Yacedkel 27 - NABUWWA KEE MALIKWA

SUURUH ABEN DARRAQISI

¹ YALLIH qangara yol obteeh; yok iyyeemih:

² «Bani-adantow, Suur magaalah boogis.

³ Bad akak culan culmal tan Suur magaalay baddi afal enna 'ya mara lih badaaqat abtahiyyak, yoo YALLAY Mulki lehiyya axcem liyok, waris. Teetik intaamah: Suur magaalay, hidah qax-meqiyo 'yaanam intaah, kaxxam isit takkale.

⁴ Dabqah baddi-amol tan. Koo xise mari qax-meqe markabih innah koo hee.

⁵ Luucaan koh akak baaheenim, Cermon deqsitta qaleh amol yen saagana. Markab gudel daabisen dagalay markab edde tangayyehiyya koh akak bicseenim, Lubnaan rasuk baahen *sariidâ-cooxu.

⁶ Koo edde seeban coox, Basan deqsita rasuk yirgiqen garsâ-caxak bicsen. Markab waqina akak bicseenim, Kobros rasuk baahen *sariidâ-cooxu. Dariifa akak dakani moddiinit exfen.

⁷ Ku markabih siraaqay dilwa le *baftak bicseenihiyya Masrik baaheeniih; simbil innah allaak yambulle. Markab amoh saroy Kobros gadiirik baaheenihiyya kuclinan kee diiminan bisu le.

⁸ Markab seebak yen mari Sayda kee Arwad deqsitta namma magaalak yemeeten. Bacriyya kee naakudah luk tenem, koh yooboke maray kaxxa cubbi lehiyyak ten.

⁹ Markab addat Gabal rasuk yemeete naggaarinna le mari yeneeh, too maray kaxxa ixxiga lehiyya, markabat luucaan fanak lee cultaamak, dubaalat edde heen. Badal gexxa 'ya maraakibit yan bacriyya-mari, tellemmô duyye kok xaamitoonuh kol amaatuk sugen.

¹⁰ Fursi kee Liidiya kee Liibiyak amma 'ye mari ku qaskarah yenen. Gob kee amot haan birta ku qaskarih aracal daanat yabbixen. A mari, migaq kok fayya haa mara kinni.

¹¹ Arwad deqsita aracak yemeete mari magaalat maroh tan gaso dacrisak yenen. Gammad deqsita aracak yemeete mari amo xer qarway magaala akak dacrisaanahiyyal dacayrih yenen. Isinni goobwa woo gasol takayrut abbaxuk yenen. Qaxa koo teymeeqem, too mara.

¹² «Isbaaniyah rasu lih badaaqat abak ten. Caddo sinni duyyey keenil teylemmehiyyat milaaguh (libaakih), lakqooy biriitaay dingo kee qarar geyak sugte.

¹³ Giriik mara kee Tuubal kee Mesek yemeete marat kaadu tellemmô duyye kalak sugte. Too marak naqoosa kee nacaasak bicsen duyye beyya hayteh, woo duyyeh milaaguh (libaakih) tellemmô duyye keenih acayuk sugte.

¹⁴ Beet-Togarmak bacarih tan baaxoh faariisaay qebti faariisa kee bakilwa beyya hayteh, tellemmo keenih abak ten.

¹⁵ Roodes deqsita mara kee koo tellemmo titta lih abak sugten. Baddi afal suge mari duyye kok abuuduh beyya haanaah, woo duyyet milaaguh (libaakih), dakani-qaag kee data gurmud le caxak yirgiqen coox koh edde acayuk sugen.

¹⁶ Suuriyah mari kaadu tellemmo ko'lih abak sugeeh; atu lito mango tellemmô-duyye kok xaamak sugen. Too duyyet milaaguh (libaakih), anxaxin unxux kee diimin saraay, dilwa le sara kee *baftak bicsen xagar meqe sarooy, baddi arul geytima uwway gacro deqsitahiyya kee, qasa unxux koh edde milaagak sugen.

