Yacedkel 29 - NABUWWA KEE MALIKWA

MASRI SADDA FARMO

¹ Seewah nee edde been tabanhaytô-sanatak tabanhaytoh alsak taban kee nammeyhaytoh ayrot, YALLIH qangara yol obteeh; yok iyyeemih:

² «Bani-adantow, Masri malikit takku waytaamat yab. Kaa kee inkih yan Masri-rasut digaala akkelem kaah waris.

³ Kaak intaamah, ‹YALLAY Mulki lehiyya, «Weeqayti gudel yan kaxxa xabaado ceela numow, anu naqboyta kok ekkeh an» kok iyyah yan› kaak inxic. «Niil weeqayti yiimiiy; anu innih kaa bicse» 'yaanam inta.

⁴ Tonna'mmay sanat santiita kok hayya heeh, ama ku weeqaytih addat yan kullum xagarat kok akah xakbima innah kok abeyyo.

⁵ Koo kee too kullum inkih bacarih tan baaxol qideyyo. Tokkel ginaada kok gubbil elle cabeyyooh; koo yaaguqe mara mageyta. Ginaada kok guma kee alluwwâ gadda abeyyo.

⁶ Masril yan mari inkih YALLA kinniyom tohuk lakal yok aaxigelon› » iyye. YALLI iyyeemih, «Masri maraw, Israayil mari catoh niya siinil luk suge. Takkay immay qandeh bayre caxxak maysinniton.

⁷ Rakuh siinil gacen waqdi tiddigilleenih, xabqe keenik biyakteeniih, xiiron keenik tiggilen.

⁸ Hay tonnal, yoo YALLAY Mulki lehiyya qeebi seefit kot abu waa mara kot baaheyyo. Too mari sinam kee lac kok qidele.

⁹ Masri rasi abuuruh raaqele. YALLA kinniyom too saaku yok aaxigelon» iyye. « ‹Niil weeqayti yiimiiy; anu innih kaa bicse› inteemih sabbatah,

¹⁰ inkih yan Masrik, Migdol deqsitta magaalay kilbat le kabut raqtahiyyak xabba haanamaay, Aswaan deqsitta magaalay gabbi-qaxat raqtahiyyak Kuusuh cuduuduh amma 'yaanam inkih, foyya abeyyo.

¹¹ Num sinniih lac sinni abuuruh cabeyyo. Morootom sanatah lac elle wessa m'iyya; sahdayti elle mayangayya.

¹² Masri baaxo kulli baaxok lafitta 'ya bacari abeyyo. Masri magaalooli morootom sanatah abur abeyyo. Kulli magaalak abuuruh laffa tet heeyyo. Masri mara marin baaxo aysaarreyyooh, tokkel dabboh gacelon. Marin marih addal gacelon» iyye.

¹³ YALLAY Mulki lehiyya iyyeemih, «Morootom sanatak lakal, Masri mara fixixih elle abbaxuk suge rasuk, le baaxo fanah gacseyyo.

¹⁴ Tohuk lakal oson akak raden mari elle suge Masrik gabbi-qaxi fan ken gacseyyo. Tokkel boola-le doolatah gacelon.

¹⁵ Doolatwak inkih boolah gacta doolat akkeloonuuh; marin doolatih abbootanak raaqelon. Hebeltô tuxxiq sinni mara ken abeyyooh, tonna-leemiik tohuk wadir doolatwa isinni gubat mahaan.

¹⁶ Israayil tohuk wadir ken catol kibaal haanamak raaqele. Israayil, Masrik ellecabo tabalu wayta saaku, Masril hayteh sugte kibaal qellat kinnim isik aaxigele. Israayil mari YALLAY Mulki lehiyya kinniyom, too saaku yok aaxigele» iyye.

MALIK NABKADNASSAR MASRIK QEEBIL YEYSE

¹⁷ Seewah nee edde been labaatanna kee malcinhaytô sanatak inikhaytoh alsak inikhaytoh ayrot, YALLIH qangara yol obteeh; yok iyyeemih:

¹⁸ «Bani-adantow, Baabelon malikih yan Nabkadnessar Suur-magaalal qeebih gaba qideh yan. Isi qaskar amo xagortak muxcah raqqaay sunku keenik dalletta 'tam fanah, quukat yabbixe. Takkay immay a gid yakke cawalay edde yaniinihiyyah kaa kee kay qaskarak galto num mageya.

¹⁹ Tonna-kinnuk, taway yoo YALLAY Mulki lehiyya axceemih, Masri baaxo Malik Nabkadnessarah aceeyyo. Masri baaxol sugga 'te duyye buubbaay radda heeh beeleeh, tokkel isi qaskarih cawal agdiyele.

²⁰ Ken akah aceem macaay inteenik, kay qaskar yoh taqabak yi taamat sugte. Tahat yabtam yoo YALLAY Mulki lehiyya» iyye.

²¹ «Too saaku Israayil mara cayla-leela abeyyo. Yacedkelow, koo kaadu sahda koo elle taabbe ikkel yaaba num koo abeyyo. Tonnal YALLA kinniyom yok aaxigelon» iyye.