Yacedkel 32 - NABUWWA KEE MALIKWA

MASRI MALIKIIY XABAADOT MISSOYSEN

¹ Seewah nee edde been taban kee nammeyhaytô sanatak taban kee nammeyhaytoh alsak inikhaytoh ayro, YALLIH qangara yol obteeh; yok iyyeemih:

² «Bani-adantow, darraqah takke boogey Masri marah aboonu waanahiyya ah teeti. Doolatwa fanat qande le lubak is takkale. Takkay immay dori addat ibak gaba tasgayye xabaadoh gide kinnito. Lee ibat kalla abteeh, darraqosseh.

³ Mango rasih mari elle gaaboowe ikkel, inni sabakat xabba koo heeh, weeqayti afal giitak koo yayyaaqoonay axceyyo.

⁴ Weeqaytuk afal bukka koo heeh baadal enna 'ta alluwwa kee kimbir yakamay koo axceyyo.

⁵ Qaleela kee goloola ku raysay abicahiyyak kibba heeyyo.

⁶ Qabal siinik qaleela bullaay dorwa kibba haam fanah caxeyyo.

⁷ Koo bayisu waa saaku, qaran kee cutuukal dite qideyyo. Ayro qamburrek darret gacele. Alsa ifu cabele.

⁸ Qaraanal yan ifu bayissa heeh, baaxo dite kol akah takke innah abeyyo. Tahat yabtam yoo YALLAY Mulki lehiyya» iyye.

⁹ Yalli kaadu qagseh iyyeemih, «Atu baytu waytaamih xaagu atu aaxige wayta baaxooxal yaabboonu waan waqdi, yaabbe mari wariggitele.

¹⁰ Anu kol baahu waam ummatal hagga akkele. Yi seef ken fan kinisu waa saaku malikwa meysih axaxitele. Celemih elle tan aracak koo kalu waa saaku ken roocih meysi ken abbixele» iyye.

¹¹ YALLAY Mulki lehiyya iyyeemih, «Baabelon malikih seef koo geele.

¹² Agiirah tan qaskaray racmattak tu sinnihiyya sibte seefit sahda kee mansafay amo elle miqito saabo kok cabsiiseyyo.

¹³ Mango lee elle aninnaan ikkel sugu waa laa siinik asguudelon. Lee darraqoosa mara kee laa maraaqa.

¹⁴ Leelwa darraqootiyyak cattiimele. Daqarwa amaanah caxitta'gidih abeyyo. Tahat yabtam yoo YALLAY Mulki lehiyya» iyye.

¹⁵ «Masri abuuruh cabbaay tet addal yan mara selli hayu waa saaku, YALLA kinniyom yok aaxigelon» iyye.

¹⁶ «Taham mango baaxoh yooboke agbi Masri kee tet marah abu waa darraqah takke booge. Tahat yabtam yoo YALLAY Mulki lehiyya» iyye.

GAHANNAB FAN OOBA MARA

¹⁷ Seewah nee edde been taban kee nammeyhaytô sanatak inikhaytoh alsak taban kee konoyhaytoh ayro, YALLIH qangara yol obteeh; yok iyyeemih:

¹⁸ «Bani-adantow, a axxul le Masri marah boogis. Keenik kalah yan mara lih ken hayya haay, akeera fan ken rub. Dite le kabri oobe marat yengeleeniih, woo boodo fanah oobelon.

¹⁹ Keenik intaamah, ‹Isin sahdak qaxah tayseenim maay takkalen? Ahaysa akeera fan gexettoonuuh, tokkel diini-maleela lih gacetton.

²⁰ Masri mara edde qidoonu seef siibot yaniih; Masri mari qeebit rabeleeh, keenik mango mari rabele.

²¹ Masri mari akeera gexu waa saaku, ken kee ken qaxat gacca 'ye mara akeeral geyoonu waan waqdi, tokkel tan agiiray duma qeebi abak tenehiyya keenik, ‹Diini-maleelay qeebit rabtehiyya a saaku temeeteh taniih; akeeral ginaada keenik qangalaylut tan› keenik axcelon.

²² «Assuuriya kaadu teetik rabte qaskarih kabaara marot tet tabbixe. Too qaskar inkih teetik edde rabtem carbi.

²³ Ken kabaara elle tanim, akeerak adda le araca. Woo qaskarih kabri teetit maroh yen. Keeniy ta saaku tonnal yanihiyya, addunyal sahda akak meysitta marah sugen.

²⁴ «Qeelam kaadu wokkel taniih, carbit teetik rabte qaskarih kabaara maroh teetit tan. Addunyal sugen saaku sahda akak cunxitta marak yeneeni'mmay, a saaku too diini maleelah yen mari akeera gexe. Akeera gexe uma marat tikka 'ye qaybi keenit yekke.

²⁵ Tokkel ginaada keenik qangalaylut taniih, Qeelam carbit rabe mara lih tan. Tet qaskaray carbit rabtehiyyah kabaara tet dariifal tan. Raben saaku diini-maleelah sugeenih diini maleh raben. A saakuh tu gactek, edde sugen qaybit edde akeera gexeeniih, carbit qiden marat yengelen.

²⁶ «Meesek kee Tuubal ummat kaadu, ken qaskarih kabaara maroh keenit taniih, wokkel yanin. Oson diini-maleelah sugeenih; addunyal yenen saaku sahda akak cunxitta marah sugeenimih sabbatah, edde rabeenim carbi.

²⁷ Dumî dabaanal agiira rabta saaku carbi silac luk ken aagaquk yeneenih, seef lacdi addal ginaadak amô-ginat haak yenen. Ta mari addunyal yen saaku sahda akak meysitta marah sugeeni'mmay, tonnal ken maaguqinnon. Ken dambih digaala ken lafal raqta.

²⁸ «Masri maraw, isin kaadu carbit rabte diini maleela lih elle baytoonu waytaanam tonna.

²⁹ «Edom kaadu isi malikwa kee abbobti lih wokkel tan. Too mari kaxxam qande le qaskarak yeneeni'mmay, a saaku diini maleelay carbit rabtehiyya lih, akeeral yanin. Tokkel ginaada keenik qangalaylut tan.

³⁰ «Saydâ mara kee kilbat le kabut raqta abbobti inkih kaadu wokkel tan. Duma sahdat cunxo qidak yenen. A saakuh tu gactek, diini-maleelah rabeenih; carbit rabe mara lih akeera isinni qaybi xagarat luk gexen. Akeeral yan marat tikka 'ye qaybi keenit yekke.

³¹ Masri malik kee kay qaskar carbit rabele'mmay, usuk akeeral carbit rabe mara yabalu waa waqdi, a marat kaadu aham tekkem kaat amqele. Ahat yabtam yoo YALLAY Mulki lehiyya» iyye.

³² «Dumah yan saaku Masri malik a addunyal enna 'ya mari akak cunxita num abeh suge. Takkay immay kaa kee kay qaskar rabeleeh, tohuk wadir diini maleelay carbit rabtehiyya lih gacelon. Tahat yabtam YALLAY Mulki lehiyya» iyye.