Yacedkel 31 - NABUWWA KEE MALIKWA

MASRIIY KAXXA CAXAT MISSOYSEN

¹ Seewah nee edde been taban kee inikhaytoh sanatak sidochaytoh alsak inikhaytoh ayro, YALLIH qangara yol obteeh; yok iyyeemih:

² «Bani-adantow, Masri malik kee kay marak intaamah: Qandek litom qunxam hinna! Koo aleltam iyyaay?

³ Ceelalloh, Assuuriya Lubnaan-rasul tooboke caxay mango ludway silal meqehiyya leeh, xexxaarah qamburre guftahiyyah bis luk sugte.

⁴ A caxa racta leek tooboke. Too leeh sabbatah, woo caxah dariifal tan baaxo inkih allaggowte. Too lee dariifal enna 'ta garboh fan caxitte.

⁵ A caxa lee nagay geyteemih sabbatah, xexxaarah cooxuk xagar gexak ten. Ludwa teetik nabna kee xexxar luk ten.

⁶ Kimbir akak inxicca 'yaanam ludwal akak qarwa xissitte. Alluwwa kee dubaala inkih xaylo tet gubal xalte. Baadal enna 'ya mari tet silaalal iraawite.

⁷ A caxa xexxar kee naba ludwa leemih sabbatah, kaxxa qax-maqaane luk sugte. Ramid teetik baaxok ragidil tan leey ractahiyya gufe.

⁸ Yallih bustaanih addal yan kaxxa coox tet xaqam luk masuginna. Saaganto kee *subla tet gide alginaanah luk mananna. Faxe caxay Yallih bustaanal tenehiyya woo gide qaxak luk mananna.

⁹ A caxa, yooy YALLAH yani Qadanay yi bustaan elle sugehiyyal uysubuke cooxuk, ludwa kee qaxah lafitta inte. Anu qaxa tet eymeeqe.

¹⁰ «Tonna-leemiik yoo YALLAY Mulki lehiyya iyyaamah, Too caxa dadalah qamburre guftam faxxa hayte. Tembe saaku kaxxiina bahteemih sabbatah,

¹¹ tet cineeh marin abba tet beetay exce. Is bahte umaaneh tet celtam teetik abe.

¹² Racmatta sinni maray allî baaxok yemeete tet irgiqqa heeh elle tet qideh cabe. Luud akak baaxoh addal tan qaleelah amo kee goloola kee daqaral radeh. Baadal tan ummattay woo caxah gubal silaalitak sugte wokke cabteh gexxe.

¹³ Kimbir amma 'yeh teetiy raddehiyyal daffee. Alluwwa kaadu teetik radde ludwat taqqa 'teh gexxe.

¹⁴ Tahak wadir faxe caxa leek faxeh gide geytaamah, dadal kee xexxaarah too caxah innah magacta. Xexxaarah qamburre gufta caxa tahaysa mataabuka. Toh akah axcem, rabeeniih dite le kabri oobe marat yengeleeniih woo boodo fanah oobelon» iyye.

¹⁵ YALLAY Mulki lehiyya kaadu iyyeemih, «Too caxa dite le kabri obte saaku, baaxo inkih arkite. Baaxoh addak racta lee gexi haak masuginniyo. Buyyitte darah oobi haak masuginniyo. Too caxa rabteemih sabbatah, Lubnaan qaleelal dite qideeh; garbol enna 'ya coox kafse.

¹⁶ Too caxa dite le kabri oobe marat tengele saaku, is radde waqdi abteh ten xongoloh mango baaxoh mari gilite. Inkih tan Qadanal suge coox kee, leek meqe innah allaggoowak suge Lubnaan cooxuy woo boodo fanah oobehiyya, a caxah raddem yublen waqdi ruffu iyyen.

¹⁷ Too coox kee tet gubal reebime suge maray cato tet abak sugehiyya tet lih kabri oobeeniih; qeebit qide marat yengelen.

¹⁸ «Masri malikow, Qadan cooxih addak xexxar kee hayba le caxa koo maay aleltaa? Meelelta'mmay, ahak wadir atu Qadanal suge cooxuk kaxxih Gahannab oobetto. Tokkel diini maleela kee carbit rabe marat angaletto. Masri malik kee kay marat akkelem tamah teeti. Tahat yabtam yoo YALLAY Mulki lehiyya» iyye.