Yacedkel 28 - NABUWWA KEE MALIKWA

SUUR MALIK SADDA FARMO

¹ YALLIH qangara yol obteeh; yok iyyeemih:

² «Bani-adantow, Suur magaalah malikik intaamah: YALLAY Mulki lehiyya kok iyyaamah, ‹Kaxxiinah qaffuddaah yalla is takkale. «Yalla kinniyooh bad maroh edde yan korsil an» 'yaanam inta. «Kasah Yallih innah an» intaah, Yalla is celsissa'mmay, sahdaytu kinnito ikkal Yalla hinnito.

³ Daaniyelik kasah taysem isik takkale. Kok qellittam matanam takkale.

⁴ Litoh tan kas kee ixxigat mango dahab kee lakqo kobxisitte.

⁵ Tellemmol kaadu kaxxa ixxiga luk sugteeh; tohih sabbatah mango fayda geyte. Tohut geyte gaddaliino kaxxam kaxxiina koo bahsisse.

⁶ « ‹Hay tonnal yoo YALLAY Mulki lehiyya kok axceemih, «Kasah Yallih innah an» 'yaanam inteemih sabbatah,

⁷ racmattak tu sinniih naqboytit kok yakku waa mara kot ruubeyyo. Too mari atu isi ixxiga kee kasal geyte qax-maqaane inkih kok bayselon.

⁸ Koo qideloonuuh, adda le badat koo qambiselon; akeera fan gexetto.

⁹ Hay, koo qidoonuh yamaaten saaku, anu Yalla kinniyo keenik maay axcettoo? Koo qidu waa mari kol yamaatu waa saaku, Yalla hinnitoy bani-adantu kinnitom koh ambulleele.

¹⁰ Diini maleelah yan allî baaxoh marih gabat, kuti rabah rabetto. Taham akkele intam yoo YALLAY Mulki lehiyya› 'yaanam kaak inxic» yok iyye.

SUUR MALIKIH BAATI

¹¹ YALLIH qangara kaadu yol obteeh; yok iyyeemih:

¹² «Bani-adantow, darraqah takke boogey Suur-malikih abu waahiyya ah teeti. Kaak intaamah: YALLAY Mulki lehiyya iyyaamah, ‹Dudda le mara elle yaaxigen numuh ten. Kas kee qaxa kok bisoh gexak mananna.

¹³ Qadan bustaanay Yalli isim abehiyyah addal sugte. Qax amqinnaan luul qax koo yeymeeqe. Qisi kee anxaxinan kee kuclinan kee walqin bisu le bila xagaral le sartanat sugte. Dahabak bicsen duyye bilqah xagaral luk ten. Koo bicsen saaku, too duyye koh yeceen.

¹⁴ Dacrisa malaykattuy kaxxa galwa le koo abe. Yallih qaley saytunihiyyal dabqah ten. Habug iyya xeetik gudel gexam-gexak sugte.

¹⁵ Uma taamat asse ayrok dumal, akkey ubukku 'tem caalat kok cooca luk masuginna.

¹⁶ Duyye limo kee aylammiyyat taamah gacteeh; toh baatilit koo asisseeh too baatil dambi kol yekke. Ahak gexxaamah, dacrisak yen malaykattow, taahirik tan yi qale koo cabsiiseh. Woo liliq iyya xeetih fanak koo eyyeeqe.

¹⁷ Litoh tan qax-maqaane kaxxiina koo bahsisseeh, migaq-gexxoy luk sugte hawri koo cabsisseh. Tohuk gexxaamah xabba koo heeh, baaxot koo qide. Kot tekkem tuble malikwa, tah net akkeleh, axcuk, akah meysitta 'ta digaalah koo digaale.

¹⁸ Tellemmol abtah tan baatilik gexxaamah, qibaadah arooca inkih kok nadaasa tekke. Tonna-leemiik kok tewqe gira urseh; inkih tan magaala edde carrise. Koo fan wagtu waa mari gomboduk sah kok raqtem ane waytam yublen.

¹⁹ Tahaysa baateh, wadiriik koo mageyan. Koo aaxaguk yen baaxooxah mari wariggat yan. Kot tekkem keenit takkeemik meysitan› kaak inxic» iyye.

SAYDA MAGAALA SADDA FARMO

²⁰ YALLIH qangara yol obteeh; yok iyyeemih:

²¹ «Bani-adantow Saydat takku waytaamat yab.

²² Keenik intaamah: YALLAY Mulki lehiyya siinik iyyaamah, ‹Saydah ummatey, anu sin naqboyta ekkeh an› keenik inxic. ‹Siinik abu waam yok yabalu waa mari yoo faylisele. Sin addal yan marat abah an digaalat taahirik anim innik ayballayu waa saaku, YALLA kinniyom yok aaxigelon.

²³ Dalka siinil ruubeyyo. Qabal gitittel darah innah siinik akah caxita'nnah abeyyo. Kulli kabuk qeebi siinit abeloonuuh, ummatta siinik ambaxele. YALLA kinniyom tonnal yok aaxigetton› keenik inxic» iyye.

ISRAAYILIT BARKAT GACELE

²⁴ YALLI iyyeemihii, «Faxe baaxooxay dariifal geytimma 'taah, ken bursutak sugtehiyya tahak wadir Israayil ummatal ada matakka. Too waqdi YALLAY Mulki lehiyya kinniyom aaxigelon.»

²⁵ YALLAY Mulki lehiyya iyyeemih, «Israayil ummat fixixih elle abbixe baaxooxak gacseyyo. Addal keenik anu waa waqdi, woo baaxooxah mara Kudduus kinniyom aybulleeyyo. Israayil mari isi baaxoy anu yi naqasuh yan Yaqkuubuh eceehiyya fan aduurelon.

²⁶ Too baaxol amaanah xiinelon. Tokkel buxaaxi xissiteloonuuh, qinab coox abqurelon. Cuggaaneh keenik yan maray ken bursutak suge digaaleyyooh; Israayil amaanah xiinele. Too waqdi anu YALLAY ken Dagelta kinniyom aaxigelon.