¹⁷ Yuuda kee Israayil maray badaaqat abahiyya kaadu, kok beyan duyyet milaaguh, Minnit deqsita rakaakayak baahen kamadi kee malabaay saliid (zeyti) kee dayla koh edde acayuk sugen.

¹⁸ Damaskoh mari kaadu badaaqat duyyet koh milaaguh (libaakih), Celbon rasul yooboke qinab caxah xaylok bicsen kamri kee, Saahar deqsita rasuk baahen illih xagor koh edde acayuk sugen.

¹⁹ Tohuk kalah, Daanah yooboke mara kee, Udaalak yemeeten Giriik mari duyyet milaaguh, yisiffiyen birta kee caxâ-sifa koh acayuk yenen.

²⁰ Dadan mari, tellemmô duyyet milaaguh, koori bagul haan gilaas-fido koh baahak yenen.

²¹ Qarab kee Keedar rasih marak saqoltih yan mari, atu tellemmoh keenit kalta duyyet milaaguh, anaaqe kee marwa kee wadar edde acayuk sugen.

²² Saba kee Raqmak yemeete badaaqat-aba-mari kaadu, ko'lih badaaqat abak yenen. Atu tellemmoh keenit kalta duyyet milaaguh, giffa 'ya caxâ-sifa kee limok mangoomuh yan xeet kee dahab koh edde acayuk sugen.

²³ Caaran kee Kanne kee Qadan deqsitta magaaloolil yan mara kee, Sabak yemeete badaaqat-aba-mara kee, Assuur kee Kilmad magaalal yan mari inkih, badaaqat ko'lih abak yenen.

²⁴ Too mari qax-meqe sartan kee diimin bisu le saraay, dilwa le sara kee mango bisu le guulak bicsen fidooy, meqe'nnal qaxen sudaaduc kee akoota kot kalak yenen.

²⁵ Ku tellemmoh duyye kaxxa maraakibit hayya heenih beyak sugen. «Atu kaadu kaxxa duyye quukah le markabay badal gexxahiyyah bis luk sugte.

²⁶ Seebit koo beya mari bad fanah koo beeh, ayrô-mawqak yamaateh yan caacay badak gudel butukku koo hee.

²⁷ Too ayroy baati kot tekkehiyyal, gadda kee tellemmô-duyyeey, markab beyak suge mara kee, markab seeba maraay, naggarwa kee qaskaraay, raqqa 'ye maray markab addat enna 'yahiyya inkih sute.

²⁸ Ku markabih maray badal gexak sugehiyya badat sute waqdi, abeenih yanin xongolot badak afal tan baaxo axaxisen.

²⁹ «Maraakib seebak yan maraay, bacriyya kee naakuda inkih baddi afa fanah kudeeniih, maraakib foyyah raaqe.

³⁰ Too mari inkih, siisa amol caxak, weeqeeniih; gombodut yubruken.

³¹ Kot tekkeemih rookah, amo isinnik molla heenih sartanah qabudda haysiten. Kot tekkeemih kaxxam koh qaadelon.

³² Koh weeqeloonuuh, weeqah iyyoonu waanamah, ‹A saaku badak addal tan Suur magaalay, ku gid takkeeh koo alelta magaala masuginna.

³³ Ku badaaqat badak yamaate saaku, kulli mara faxan duyyek cayisak ten. Ku badaaqatat geyan duyyet mango malikwa gaddalitte.

³⁴ A saaku badak addal tiddigilleeh, badak ragid fanah sutte. Badaaqatah beyak sugte duyye kee ku taamat suge mari inkih ko'lih badat bayen.

³⁵ Badak afal guubuh yan mari wariggiteh. Koo tibbixe bala yoobbeenih wariggiten. Ken malikwah agantah cunxo keenit hee. Meysik gexxaamah fooci keenik dattoowe.

³⁶ Atu ahaysa gaba kalteeh, mataduura. Baadal enna 'ya limo-aba-mari, Kot tekkem net akkele 'yaanamal nabam meysite› axcuk koh boogisen.»