Yacedkel 26 - NABUWWA KEE MALIKWA

SUUR SADDA FARMO

¹ Seewah edde nee been taban kee inikhaytoh sanatak naharsi alsat inikhaytoh ayrot, YALLIH qangara yol obteeh; yok iyyeemih:

² «Bani-adantow, Suur magaalal yan mari akah wallitam macaay intek, kinnim koh warisu waa. Ahaysa, ‹Yarusalaam tiddigiiggilleeh; tellemmoy teetil akkuk tenehiyya gaba kalteh ikkal, gaddaliinoh net mamissowta› 'yaanamah wallitan.

³ «Tonna'mmay yoo YALLAY Mulki lehiyya tohuk iyyeemih, ‹Suur maraw, naqboyta siinik ekkeh anim siinih warsa. Qeebit sin yabbaxu waa mara siinit ruubeyyo. Too mari baddi haffoh innah kullim duufut beyak amaatelon.

⁴ Suur-magaalat maroh hayteenih tanin gasoosa siinik butukku heeloonuuh, amo xer qarway magaala akak dacrissaanahiyya siinik aggiggilelon. Too magaala xixxaqah akah raqta innah, buuri baguk akak fikka heeyyo.

⁵ Magaala baddi gudel kullum yabbaxuh yemeete mari sabooka elle kafisa xixxooqah raaqele.› Tahat yabtam yoo YALLAY Mulki lehiyya. Suur buubu waa mara ruubeyyo.

⁶ Teetik baddi-afal raqtah tan mandarittel yan mara seefit selelon. Suur mari YALLA kinniyom too saaku yok aaxigelon» iyye.

⁷ YALLAY Mulki lehiyya kaadu qagseh iyyeemih, «Suur aysibixe'gidih, Baabelon-malikiy malikwak inkih nabahiyya baaheyyo. Kay migaq Nabkadnessar. Ta malik kilbat le kabuk kaxxa qaskar kee, faras amok qeebi abta qaskar kee, faaris-gaariira luk amaatele.

⁸ Suur magaalak baddi afal raqtah tan mandarittel yan mari qeebit ambaxele. Nabkadnessar mari boodod dageleeh, bullaaqek megdebitte xiseloonuuh, eded bicselon. Gooba mangak gexxaamah siinik isinni dacrisak wadir sin biyaakelon.

⁹ Gaso edde yaggilen gutqeenat magaalat maroh tan gasoosi aggilelon. Godmat amo xer qarway magaala akak dacrissaanahiyya siinik aggiggilelon.

¹⁰ Ken faroosa mangak gexxaamah, faarisih gexot tawqeh tan siisa sin buulele. Faaris-gaariira kee faras amok qeebi abta labha edde tan faariisa, tiddigille magaala cultu wayta waqdi, radah yan anayat gidaarwa engeyya axcele.

¹¹ Faariisat qeebi aba mari magaalak kulli gital ummat seefit qidelon. Kaxxa-kaxxa qamidwa bututtukka heeloonuuh ballaaqeh gacissa heelon.

¹² Baaxol luk sugten gaddaliino kee tellemmô duyye siinik beelon. Magaalat maroh tan gasoosa siinik bututtukku heelon. Kaxxa qarwa siinik aggilelon. Woo qarwa edde xisseenih sugten xeet kee cooxuuy raqqa 'te duyye inkih badat qidelon.

¹³ Suur mari abak yen gad kee gadah yaaguren duyye haysitta heenih luk sugen kaalayta gaba kalele.

¹⁴ Kullum yabbixe mari kullum edde yabbixe sabooka elle hawwalisa xixxooqah tet cabeyyo. Suur nammeyhaak maxissinta. Tahat yabtam yoo YALLAY Mulki lehiyya» iyye.

¹⁵ YALLAY Mulki lehiyya Suur magaalal yan marak iyyeemih, «Nabkadnessar mari sin yabbaxu waa saaku, baddi afal yan mari siinit yakkeh yan ricidih abtan booge kee qawna aabbeleeh, too xongolo warigga ken heele.

¹⁶ Baddi xaqul tan baaxooxah amoytitte dardaarinni koraasih baguk obba 'yeenih, xer-kameswa kee dilwa le sarak katta 'yeenih, baaxok bagul gacelon. Siinit tekkem abaluk kaxxa cunxoh cunxitelon. Xagar keenik axaxoh mayaada.

¹⁷ Tohuk lakal siinih weeqelon. Weeqah iyyoonu waanamah: ‹Woyyow kaxxa magaala baateh tan. Maraakib badal teetik baye. Badal reeda luk teneeh baddi afal enna 'ya mari teetik cunxo kee meysih rabak yen.

¹⁸ A magaala baate saaku gadiirwal tan ummatta baati teetik tuble waqdi kaxxa cunxoh cunxiteeni› 'yaanam axcuk boogisan.»

¹⁹ YALLAY Mulki lehiyya iyyeemih, «Suurey, sarrah num dabqah elle gace waa baaxo koo abeyyo. Kaxxa baday adda lehiyyat koo buuleyyo.

²⁰ Rabe mara fan obba 'teh dumî dabaanal suge mara luk akah gacta innah kok abeyyo. Dumaak baate duyyey abuuruh raqqa 'teh woo boodo fanah obtehiyya lih oobetto. Tohuk wadir mataduuraay addunyal manoh maraqta.

²¹ Akak aduure wayta finqah koo finqiseyyo. Manoh maraqta. Sinam koo gorrissaamah koo mageyta. Tahat yabtam yoo YALLAY Mulki lehiyya» iyye.