelon» iyye.