Yacedkel 25 - NABUWWA KEE MALIKWA

QAMMON SADDA FARMO

¹ YALLIH qangara yol obteeh; yok iyyeemih:

² «Bani-adantow, Qammon marat takku waytam waris.

³ ‹Mulki le YALLIH yab oobbeya› keenik inxic. ‹Yi Qibaadah-Qari nadaasa yekkem siinit temqeh; Israayil rasi bayem siinit temqeh; Yuudâ mari seewah gexam kaxxam siinit temqe.

⁴ Tahat ruffu inteenimih sabbatah, ayrô-mawqa le kabut raqta bacarih tan baaxok yemeete mari baaxo siinik akah yabbixe innah, siinik abeyyo. Too mari isinni duyye luk amaateleeh; dabaaqah sin baaxol nookelon. Isin akme rarten caxâ-miri kenim akkeleeh; isin nake rarten can, sin baaxol, oson nakelon.

⁵ Rabba deqsitta magaala gaali elle yaloole guubuh gacseyyooh; Qammon marih baaxo inkitanuuk illi elle yaloole guub abeyyo. Anu YALLA kinniyom too waqdi aaxigetton› keenik inxic» iyye.

⁶ YALLAY Mulki lehiyya qagseh Qammon marak iyyaamah: «Farcatak gexxaamah gaba taagureeniih kaqittaanam ubleh. Israayil rasu uma intit tablen.

⁷ Tohih sabbatah sin buubu waah sin radu waa marih gabal sin heeyyo. Sarrah doolat akah akke waytaanaah, baaxo akah alle waytan innah, inkitanuuk sin bayseyyo. Anu YALLA kinniyom too saaku yok aaxigetton» iyye.

MOOYAB SADDA FARMO

⁸ YALLAY Mulki lehiyya qagseh iyyeemih, «Mooyab kee Edom mari, ‹Yuudâ mari gersi marak edde yayseenimih loonum malon› 'yaanam iyyeeniih; tohih sabbatah,

⁹ Mooyab rasih cuduudul tan magaaloolik, ken rasih dacayrih tan Beet-Yasimot kee Baal-Maqon kee Kiryatayim deqsitta magaalooliy timixxigehiyyah agantah, akah tantixibbixe innah abeyyo.

¹⁰ Ayrô-mawqa le kabut raqta bacarih tan baaxoh mari, Mooyab kee Qammon marat qeebi abba heenih akah yaysen innah abeyyo. Toh akah abu waam, Qammon wadiriik doolatah raaqe wayta'gidi.

¹¹ Tonnah kaadu Mooyab digaaleyyooh; too saaku YALLA kinniyom yok aaxigelon» iyye.

EDOM SADDA FARMO

¹² YALLAY Mulki lehiyya iyyaamah, «Edom-mari Yuudâ-maral canê-gacsah umam baaheeh; too umaaney oson canê-gacsah abeenihiyya, Edom maral ken cabe wayta umaane tekke.

¹³ Tonna-leemiik ahaysa Edom mara digaalu waah, too rasul enna 'ya mara kee saq inkih bayisu waam aysixxigeh an. Teman deqsitta magaalak xabba haanamaay Dadan deqsitta magaalah amma 'yaanam yan rasu sahda elle deedalta abur abeyyo. Tohiital yan mari inkih carbit ambaxele.

¹⁴ Israayil ummatay yi ummat kinnihiyya yi aftok Edom maral cane gacselon. Yi naqbi le'nna ken aybulleelon. Yi digaala elle obta maral le inna ablelon. Tahat yabtam yoo YALLAY Mulki lehiyya» iyye.

*FILISTIIN SADDA FARMO

¹⁵ YALLAY Mulki lehiyya iyyaamah, «*Filistiin mari, mango dabaanah naqboytiitih keenik sugen Israayil maral, canê gacsah kaxxam umam baaheeniih, keenih lon naqabuh ken seleenih.

¹⁶ Tonna-leemiik Filistiin marat qeebi abeyyooh ken bayseyyo. Filistiin booxal raqqa iyyu waa mara suge weeh innah heeyyo.

¹⁷ Yi naqbi le'nna ken ayballayuk, uma digaalah ken digaaleyyo. Agaagul sinni canê-gacsa keenit abeyyo. Too waqdi YALLA kinniyom yok aaxigelon» iyye.