Yacedkel 30 - NABUWWA KEE MALIKWA

YALLI MASRI DIGAALELE

¹ YALLIH qangara yol obteeh; yok iyyeemih:

² «Bani-adantow, takku waytaamat yab. ‹YALLAY Mulki lehiyya iyyaamah: Boogisay, «Woo saaku takku waytaamow!» axcuk, anay fayya hayisa› inxic.

³ Intaamah, ‹Umaane edde takke ayro xayih. YALLIH abto edde tamballayu wayta ayro xayih; baadal tan ummatta gadaama edde tabbaxu waytaah, qamburre baaxo edde buultu wayta ayro xayih.

⁴ Masril qeebi radele. Mango mari edde rabeleeh, rado amaggeleeh, abuuruh cabba tet heelon. Too waqdi Kuusul sinam kaxxam ankikkiqele.

⁵ Too qeebit, Kuus kee Liibiyaay, Liidiyaay Qarab kee Kuub deqsita rasuk kirah baaheenih sugen qaskar rabele. Masri lih bica abe mari too qeebit rabele› 'yaanam inxic» iyye.

⁶ YALLI iyyeemih, «Kilbat le kabuk Migdol deqsitta magaalak xabba haanamaay, gabbi-qaxat raqta Aswaan deqsitta magaalah amma 'yaanam tan baaxol, Masri marah qande acayuk tenem bayele. Masri mari kaxxam edde yakkalem inkih foyyaatele. Tahat yabtam yoo YALLAY Mulki lehiyya.

⁷ Masri rasi, abuuruh-raqte-baaxooxak kaxxih, abuuruh raaqeleeh; ken magaalooli abur-tekke-magaaloolik kaxxih abur akkele.

⁸ Masri magaaloolit gira ruubu waah, is dacayrih luk sugte qaskar selu waa saaku, YALLA kinniyom yok aaxigelon.

⁹ Too ayroy Masri finqa yakku waahiyyal, amaanah xiinak suge Kuus marat cube waak sugen cunxo qidu waa farmoytit markabat ruubeyyo. Too ayro xayyowteh taniih; xayuk amaateleeh; cunxo keenit heele.

¹⁰ YALLAY Mulki lehiyya iyyeemih, «Masri marih gaddaliino Malik Nabkadnessar gabat bayseyyo.

¹¹ Nabkadnessar racmatta sinni qaskar gabat hayya heeh, Masri rasu bayisa'gidih amaatele. Oson Masri seefit bayselon. Inkih tan baaxo raysak kibbiimele.

¹² Niil weeqaytu kafseyyo. Masri mara uma marih gubat heeyyo. Marin marih gabat, baaxo kee baaxol sugga 'tem keenik bayseyyo. Tahat yabtam yoo YALLA» iyye.

¹³ YALLAY Mulki lehiyya iyyeemih, «Moof deqsitta magaalal tan gabat bicsen duyyey yaqbudeenihiyya kee, yalla axcuk elle yaaminem keenik bayseyyo. Masri ahaysa abba mageya. Inkih yan rasut cunxo ruubeyyo.

¹⁴ Fatros deqsita aracay gabbi-qaxat raaqahiyya foyya abeyyo. Xooqan magaalay kilbat le kabut raqtahiyyat gira ruubeyyo. Teebes magaalal cokmih digaala ruubeyyo.

¹⁵ Masri-qaskar amô-reebu le aracay migaaqah Baslus deqsitahiyyal, inni naqabu oobiseyyo. Teebes marih gaddaliino kee midir bayseyyo.

¹⁶ Masrit gira ruubeyyo. Baslus magaala kaxxam ankikkiqele. Teebes magaalat maroh tan gaso addigillele. Moof magaalat kaxxa umaane akkele.

¹⁷ Awen kee Bubastis magaaloolil yan qunxaaneyti inkih carbit ambaxele. Tohuk raqtem seewah beelon.

¹⁸ Masri mari kaxxam edde akkaluk suge qande keenik bayisu waah, Masri mara maqar cabsiisu waa saaku, Tacfancis deqsitta magaalal dite radeleeh; qamburret buulumele. Tet mandarittel enna 'ya mara inkih seewah beelon.

¹⁹ Masri too digaalah digaalu waa saaku, YALLA kinniyom yok aaxigelon» iyye.

MASRI MALIKIH CAYLI BOOLAATE

²⁰ Seewah nee edde been taban kee inikhaytoh sanatak inikhaytoh alsak malcinhaytoh ayrot, YALLIH qangara yol obteeh; yok iyyeemih:

²¹ «Bani-adantow, Masri malikik gaba iggileeh; too gabak ahak wadir qaffotta 'yeh seef edde yabbaxu maduuda. Macaay intek, anu kaak iggile gabal baasima kaah haah, kaah daylisa num mageya.

²² Tonna-leemiik taway yoo YALLAY Mulki lehiyya axceemih, Masri malikik naqboyta ekkeh aniih, duma tiddigille gaba kee nagay tan gaba inkih kaak aggileyyo. Tonna-leemiik seef gabak addak kaak radele.

²³ Masri mara, ummat addat, baxacah ruubeyyooh; aaxige waan marih fanat fixixih ken ruubeyyo.

²⁴ Baabelon malikih gaba qande bahsiiseyyo. Inni seef kay gabat heeyyo. Masri malikih gaba butukku heeyyo. Isi naqboytih foocal uma rabah rabele.

²⁵ Kaa boolaaseyyooh, Baabelon malik qande bahsiiseyyo. Inni seef kaah aceeyyooh; usuk yi seef Masri fana yascassu waa saaku, sinam inkih YALLA kinniyom yok aaxigele.

²⁶ Masri mara fixixih ruubeyyoh; YALLA kinniyom too saaku yok aaxigelon» iyye.