Yacedkel 24 - NABUWWA KEE MALIKWA

DICIILITE BIRTIH BUUTI

¹ Seewah nee edde been sagalhaytô sanatak tabanhaytoh alsak tabanhaytoh ayrot, YALLIH qangara yol obteeh; yok iyyeemih:

² «Bani-adantow, a saakih ayro alsi edde yanih gide uktub. Macaay intek, Baabelon malik Yarusalaam magaala yabbixe'gidih maro teetit edde hee ayro temeeteh.

³ Ama yi maray yabti cina lehiyyah a yab ceelalloh waris. Keenik intaamah, YALLAY Mulki lehiyya siinik iyyaamah: ‹Buuti leek kibba haay giral xik.

⁴ Gabul le maruwuk lak kee carayay cadoh inkih taysehiyya irgiqqa haay, lafoofik tayse lafa kee, cadok kaadu tayse exxa doorru haay, woo buutit qid.

⁵ Gubal gira akak meqe'nnah urus. Lee nagay factay inxic. Lafof kee cado inkih meqe'nnah alaytay inxic› siinik iyya, keenik inxic.

⁶ «YALLAY Mulki lehiyya iyyaamah, ‹Sahda qida marih magaala baateh; dicil baahek sah akak duugume waa distih gide tekkeh tan. Tet addal cado awqa-awqah beeloonuuh tu macaban.

⁷ A magaalah addal sahda qidaanam temeggeh tan. Takkay immay qidan marih qabal elle caxitam, ballaaqet elle buuluma arac hinna. Elle caxitam xixxaqak bagu.

⁸ Too qabal tokkel elle yanay exceh an. Yanay akah axcem, a qabala able waqdi naqbi yot haa'gidi› iyye.

⁹ «YALLAY Mulki lehiyya iyyeemih, ‹Biileenit magaalay, kot takku waytam abletto. Gira edde urussa boco anu innih baaheyyok,

¹⁰ atu woo boco girat qiday uyburruc. Cado alas; maragi akak caxâ-sifat tamu eymeq. Lafa akak cararis.

¹¹ Too waqdi nadaasa akak diyaytuh, bagul akak suge dicil akak carara'gidih, woo nacaasak bicsen buutiy addal tu sinni giral xik. Qassowwa 'yam fanah laqay inxic.

¹² Abba heen taqabi foyya yakkeeh, tet wasak girat kinni-way makatinna. Tet kee teetil yan dicil girat qid!

¹³ Yarusalaamey, atu abte caraami nadaasa koo abe. Taahirik koo haam faxeh immay nadaasak taduuru cinteh. Ahaysa yi naqbi le'nna able'kal, nadaasak mataahirrowta.

¹⁴ Tahat yoo YALLAY Mulki lehiyya yaabeh an. Ahaysa gaba edde qidu waa wakti xayyooweh yan. Abta umaane abalih tibba kok maxca. Koh maxuwaawa. Abteemih diggalsimetto. Tahat yabtam yoo YALLAY Mulki lehiyya› » iyye.

NABI BARRAH RABA

¹⁵ YALLIH qangara yol obteeh; yok iyyeemih:

¹⁶ «Bani-adantow, atu kicintoh tan sahdayto inki addah atkal rabal kok tet baxseyyo. Tohu'mmay tohuh, ‹Yallaw, ah macah?› axce waytaamaay, weeqe waytaama. Intik ximo caxe waytaama.

¹⁷ Sinkibitah koo aabbe waama. Rookat taniimih asta koh takke'gidih, amok qumaamat makalin. Ibak kabella makalin. Foocal saro isik mahan. Rookita mari yakme maaqo maxagin» yok iyye.

¹⁸ Too saaki ayro Yallih diini sahda barisak sugeeh; carri bar yi barra rabte. Nammeyhaytô saaku anu Yalli yok akah inxicca 'ye innah abe.

¹⁹ Tah yuble mari, «Annah akah abtam macaay?» yok iyyen.

²⁰ Anu too waqdi keenik exceemih, «Ah yok aba intem YALLA. YALLIH qangara yol obteeh; yok iyyeemih:

²¹ Israayil marak intaamah, ‹YALLAY Mulki lehiyya siinik iyyaamah: Ama yi Qibaadah-Qarit kaxxam takkaleeniih intih wagittaanam siinit meqeeh, kaa fan gexxaanam kaxxam kicintoonuh immay, yooy YALLAH yani ama qari nadaasa abba heeleeh; too magaalal raqta say xaylo kee lab xaylo siinik seefit ambaxele.

²² Too saaku ama Yacedkel abem abetton. Foocal sara isinnik mahaytan. Rookita mari adoobita maaqo matakman.

²³ Qumaamat amok makaltan. Kabel ibak kalla hayteenih ib-qassih magexxan. Maweqtaanaay ximo macaxxan. Kaxxa rookah marookittan. Abten dambih, qakuh uma innah gacca axcetton. Mariiy marat tekkeemih siinik iihisele.

²⁴ Too waqdi Yacedkel asta siinih akkele. Usuk abba heem abetton. Axcem inkih takku wayta saaku, YALLAY Mulki lehiyya kinniyom yok aaxigetton› 'yaanam siinik iyya» keenik exce.

²⁵ Yalli yok iyyeemih, «Bani-adantow, oson kaxxam edde akkaluk yenen yi Qibaadah-Qari keenik beeyyo; intih wagtaanam kee adda akak culaanam keenit muquk tene'mmay intik keenik kaleyyo. Say-xaylo kee lab-xaylo ken waysiiseyyo.

²⁶ Tah takku wayta saaku, tahak yoowweh yemeete num tekke baati siinih warsele.

²⁷ Too ayro afay yabtu edde affaruk sugtehiyya koh fakkiimeleeh yaabetto. Too waqdi too numuy xaagu koh baahehiyya lih yaabetto. Ummatah asta akkettooh; oson anu YALLA kinniyom aaxigelon» iyye.